25 300 ۔۔۔ حضرت عائشۃ صدیقہ (رض) روایت کی ہے کہ سیدنا حضرت ابوبکر صدیق (رض) جب غزوہ احد کو یاد کرتے رو جاتے پھر فرماتے ، غزوہ احد کا دن سارے کا سارا طلحہ کے نام ہے پھر واقعہ سنانے لگتے اور فرماتے غزوہ احد کے دن میں نے سب سے پہلے مال غنیمت سمیٹا میں نے رسول اللہ (صلی اللہ علیہ وآلہ وسلم) کے آگے پیچھے ڈھال بنے ہوئے ایک شخص کو دیکھا میں نے دل ہی دل میں کہا : اللہ کرے یہ طلحہ ہو قطع نظر اس کے کہ یہ کار خیر مجھ سے جاتا رہا میں نے پھر کہا اللہ کرے یہ طلحہ ہو قطع نظر اس کے کہ یہ کار خیر مجھ سے جاتا رہا میں نے پھر کہا اللہ کرے یہ شخص میری قوم کا ہو جبکہ مجھ سے مشرق کی طرف ایک شخص کھڑا تھا میں اسے نہیں جانتا تھا جبکہ میں نبی کریم (صلی اللہ علیہ وآلہ وسلم) کے قریب تھا وہ شخص تیز تیز قدم اٹھا رہا تھا ابھی تک میں اسے پہنچاننے سے قاصر رہا جب وہ اور قریب ہوا کیا دیکھتا ہوں کہ وہ ابو عبیدہ بن الجراح (رض) تھے پھر ہم نبی کریم (صلی اللہ علیہ وآلہ وسلم) کے پاس پہنچ گئے جبکہ آپ (صلی اللہ علیہ وآلہ وسلم) کے دانت مبارک شہید کیے گئے تھے آپ کا چہرہ بھی زخمی تھا آپ کہ چہرہ اقدس میں خود کی دو کڑیاں کھپ گئیں تھیں رسول اللہ (صلی اللہ علیہ وآلہ وسلم) نے فرمایا تم اپنے ساتھی یعنی طلحہ کی خبر لو تاہم آپ کی اس بات کی توجہ نہ دی میں آگے بڑھا تاکہ آپ کے رخسار مبارک سے خود کی کڑیاں نکالوں تاہم جھٹ ابو عبیدہ بولے اور کہا : میں آپ کو اپنے حق کی قسم دیتا ہوں کہ یہ کام میرے لیے چھوڑ دیں میں پیچھے ہٹ گیا ابوعبیدہ (رض) نے ہاتھ سے کڑیاں نکالنا اچھا نہ سمجھا چنانچہ رخسار مبارک پر منہ رکھ کر کڑیاں نکالیں جب پہلی کڑی نکالی اسی کے ساتھ دانت مبارک گرگیا اب میں آگے بڑھا تاکہ دوسری کڑی میں نکالوں مگر اب کی بار بھی ابو عبیدہ بولے : میں اپنے حق کی آپ کو قسم دیتا ہوں کہ یہ بھی میرے لیے چھوڑ دیں چنانچہ ابو عبیدہ (رض) نے دوسری کڑی بھی نکال دی اور دوسرا دانت مبارک بھی گرگیا ابو عبیدہ (رض) یہ کام کرنا اچھی طرح جانتے تھے پھر ہم نے رسول اللہ (صلی اللہ علیہ وآلہ وسلم) کی حالت درست کی پھر ہم طلحہ (رض) کے پاس آگئے کیا دیکھتے ہیں کہ ان کے بدن پر ستر سے زائد زخم ہیں ان میں سے کوئی تیروں کے زخم تھے کوئی نیزوں کے اور کوئی تلواروں کے ان کی ایک انگلی بھی کٹ گئی تھی میں نے ان کی حالت بھی درست کی ۔ (رواہ ابوداؤد الطیالسی وابن سعد وابن السنی والشاشی والبزار والطبرانی فی الاوسط الطبرانی والدارقطنی فی الافراد وابو نعیم فی المعرفۃ وابن عساکر والضیاء)