18825 ۔۔۔ المطلب بن عبداللہ بن حنطب سے مروی ہے کہ رسول اللہ (صلی اللہ علیہ وآلہ وسلم) کی وفات سے تین یوم قبل حضرت جبرائیل (علیہ السلام) آپ کے پاس تشریف لائے ۔ اور فرمایا : اے محمد ! اللہ عزوجل نے مجھے آپ کے پاس بھیجا ہے تاکہ آپ کی عزت ظاہر ہو ، آپ کی فضیلت پتہ چلے اور آپ کی خصوصیت معلوم ہو ، اللہ پاک آپ سے زیادہ جاننے کے باوجود آپ سے پوچھتا ہے کہ آپ کی طبیعت کیسی ہے ؟ حضور اکرم (صلی اللہ علیہ وآلہ وسلم) نے فرمایا : اے جبرائیل میں مغموم ہوں ۔ اے جبرائیل ! میں تکلیف میں ہوں ، جب تیسرا دن ہوا تو حضرت جبرائیل (علیہ السلام) ، ملک الموت اور ایک تیسرا فرشتہ بھی ہوا میں اترا جس کا نام اسماعیل تھا وہ ستر ہزار فرشتوں پر نگران تھا اور ان ستر ہزار فرشتوں میں سے ہر فرشتہ دوسرے ستر ہزار فرشتوں پر سردار تھا ۔ یہ سب فرشتے حضور اکرم (صلی اللہ علیہ وآلہ وسلم) کے استقبال کے لیے حاضر ہوئے تھے ۔ (اور سب ہوا میں موجود تھے ۔ اندر صرف حضرت جبرائیل امین (علیہ السلام) داخل ہوئے تھے) حضرت جبرائیل امین (علیہ السلام) ان سب پر نگران تھے ۔ حضرت جبرائیل امین (علیہ السلام) نے فرمایا : اے محمد ! اللہ نے مجھے آپ کے پاس آپ کی عزت ، فضیلت اور خصوصیت کے لیے بھیجا ہے ، اللہ پاک آپ سے زیادہ جاننے کے باوجود آپ سے پوچھتا ہے کہ آپ اپنے آپ کو کیسا محسوس فرما رہے ہیں (آپ کی طبیعت کیسی ہے ؟ ) رسول اللہ (صلی اللہ علیہ وآلہ وسلم) نے ارشاد فرمایا : اے جبرائیل ! میں اپنے آپ کو مغموم پاتا ہوں ، اے جبرائیل ! میں اپنے آپ کو تکلیف میں پاتا ہوں ۔ پھر ملک الموت نے دروازے پر آکر اجازت مانگی ۔ حضرت جبرائیل امین (علیہ السلام) نے فرمایا : اے محمد ! یہ ملک الموت ہیں آپ سے اندر آنے کی اجازت چاہتے ہیں۔ انھوں نے پہلے کسی آدمی سے اجازت مانگی اور نہ آئندہ مانگیں گے ۔ حضور اکرم (صلی اللہ علیہ وآلہ وسلم) نے ارشاد فرمایا : ان کو اجازت دے دو ۔ حضرت جبرائیل امین (علیہ السلام) نے ان کو اندر آنے کی اجازت دی ۔ حضرت ملک الموت اندر تشریف لائے اور حضور اکرم (صلی اللہ علیہ وآلہ وسلم) کے سامنے بیٹھ گئے اور عرض کیا : اے محمد ! اللہ نے مجھے آپ کے پاس بھیجا ہے اگر آپ مجھے اپنی روح قبض کرنے کا حکم فرمائیں گے تو میں قبض کرلوں گا اور اگر آپ اس کو ناپسند کریں تو میں چھوڑ دوں گا ۔ حضور اکرم (صلی اللہ علیہ وآلہ وسلم) نے فرمایا : اے ملک الموت کیا تم (میرے حکم پر) عمل کرو گے ؟ انھوں نے عرض کیا : ضرور اور مجھے اسی کا حکم ملا ہے کہ آپ جو بھی مجھے حکم فرمائیں میں اس پر عمل کروں پھر حضرت جبرائیل امین (علیہ السلام) نے آپ (صلی اللہ علیہ وآلہ وسلم) کو فرمایا : اللہ پاک آپ کی ملاقات کے خواہش مند ہیں۔ حضور اکرم (صلی اللہ علیہ وآلہ وسلم) نے ملک الموت کو فرمایا : تم کو جو حکم ملا ہے کر گزرو۔ حضرت جبرائیل امین (علیہ السلام) نے فرمایا : یہ میرا زمین پر آخری مرتبہ آنا ہے۔ پھر جب رسول اللہ (صلی اللہ علیہ وآلہ وسلم) کی روح پرواز کرگئی اور (چیخ و پکار کی شکل میں) تعزیت آنا شروع ہوئی تو ایک غیبی شخص آیا جس کی آہٹ محسوس ہو رہی تھی لیکن اس کا وجود معلوم نہیں ہو رہا تھا ۔ اس نے کہا : ” السلام علیکم و رحمۃ اللہ وبرکاتہ “۔ ہر جی کو موت کا مزہ چکھنا ہے۔ اللہ پاک ہر مصیبت پر صبر دینے والا ہے ، وہ ہر ہلاک ہونے والے کا جانشین دینے والا ہے۔ ہر فوت شدہ کا تدارک کرنے والا ہے ، اللہ ہی پر بھروسہ رکھو ، اسی سے امید رکھو ۔ مصیبت زدہ وہ ہے جو ثواب سے محروم ہو ۔ پس تم پر سلام ہو اللہ کی رحمت اور اس کی برکتیں ہوں ۔ (الکبیر للطبرانی عن علی بن الحسین) کلام : ۔۔۔ اس روایت کی سند میں عبداللہ بن میمون القداح ایک راوی ہے جس کو ابو حاتم وغیرہ نے متروک (ناقابل اعتبار) قرار دیا ہے۔ مجمع الزوائد 9 ۔ 35 ۔