23140 ۔۔۔ حضرت عبداللہ بن زید انصاری (رض) کی روایت ہے کہ ایک مرتبہ میں سو رہا تھا ۔ اچانک میں نے (خواب میں) ایک آدمی کو دیکھا اس کے پاس دو لکڑیاں تھیں ۔ میں نے اس سے کہا حضور اکرم (صلی اللہ علیہ وآلہ وسلم) ان دو لکڑیوں کو خریدنا چاہتے ہیں انھیں ناقوس کے طور پر استعمال کریں گے اور نماز کے لے بلائیں گے لکڑیوں والے نے میری طرف متوجہ ہو کر کہا : کیا میں تجھے ان لکڑیوں سے بہتر چیز نہ بتاؤں ؟ چنانچہ عبداللہ بن زید (رض) بیدار ہوئے جب کہ سیدنا حضرت عمر ابن خطاب (رض) نے بھی اسی طرح کا خواب دیکھا لیکن عبداللہ (رض) سیدنا حضرت عمر ابن خطاب (رض) سے پہلے حضور اکرم (صلی اللہ علیہ وآلہ وسلم) کی خدمت میں حاضر ہوئے اور سارا واقعہ سنایا : حضور اکرم (صلی اللہ علیہ وآلہ وسلم) نے حکم دیا کہ کھڑے ہوجاؤ اور اذان دو عرض کہا : یا رسول اللہ ! میری آواز اونچی نہیں ہے۔ حکم ہوا کہ یہ کلمات بلال (رض) کو سکھا دو چنانچہ عبداللہ (رض) نے اذان کے کلمات بلال (رض) کو سکھائے اس کے بعد حضرت بلال (رض) اذان دیتے تھے ۔ (رواہ عبدالرزاق)