23200 ۔۔۔ حضرت ابومحذورہ (رض) کہتے ہیں : میں (لڑکوں کی) ایک جماعت کے ساتھ حنین کی طرف گیا ابھی ہم راستے ہی میں تھے کہ حضور اکرم (صلی اللہ علیہ وآلہ وسلم) حنین سے واپس تشریف لائے راستے ہی میں ہماری ان سے ملاقات ہوئی اتنے حضور اکرم (صلی اللہ علیہ وآلہ وسلم) کے مؤذن نے اذان دی ہم نے موذن سے روگردانی کی اور ہم بھی مؤذن کی نقل اتارتے ہوئے چیخنے لگے اور اس کی استہزاء کرنے لگے حضور اکرم (صلی اللہ علیہ وآلہ وسلم) نے ہمارے آواز سن کر ہمیں اپنے پاس بلوایا ، چنانچہ ہمیں آپ (صلی اللہ علیہ وآلہ وسلم) کے سامنے کھڑا کردیا گیا فرمایا : تم میں سے کوئی ہے جس کی آواز بلند ہو میں نے سنی ہے ؟ چنانچہ میرے سب ساتھیوں نے میری طرف اشارہ کیا دراصل انھوں نے سچ بولا چنانچہ آپ (صلی اللہ علیہ وآلہ وسلم) نے سب کو جانے کا کہا اور مجھے روک لیا مجھے حکم دیا کہ کھڑے ہوجاؤ اور نماز کے لیے اذان دو میں بغیر کسی ہچکچاہٹ کے آپ (صلی اللہ علیہ وآلہ وسلم) کے سامنے کھڑا ہوگیا اور آپ (صلی اللہ علیہ وآلہ وسلم) بذات خود مجھے اذان کے کلمات کی تلقین کرتے رہے جو کہ یوں ہیں اللہ اکبر اللہ اکبر اللہ اکبر اللہ اکبر اشھد ان لا الہ الا اللہ اشھد ان لا الہ الا اللہ اشھد ان محمدا رسول اللہ اشھد ان محمدا رسول اللہ حی علی الصلوۃ حی علی الصلوۃ حی علی الفلاح حی علی الفلاح اللہ اکبر اللہ اکبر لا الہ الا اللہ جب میں نے اذان مکمل کی آپ (صلی اللہ علیہ وآلہ وسلم) نے مجھے قریب کیا اور مجھے ایک تھیلی عطاء کی جس میں کچھ دراہم تھے پھر آپ (صلی اللہ علیہ وآلہ وسلم) نے (شفقت سے) اپنا ہاتھ میری پیشانی پر رکھا اور میرے چہرے پر بھی پھیرا پھر میرے سینے پر پھیرا ، حتی کہ دست اقدس میری ناف تک لے آئے پھر فرمایا : اللہ تعالیٰ تجھ میں برکت رکھے اور تجھ پر باران صحت کرے ۔ میں نے عرض کیا : یا رسول اللہ (صلی اللہ علیہ وآلہ وسلم) مجھے مکہ مکرمہ کا مؤذن مقرر کیجئے ۔ حکم ہوا : میں نے تمہیں مکہ کا موذن مقرر کردیا ہے چنانچہ میرے دل میں آپ (صلی اللہ علیہ وآلہ وسلم) کے متعلق جو کچھ ناپسندیدگی تھی وہ جاتی رہی بلکہ میرے دل آپ کی محبت موجزن ہوگئی پھر میں حضرت عتاب بن اسید (رض) کے پاس آیا جو کہ مکہ میں حضور اکرم (صلی اللہ علیہ وآلہ وسلم) کے گورنر تھے میں نے ان کے ساتھ حضور اکرم (صلی اللہ علیہ وآلہ وسلم) کے حکم کی تعمیل میں مکہ مکرمہ میں نماز کے لیے اذان دی۔ (رواہ ابوالشیخ)