29939 ۔۔۔ حضرت عبداللہ بن عباس (رض) روایت کی ہے کہ مجھے سیدنا حضرت عمر بن خطاب (رض) نے بدر کا واقعہ سنایا اور کہا بدر کے دن نبی کریم (صلی اللہ علیہ وآلہ وسلم) نے اپنے صحابہ کرام رضوان اللہ تعالیٰ عنہم اجمعین پر نظر دوڑائی ان کی تعداد تین سو سے کچھ زیادہ تھی جبکہ آپ (صلی اللہ علیہ وآلہ وسلم) نے مشرکین کو ایک نظر دیکھا ان کی تعداد ایک ہزار کے لگ بھگ تھی فریقین میں اتنا تفاوت دیکھ کر آپ قبلہ رہو ہو کر بیٹھ گئے آپ نے دونوں ہاتھ اوپر اٹھالیے آپ (صلی اللہ علیہ وآلہ وسلم) نے اپنے اوپر چادر اوڑھ رکھی تھی اور تہبند باندھی ہوئی تھی آپ نے دعا کی اور کہا : یا اللہ اپنا وعدہ پورا فرمایا اللہ ! اپنا وعدہ پورا فرمایا اللہ ! اگر تو نے اسلام کی نام لیوا اس مٹھی بھر جماعت کو ہلاک کردیا زمین پر ہمیشہ ہمیشہ کے لیے تیری عبادت بند ہوجائے گی آپ (صلی اللہ علیہ وآلہ وسلم) برابر رب تعالیٰ سے فریاد اور دعا کرتے رہے حتی کہ محویت میں آپ کی چادر گرگئی سیدنا حضرت ابوبکر صدیق (رض) نے آگے بڑھ کر چادر اٹھائی اور آپ پر اوڑھ دی پھر سیدنا حضرت ابوبکر صدیق (رض) آپ کے پیچھے کھڑے ہوگئے اور عرض کیا : یا نبی اللہ ! رب تعالیٰ سے آپ کا واسطہ کافی ہوچکا اللہ تعالیٰ آپ کے وعدہ کو پورا فرمائے گا اس موقع پر اللہ تعالیٰ نے یہ آیت نازل فرمائی : (آیت)” اذ تستغیثون ربکم فاستجاب لکم انی ممدکم بالف من الملائکۃ مردفین “۔ ترجمہ : ۔۔۔ جب تم اپنے رب سے فریاد کر رہے تھے اللہ تعالیٰ نے تمہاری فریاد سن لی اور تمہاری مدد کے لیے لگاتار ایک ہزار فرشتے نازل فرمائے ۔ چنانچہ جب میدان کارزار گرم ہوا مشرکین شکست خوردہ ہوئے ستر (70) مشرکین مارے گئے اور ستر (70) قیدی ہوئے پھر نبی کریم (صلی اللہ علیہ وآلہ وسلم) نے ابوبکر ، عمر اور علی (رض) سے بدر کے قیدیوں کے متعلق مشورہ لیا سیدنا حضرت ابوبکر صدیق (رض) نے کہا : اے اللہ کے نبی ! یہ قیدی چچا کے بیٹے ہیں رشتہ دار ہیں اور بھائی ہیں میں چاہتا ہوں کہ آپ ان سے فدیہ لے کر انھیں رہا کردیں اس سے ہماری (معاشی) قوت مضبوط ہوگی اور یہ بھی ممکن ہے کہ اللہ تعالیٰ انھیں ہدایت عطا فرما دے اور یہ ہمارے دست وبازو بن جائیں ۔ رسول اللہ (صلی اللہ علیہ وآلہ وسلم) نے فرمایا : اے بن خطاب ! تمہاری کیا رائے ہے ؟ میں نے عرض کیا : بخدا ! میری وہ رائے نہیں جو ابوبکر (رض) کی رائے ہے میری رائے کچھ اس طرح ہے کہ آپ میرے فلاں قریبی رشتہ دار کو میرے حوالے کریں تاکہ میں اس کی گردن اڑا دوں عقیل کو علی کے حوالے کردیں وہ اس کی گردن اڑا دے اور فلاں شخص کو حمزہ کے حوالے کردیں وہ اس کا بھائی ہے اور وہ اس کی گردن اڑا دے تاکہ اللہ تعالیٰ کو معلوم ہوجائے کہ ہمارے دلوں میں زرہ برابر بھی مشرکین کی محبت نہیں بلاشبہ یہ قیدی مشرکین کے روساء ہیں ان کے پیشوا ہیں اور ان کے قائدین ہیں تاہم نبی کریم (صلی اللہ علیہ وآلہ وسلم) سیدنا حضرت ابوبکر صدیق (رض) کی رائے کی طرف مائل ہوگئے اور میری رائے کی طرف توجہ نہ دی چنانچہ مشرکین سے فدیہ لے کر انھیں چھوڑ دیا دوسرے دن علی الصباح میں نبی کریم (صلی اللہ علیہ وآلہ وسلم) کی خدمت میں حاضر ہوا کیا دیکھتا ہوں کہ آپ (صلی اللہ علیہ وآلہ وسلم) بیٹھے ہوئے ہیں اور آپ کے ساتھ سیدنا حضرت ابوبکر صدیق (رض) بھی ہیں اور وہ دونوں رو رہے ہیں میں نے عرض کیا : یا رسول اللہ (صلی اللہ علیہ وآلہ وسلم) ! مجھے بھی خبر دیں آپ اور آپ کا رفیق کیوں رو رہے ہیں ؟ اگر کوئی ایسی بات ہے تو میں بھی رؤوں اگر مجھے رونا نہ آئے کم از کم رونے کی صورت تو بنا لوں گا نبی کریم (صلی اللہ علیہ وآلہ وسلم) نے فرمایا : قیدیوں نے جو فدیہ پیش کیا ہے وہ فدیہ کیا ہے وہ تو عذاب ہے جو اس درخت سے بھی قریب دکھائی دیتا ہے اس موقع پر اللہ تعالیٰ نے یہ آیت نازل فرمائی ۔ (آیت)” ماکان لنبی ان یکون لہ اسری حتی یثخن فی الارض لولا کتاب من اللہ سبق لمسکم فیما اخذتم “۔ کسی نبی کے اختیار میں نہیں کہ اس کے پاس قیدی ہو یہاں تک کہ زمین پر کثرت سے خون نہ بہا دے ۔ اگر اللہ تعالیٰ کا نوشتہ پہلے نہ ہوچکا ہوتا تو لیے ہوئے ہیں اگلے سال مسلمانوں کو اپنے کئے کی سزا بھگتنی پڑی چنانچہ احد میں ستر مسلمان شہید ہوئے اور صحابہ کرام رضوان اللہ تعالیٰ عنہم اجمعین بھاگ گئے ، نبی کریم (صلی اللہ علیہ وآلہ وسلم) کے دانت مبارک شہید ہوئے سر مبارک میں خود کے دندانے کھب گئے جس سے آپ کے چہرے پر خون بہ پڑا پھر اللہ تعالیٰ نے یہ آیت نازل فرمائی ۔ (آیت)” اولما اصابتکم مصیبۃ قد اصبتم مثلیھا قلتم انی ھذا قل ھو من عند انفسکم ان اللہ علی کل شیء قدیر “۔ کیا جب تمہیں مصیبت پیش آئی جبکہ تم دوگنی مصیبت پہنچا چکے ہو تم کہتے ہو یہ مصیبت کہاں سے آگئی کہہ دیجئے یہ تمہاری اپنی طرف سے ہے اور اللہ تعالیٰ ہر چیز پر قادر ہے۔ (رواہ ابن ابی شیبۃ ، واحمد بن حنبل ومسلم وابو داؤد والترمذی وابو عوانۃ وابن جریر وابن المنذر وابن ابی حاتم وابن حبان وابو الشیخ وابن مردویہ وابو نعیم والبیہقی معافی الدلائل)