30076 ۔۔۔ ” مسند انس بن ظھیر “۔ حضرت انس بن مالک (رض) کی روایت ہے کہ احد کے دن حضرت رافع بن خدیج (رض) رسول اللہ (صلی اللہ علیہ وآلہ وسلم) کی خدمت میں حاضر ہوئے آپ نے انھیں چھوٹا سمجھ کر فرمایا : یہ چھوٹا لڑکا ہے آپ نے انھیں واپس کرنا چاہا رافع (رض) کے چچا ظہر بن رافع (رض) نے عرض کیا یا رسول اللہ (صلی اللہ علیہ وآلہ وسلم) میرا بھتیجا اچھا تیر انداز ہے چنانچہ رسول اللہ (صلی اللہ علیہ وآلہ وسلم) نے انھیں اجازت دے دی (رواہ البخاری فی تاریخہ وابن السکن وابن مندہ وابو نعیم فی المعرفۃ اور کہا ہے کہ ظہیر بن رافع (رض) کے نام میں کسی وہمی شخص سے تصحیف ہوئی ہے چونکہ صحیح نام اسید بن ظہرا ہے جبکہ الاصابہ میں ہے کہ درست وصوب وہی بات ہے جو جماعت نے کی ہے اور وہ یہ ہے انس بن ظہیر جو کہ اسید بن ظہیر کے بھائی ہیں۔ حدیث کی سند یوں ہے حسین بن ثابت بن انس بن ظہیر عن اختہ سعدی بنت ثابت عن ابیھا عن جدھا انس (رض))