29938 ۔۔۔ ” مسند فاروق “ حضرت انس بن مالک (رض) روایت کی ہے کہ ایک دن سیدنا حضرت عمر بن خطاب (رض) ہمیں اہل بدر کا واقعہ سنانے لگے فرمایا : رسول اللہ (صلی اللہ علیہ وآلہ وسلم) نے ہمیں بدر کے اگلے دن مشرکین کی قتل گاہیں دکھائیں اور فرمایا : انشاء اللہ کل یہ فلاں کی قتل گاہ ہوگی ، انشاء اللہ کل یہ فلاں کی قتل گاہ ہوگی چنانچہ آپ نے جس جس جگہ کی تعیین کی تھی کل اسی جگہ پر کفار پچھاڑے گئے میں نے عرض کیا : اس ذات کی جس نے آپ کو برحق مبعوث کیا ہے کفار آپ کی بتائی ہوئی پچھاڑ گاہوں سے ذرہ برابر بھی نہیں چوکے پھر آپ (صلی اللہ علیہ وآلہ وسلم) نے حکم دیا مقتولین کفار کو ایک کنویں میں پھینک دیا گیا پھر آپ (صلی اللہ علیہ وآلہ وسلم) ان کے پاس گئے اور آواز دے کر کہا اے فلاں اے فلاں ! کیا تم نے رب تعالیٰ کا وعدہ سچا پایا میں نے تو اللہ تعالیٰ کا وعدہ سچا پایا ہے میں نے عرض کیا : یا رسول اللہ (صلی اللہ علیہ وآلہ وسلم) آپ ایسے لوگوں سے بات کر رہے ہیں جو مردہ لاشیں ہیں ؟ آپ نے فرمایا : تم ان سے زیادہ میری بات کو نہیں سنتے (یعنی وہ سنتے ہیں) البتہ وہ جواب دینے کی طاقت نہیں رکھتے ۔ (رواہ ابو داؤد الطیالسی وابن ابی شیبۃ واحمد بن حنبل ومسلم والنسائی وابو عوانۃ وابو یعلی وابن جریر)