19628 ۔۔۔ کسی کی نماز پوری نہیں ہوتی جب تک وضو پورا نہ کرے ، جیسے کہ اللہ نے حکم دیا ہے : وضو میں اپنے چہرے کو اور ہاتھوں کو کہنیوں تک تک دھوئے ، سر کا مسح کرے اور پیروں کو ٹخنوں تک دھوئے ، پھر تکبیر کہے ، اللہ کی حمد وثناء کرے ، پھر جو آسانی کے ساتھ ہو سکے قرآن پڑھے جو اللہ نے اس کو سکھایا ہے۔ اور جس کی اللہ نے اجازت دی ہے۔ پھر تکبیر کہے اور رکوع کرے اور اپنی ہتھیلیوں کو اپنے گھٹنے پر رکھے ، حتی کہ اس کے جوڑ مطمئن ہوجائیں اور اعضاء پر سکون ہوجائیں ۔ پھر سر اٹھا کر ” سمع اللہ لمن حمدہ “ کہے اور سیدھا کھڑا ہوجائے ۔ حتی کہ ہر ہڈی اپنی جگہ بیٹھ جائے اور کمر سیدھی ہوجائے ۔ پھر تکبیر کہے اور سجدہ کرے اور اپنی پیشانی کو زمین پر سکون کے ساتھ ٹیک دے حتی کہ جوڑ پر سکون ہوجائیں ، پھر تکبیر کہہ کر سر اٹھائے اور سیدھا ہو کر زمین پر بیٹھ جائے اور اپنی کمر سیدھی کرے پھر تکبیر کہہ کر سجدے میں جائے حتی کہ سجدہ میں پیشانی سکون کے ساتھ رکھے پس کسی کی نماز پوری نہیں ہوسکتی جب تک کہ اس طرح نہ کرے ۔ (ابوداؤد ، نسائی ، ابن ماجۃ ، مستدرک الحاکم عن رفاعۃ بن رافع)