24401 ۔۔۔ ” مسند عمر (رض) “ سیدنا حضرت عمر ابن خطاب (رض) فرماتے ہیں ایک دن میں اپنی بیوی کو دیکھ کر نشاط میں آگیا اور اس کا بوسہ لے لیا حالانکہ مجھے روزہ تھا میں نبی کریم (صلی اللہ علیہ وآلہ وسلم) کی خدمت میں حاضر ہوا اور عرض کیا : آج مجھ سے امر عظیم سرزد ہوا ہے (وہ یہ کہ) میں نے بوسہ لے لیا حالانکہ مجھے روزہ ہے حضور اکرم (صلی اللہ علیہ وآلہ وسلم) نے فرمایا : مجھے بتاؤ بحالت روزہ تم پانی سے کلی کرلو ؟ میں نے عرض کیا اس میں کوئی حرج نہیں حضور اکرم (صلی اللہ علیہ وآلہ وسلم) نے فرمایا : پھر بوسہ لینے میں کیا حرج ہے۔ (رواہ ابن ابی شیبۃ ، واحمد العدنی والدارمی والنسائی والشاشی وابن خزیمہ وابن حبان والحاکم والدیلمی فی الفردوس والضیاء المقدسی) کلام : ۔۔۔ امام نسائی (رح) نے اس حدیث کو منکر قرار دیا ہے لیکن حدیث حاکم نے مستدرک 731 میں ذکر کی ہے اور کہا ہے کہ صحیح شرط شیخین ہے اور علامہ ذھبی نے بھی ان کی موافقت کی ہے۔