22816 ۔۔۔ حضرت ابی بن کعب (رض) کی روایت ہے کہ ایک دن رسول کریم (صلی اللہ علیہ وآلہ وسلم) نے ہمیں صبح کی نماز پڑھائی اور نماز سے فارغ ہو کر فرمایا : کیا فلاں شخص حاضر ہے ؟ صحابہ کرام رضوان اللہ تعالیٰ عنہم اجمعین نے عرض کیا نہیں فرمایا : کیا فلاں شخص حاضر ہے ؟ عرض کیا : نہیں ارشاد فرمایا : یہ دو نمازیں (عشاء اور فجر) منافقین پر بہت گراں ہوتی ہیں کاش ! اگر انھیں معلوم ہوتا کہ ان دو نمازوں کا (جماعت کے ساتھ ادا کرنے میں) کتنا زیادہ اجر وثواب ہے تو وہ ضرور ان نمازوں میں حاضر ہوتے گو کہ انھیں گھٹنوں کے بل ہی کیوں نہ چل کر آنا ہوتا ۔ بلاشبہ پہلی صف فرشتوں کی صف کے مانند ہوتی ہے۔ اور اگر تمہیں اس کی فضیلت معلوم ہوجائے تم ایک دوسرے پر سبقت لے جاؤ بلاشبہ دو آدمیوں کی باجماعت نماز تنہا آدمی کی نماز سے بدرجہا افضل ہے اور تین آدمیوں کی (باجماعت) نماز دو آدمیوں کی (باجماعت) نماز سے افضل ہے۔ الغرض جتنے بھی لوگ (جماعت) میں زیادہ ہوں گے اتنے ہی زیادہ اللہ تبارک وتعالیٰ کو محبوب ہیں۔ (رواہ الطبرانی وعبد بن حمید والدارمی ، وابو داؤد ، والنسائی وابن ماجہ ، وابو یعلی وابن خزیمہ وابن حبان والدارقطنی فی الافراد والحاکم فی المستدرک والبیہقی والضیاء المقدسی فی المختارہ)