25640 ۔۔۔ ” مسند علی “ علی بن ربیعہ کی روایت ہے کہ میں نے حضرت علی (رض) کو دیکھا کہ ان کے پاس ایک سواری لائی گئی جب آپ (صلی اللہ علیہ وآلہ وسلم) نے رکابوں میں پاؤں رکھا تو یہ دعا پڑھی ۔ بسم اللہ ، جب سواری پر سیدھے بیٹھ گئے ، یہ دعا پڑھی : ” الحمد للہ الذی سخرلنا ھذا وما کنالہ مقرنین وانا الی ربنا لمنقلبون “۔ پھر تین بار اللہ کی حمد کی اور تین بار تکبیر کہی پھر تین بار سبحان اللہ کہا : پھر یہ دعا پڑھی ۔ ” سبحانک لاالہ الا انت انی ظلمت نفسی فاغفرلی ذنوبی انہ لا یغفرالذنوب الا انت “۔ پھر سیدنا حضرت علی المرتضی (رض) ہنسے ، میں نے پوچھا : اے امیر المؤمنین ! آپ کیوں ہنسے ہیں ؟ سیدنا حضرت علی المرتضی (رض) نے فرمایا : میں نبی کریم (صلی اللہ علیہ وآلہ وسلم) کے پیچھے سوار تھا آپ نے اسی طرح کیا تھا جس طرح میں نے کہا ہے میں نے عرض کیا : یا رسول اللہ ! آپ کیوں ہنسے ہیں ؟ آپ نے فرمایا : رب تعالیٰ اپنے بندے پر تعجب کرتا ہے جب بندہ یہ دعا پڑھتا ہے : رب اغفرلی : اللہ تعالیٰ فرماتا ہے : میرے بندے کو معلوم ہے کہ میرے علاوہ گناہوں کو کوئی نہیں معاف کرسکتا ، ایک روایت میں ہے کہ اللہ تعالیٰ بندے کے لیے ہنستا ہے جب بندہ یہ دعا پڑھتا ہے۔ ” سبحانک لاالہ الا انت انی ظلمت نفسی فاغفرلی ذنوبی انہ لا یغفرالذنوب الا انت “۔ اللہ تبارک وتعالیٰ فرماتا ہے کہ میرے بندے نے پہچان لیا کہ اس کا رب ہے جو اس کی مغفرت کرتا ہے اور اسے عذاب بھی دیتا ہے۔ (رواہ ابو داؤد الطیالسی واحمد بن حنبل ، وعبد ابن حمید والترمذی وقال حسن صحیح والنسائی وابو یعلی وابن خزیمۃ وابن شاھین فی السنۃ وابن مردوبہ والحاکم والبخاری ومسلم والضیاء)