29460 ۔۔۔ ” مسند صدیق (رض) “۔ حافظ عماد الدین بن کثیر (فی مسند صدیق) حاکم ابو عبداللہ نیشا پوری بکر بن محمد الصریجی (مرد میں) موسیٰ بن حماد صدیق بن غسان علی بن صالح موسیٰ بن عبداللہ بن حسن بن حسن ، ابراہیم بن عمرو بن عبید تیمی قاسم بن محمد کی سند سے حضرت عائشۃ صدیقہ (رض) کی روایت ہے وہ کہتی ہیں کہ میرے والد ماجد (رض) نے نبی کریم (صلی اللہ علیہ وآلہ وسلم) سے احادیث جمع کی تھیں ان کی تعداد پانچ سو تک پہنچتی تھی ایک رات کروٹیں لیتے لیتے گزار دی میں رنجیدہ ہوئی اور عرض کی : آپ کروٹیں لے رہے ہیں کوئی تکلیف تو نہیں یا پھر کیا وجہ ہے ؟ صبح ہوئی فرمایا : اے بیٹی احادیث کا وہ مجموعہ لاؤ جو تمہارے پاس ہے میں مجموعہ لائی پھر آپ (رض) نے آگ منگوائی اور وہ مجموعہ جلا دیا اور فرمایا مجھے خوف ہے کہ میں مرجاؤں اور یہ مجموعہ تمہارے پاس ہی رہ جائے اور اس میں وہ حدیثیں بھی ہوں جن کے راوی پر میں نے بھروسہ اور اعتماد کرلیا ہو اور بات حقیقت میں یوں نہ ہو جیسے اس نے مجھے بیان کی تھی اور یوں غلط بات میں میری تقلید کی جائے ۔ (وقد رواہ القاضی ابو امیۃ الاحوص بن المفضل بن غسان الغلاابی بسندہ) علامہ جلال الدین سیوطی حضرت انس بن مالک (رض) حدیث کے اس مجموعہ کے بارے میں کہتے ہیں ممکن ہے یہ ان حادیث کا مجموعہ ہو جن کا سماع سیدنا حضرت ابوبکر صدیق (رض) نے براہ راست نبی کریم (صلی اللہ علیہ وآلہ وسلم) سے نہ کیا ہو اور دوسرے صحابہ کرام رضوان اللہ تعالیٰ عنہم اجمعین سے بالواسطہ سماع کیا ہو جیسے حدیث جدہ وغیرہ حالانکہ آپ (رض) صحابہ کرام رضوان اللہ تعالیٰ عنہم اجمعین میں سب سے زیادہ حافظ حدیث تھے حتی کہ آپ (رض) کے پاس وہ احادیث بھی تھیں جو کسی دوسرے صحابی (رض) کے پاس نہیں تھیں جیسے ” ہر نبی کو وہیں دفن کیا جاتا ہے جہاں اس کی روح قبض ہوتی ہے “ وغیرہ۔ پھر آپ (رض) نے ناپسند سمجھا کہ جو احادیث میں نے براہ راست نہیں سنیں ان میں میری تقلید کی جائے ۔