2981: لم یلبسوا ایمانہم بظلم کا یہ مطلب نہیں ہے جو تم کہہ رہے ہو ظلم سے مراد شرک ہے۔ کیا تم نے لقمان (علیہ السلام) کی بات نہیں سنی۔ ان الشرک لظلم عظیم۔ بخاری، مسلم بروایت ابن مسعود (رض)۔
فائدہ : فرمان الہی ہے :
الذین آمنوا ولم یلبسوا ایمانہم بظلم اولئک لہم الامن وھم مہتدون۔
جو لوگ یقین لے آئے اور نہیں ملایا اپنے ایمان میں کوئی ظلم انہی کے واسطے ہے دلجمعی اور وہی ہیں سیدھی راہ پر۔
جب مذکورہ فرمان باری نازل ہوا تو صحابہ نے عرض کیا : یارسول اللہ ! ہم میں سے کون ایسا شخص ہے جس نے اپنی جان پر ظلم نہ کیا ہو ؟ تب آپ (صلی اللہ علیہ وآلہ وسلم) نے فرمایا یہاں ظلم سے شرک مراد ہے یعنی ایمان لانے کے بعد شرک سے کلی اجتناب برتا۔ یونہی حضرت لقمان (علیہ السلام) نے اپنے بیٹے کو فرمایا تھا : اے بیٹے شرک نہ کرنا۔ اللہ کی قسم شرک بہت بڑا ظلم ہے۔ سورة لقمان : 13