18824 ۔۔۔ حضرت جریر (رض) سے مروی ہے میں یمن میں دو آدمیوں سے ملا ایک ذی الاکلاع تھا دوسرا ذی عمرو تھا ۔ میں ان دونوں کو حضور اکرم (صلی اللہ علیہ وآلہ وسلم) کی خبر دینے لگا ۔ دونوں نے کہا : اگر تم سچ بیانی سے کام لے رہے ہو تو پھر تمہارا یہ صاحب (یعنی رسول اللہ صلی اللہ علیہ وآلہ وسلم) گذر چکا ہے۔ اور اس کو تین دن ہوگئے ہیں۔ حضرت جریر (رض) کہتے ہیں میں اور یہ دونوں حضرات چل پڑے اور مدینے کے راستے پر ہو لیے ۔ پھر ہمیں مدینہ سے ایک قافلہ آتا دکھائی دیا ۔ ہم نے ان سے خبر چارلی ۔ انھوں نے بتایا کہ رسول اللہ (صلی اللہ علیہ وآلہ وسلم) کی وفات ہوچکی ہے ، سیدنا حضرت ابوبکر صدیق (رض) خلفیہ بنا دیئے گئے ہیں ، لوگ آپ پر رضا مند ہیں ، تب ان دونوں نے مجھے کہا : اپنے صاحب (یعنی سیدنا حضرت ابوبکر صدیق (رض)) کو خبر دینا کہ ہم آئے تھے اور شاید ہم دوبارہ بھی آئیں ان شاء اللہ ۔ پھر وہ دونوں یمن لوٹ گئے ۔ حضر جریر (رض) کہتے ہیں : میں نے سیدنا حضرت ابوبکر صدیق (رض) کو ان دونوں (عجیب لوگوں) کے بارے میں خبر دی تو سیدنا حضرت ابوبکر صدیق (رض) نے فرمایا : پھر تم دونوں کو لے کر کیوں نہیں آئے ؟ حضرت جریر (رض) فرماتے ہیں : پھر بعد میں ذی عمر ملا اس نے مجھے کہا : اے جریر ! تمہارے میرے دل میں عزت ہے۔ میں تم کو ایک بات بتاتا ہوں وہ یہ کہ تم عرب کے لوگ ہمیشہ بھلائی اور عافیت میں رہو گے جب تک ایک امیر کے جانے کے بعد دوسرے امیر کو بناتے رہو گے ۔ لیکن جب تلوار کے ساتھ امارت لی جانے لگے گی تو یہ لوگ امیر کی بجائے بادشاہ بن بیٹھیں گے بادشاہوں کی طرف غضب ناک ہوں گے اور انہی کی طرح راضی ہوں گے (اور یہ برا زمانہ ہوگا) (ابن ابی شیبۃ)