2979: جب قیامت کا دن ہوگا انبیاء اور ان کی امتوں کو بلایا جائے گا۔ پھر حضرت عیسیٰ (علیہ السلام) کو بلایا جائے گا اللہ پاک ان کو اپنی نعمتیں یاد دلائیں گے۔ حضرت عیسیٰ (علیہ السلام) ان کا اقرار فرمائیں گے۔ اللہ پاک فرمائیں گے۔
یعیسی ابن مریم اذکر نعمتی علیک وعلی والدتک اذ ایدتک بروح القدس۔
جب خدا (عیسیٰ سے) فرمائے گا : اے عیسیٰ بن مریم ! میرے ان احسانوں کو یاد کر جو میں نے تم پر اور تمہاری والدہ پر کیے جب میں نے روح القدس (جبرئیل) سے تمہاری مدد کی۔
پھر اللہ تعالیٰ فرمائیں گے :
ءانت قلت للناس اتخذونی وامی الھین من دون اللہ۔
کیا تم نے لوگوں کو کہا تھا کہ خدا کو چھوڑ کر مجھے اور میری والدہ کو معبود بنا لو ؟
حضرت عیسیٰ (علیہ السلام) اس کا انکار فرمائیں گے کہ میں نے ہرگز ایسا نہیں کہا تھا۔ پھر نصاری کو بلایا جائے گا اور ان سے سوال کیا جائے گا وہ کہیں گے : جی ہاں انہی نے ہم کو حکم دیا تھا۔ (اس بات کو سن کر غم و غصہ کی وجہ سے) حضرت عیسیٰ (علیہ السلام) کے بال (کھڑے ہو کر) اس قدر لمبے ہوجائیں گے کہ آپ کے سر اور بدن کے ایک ایک بال کو ایک فرشتہ تھامے گا پھر اللہ تعالیٰ کے روبرو ہزار سال تک ان کا حساب کتاب ہوگا حتی کہ حضرت عیسیٰ (علیہ السلام) کی حجت نصاری پر غالب آجائے گی۔ پھر نصاری کے لیے (ایک صلیب بلند کی جائے گی جس کے پیچھے چل کر وہ جہنم میں داخل ہوجائیں گے۔ (ابن عساکر بروایت ابی بردہ بن ابی موسیٰ عن ابی موسیٰ اشعری (رض))