23095 ۔۔۔ زید بن اسلم روایت نقل کرتے ہیں کہ مسجد نبوی کے پڑوس میں حضرت عباس بن عبدالمطلب کا ایک گھر تھا سیدنا حضرت عمر ابن خطاب (رض) نے عباس (رض) سے کہا : یہ گھر مجھے بیچ دو سیدنا حضرت عمر ابن خطاب (رض) اسے خرید کر مسجد میں توسیع کرنا چاہتے تھے ، حضرت عباس (رض) نے آپ (رض) کو گھر بیچنے سے انکار کردیا عمر (رض) نے کہا : بیچتے نہیں ہو تو مجھے ہبہ کر دو ، لیکن عباس (رض) نے ھبہ سے بھی انکار کردیا ۔ حضرت عمر (رض) نے کہا چلئے آپ اپنے تئیں گھر کو مسجد میں شامل کر کے توسیع کر دیجئے ، حضرت عباس (رض) نے اس سے بھی انکار کردیا ، سیدنا حضرت عمر ابن خطاب (رض) نے فرمایا ۔ آپ کے لیے یہ تین اختیارات ہیں ان کے سوا آپ کے لیے کوئی چارہ کار نہیں ۔ لیکن عباس (رض) برابر انکار پر مصر رہے ۔ حضرت عمر (رض) نے فرمایا : کسی آدمی کو ثالث بنا دیجئے جو ہمارے درمیان فیصلہ کر دے چنانچہ حضرت عباس (رض) نے حضرت ابی بن کعب (رض) کا انتخاب کیا چنانچہ یہ دونوں حضرات اپنا قضیہ حضرت ابی بن کعب (رض) کے پاس لے گئے حضرت ابی (رض) نے حضرت عمر (رض) سے فرمایا : میں جائز نہیں سمجھتا کہ آپ عباس (رض) کو ان کی رضا مندی کے بغیر ان کے گھر سے نکال دیں ، سیدنا حضرت عمر ابن خطاب (رض) نے ابی (رض) سے کہا : آپ کا یہ فیصلہ کتاب اللہ کے مطابق ہے یا سنت رسول اللہ (صلی اللہ علیہ وآلہ وسلم) کے مطابق ؟ ابی (رض) نے جواب دیا : بلکہ میں نے یہ فیصلہ سنت رسول اللہ (صلی اللہ علیہ وآلہ وسلم) کے مطابق کیا ہے عمر (رض) نے فرمایا وہ کیسے ؟ ابی (رض) نے کہا : میں نے رسول کریم (صلی اللہ علیہ وآلہ وسلم) کو ارشاد فرماتے سنا ہے کہ جب سلیمان بن داؤد (علیہ السلام) نے بیت المقدس کی تعمیر شروع کی تو جب بھی کوئی دیوار بناتے صبح کو اس منہدم دیکھتے ، چنانچہ اللہ تعالیٰ نے سلیمان (علیہ السلام) پر وحی نازل کی کہ تم کسی آدمی کے حق میں تعمیر نہیں کرسکتے تاوقتیکہ اسے راضی نہ کرلو چنانچہ سیدنا حضرت عمر ابن خطاب (رض) نے اپنا دعوی ترک کردیا اور اس کے بعد حضرت عباس (رض) نے اپنا گھر مسجد کی نذر کردیا ۔ (رواہ عبدالرزاق)