26968 ۔۔۔ ” ایضا “ عبد خیر روایت کی ہے کہ سیدنا حضرت علی المرتضی (رض) کو ایک برتن دیا گیا جس میں پانی تھا اور ایک طشتری تھی آپ (رض) نے دائیں ہاتھ میں برتن پکڑ لیا پھر برتن کو بائیں ہاتھ پر سرنگوں کیا پھر دونوں ہتھیلیاں دھو لیں پھر دائیں ہاتھ میں برتن لیا اور بائیں ہاتھ پر پانی ڈالا پھر دونوں ہتھلیاں دھوئیں ، یہ کام آپ نے تین بار کیا اور اس دوران آپ نے برتن میں ہاتھ داخل نہیں کیا ، آپ بائیں ہاتھ پر برتن کو سرنگوں کرتے پھر دونوں ہتھیلیاں دھوتے پھر دائیں ہاتھ میں پکڑتے اور بائیں ہاتھ پر پانی ڈالتے پھر ہتھلیاں دھو لیتے ، پھر برتن دائیں ہاتھ میں پکڑتے اور بائیں ہاتھ پر پانی ڈالتے پھر ہتھیلیاں دھو لیتے یوں آپ نے تین مرتبہ ہاتھ دھوئے یہ سارا کام کرتے ہوئے آپ نے برتن میں ہاتھ نہیں ڈالا حتی کہ ہاتھ تین مرتبہ دھوئے پھر دایاں ہاتھ برتن میں داخل کیا کلی کی ، ناک میں پانی ڈالا اور بائیں ہاتھ سے ناک جھاڑ لی یہ سب کچھ آپ نے تین تین بار کیا پھر دائیں ہاتھ برتن میں داخل کیا اور تین بار چہرہ دھویا پھر تین بار کہنی تک دایاں ہاتھ دھویا پھر تین بار کہنی تک بایاں ہاتھ دھویا ، پھر دایاں ہاتھ تو برتن میں داخل کیا حتی کہ پورا ہاتھ پانی میں ڈبو لیا پھر ہاتھ نکال لیا اور بائیں ہاتھ سے مل لیا (تاکہ پانی کی تری دوسرے ہاتھ کو بھی پہنچ جائے) پھر دونوں ہاتھ سے ایک بار سر کا مسح کیا ، پھر دائیں ہاتھ سے تین بار دائیں پاؤں پر پانی ڈالا پھر تین بار بائیں ہاتھ سے دایاں پاؤں دھو لیا (اسی طرح دوسرا پاؤں بھی دھو لیا) پھر بایاں ہاتھ داخل کیا اور چلو میں پانی لے کر پی لیا ، پھر فرمایا : یہ ہے نبی کریم (صلی اللہ علیہ وآلہ وسلم) کا طہارت حاصل کرنے کا طریقہ جو شخص نبی کریم (صلی اللہ علیہ وآلہ وسلم) کے وضو کو دیکھنا پسند کرتا ہو تو یہی ہے نبی کریم (صلی اللہ علیہ وآلہ وسلم) کا وضو ۔ (رواہ ابو داؤد الطیاسی وقال صحیح وابن منیع والدارمی وابو داؤد والنسائی وابن خزیمۃ وابو یعلی وابن الجارود وابن حبان والدارقطنی والضیاء)