30084 ۔۔۔ ” مسند حذیفہ بن یمان “ زید بن اسلم کی روایت ہے کہ ایک شخص نے حضرت حذیفہ (رض) سے کہا میں رسول اللہ (صلی اللہ علیہ وآلہ وسلم) کے ساتھ تمہاری صحبت کے متعلق اللہ تعالیٰ سے شکایت کرتا ہوں کہ تم نے نبی کریم (صلی اللہ علیہ وآلہ وسلم) کو پایا ہم نے انھیں نہیں پایا تم نے انھیں دیکھا جبکہ ہم انھیں نہیں دیکھ سکے حضرت حذیفہ (رض) نے کہا : ہم اللہ تعالیٰ سے تمہارے ایمان کی شکایت کرتے ہیں چونکہ تم نے اللہ کو دیکھا نہیں ، بخدا میں نہیں جانتا کہ تم اگر رسول اللہ (صلی اللہ علیہ وآلہ وسلم) کو پالیتے تم کسی حال میں ہوتے ہم نے رسول اللہ (صلی اللہ علیہ وآلہ وسلم) کے ساتھ غزوہ خندق کی وہ طوفانی رات دیکھی ہے جو شدید بارش اور سخت سردی والی رات تھی یکایک رسول اللہ (صلی اللہ علیہ وآلہ وسلم) نے مجمع کو مخاطب کرکے فرمایا : کون جا کر دشمن کی خبر لائے گا اللہ تعالیٰ اسے قیامت کے دن ابراہیم (علیہ السلام) کا رفیق بنائے گا ۔ چانچہ ہم میں سے کوئی شخص بھی تیار نہ ہوا آپ (صلی اللہ علیہ وآلہ وسلم) نے پھر فرمایا : کیا کوئی شخص جا کر دشمن کی خبر لائے گا وہ جنت میں داخل ہوگا بخدا مجمع سے کوئی شخص کھڑا نہ ہوا آپ (صلی اللہ علیہ وآلہ وسلم) نے پھر فرمایا کوئی شخص جائے اور دشمن کی (جاسوسی کرکے) خبر لائے اللہ تعالیٰ اسے جنت میں میرا رفیق بنائے گا چنانچہ اس بار بھی مجمع میں سے کوئی نہ اٹھا ۔ سیدنا حضرت ابوبکر صدیق (رض) نے عرض کیا : یا رسول اللہ (صلی اللہ علیہ وآلہ وسلم) حذیفہ کو بھیج دیں حضرت حذیفہ (رض) کہتے ہیں میں نے کہا تم چپ رہو ، بخدا ! نبی کریم (صلی اللہ علیہ وآلہ وسلم) نے مجھے مخاطب نہیں کیا حتی کہ میں نے عرض کیا : یا رسول اللہ (صلی اللہ علیہ وآلہ وسلم) میرے ماں باپ آپ پر فدا ہوں مجھے قتل ہونے کا ڈر نہیں ، البتہ مجھے گرفتار ہونے کا ڈر ہے ، نبی کریم (صلی اللہ علیہ وآلہ وسلم) نے فرمایا : تم گرفتار نہیں ہوں گے ۔ میں نے عرض کیا : یا رسول اللہ (صلی اللہ علیہ وآلہ وسلم) مجھے جو چاہیں حکم دیں فرمایا : جاؤ اور قریش کے مجمع میں داخل ہوجاؤ اور کہو : اے جماعت قریش ! لوگ چاہتے ہیں کہ کل کہیں : کہاں ہیں قریش کہاں ہیں لوگوں کے راہنما کہاں ہیں لوگوں کے سردار ! آگے بڑھو تم آگے بڑھنا اور جنگ شروع کردینا یوں جنگ تمہارے بل بوتے پر ہوگی پھر تم بنی کنانہ کے پاس جاؤ اور کہو : اے جماعت کنانہ ! لوگ چاہتے ہیں کل کہیں کہ کہاں ہیں بنی کنانہ کہاں ہیں تیر انداز آگے بڑھو تم آگے بڑھنا یوں جنگ میں جا ملنا اور جنگ کا پانسہ تمہارے ہاتھ میں ہوگا پھر تم قیس کے پاس آنا اور کہو : اے جماعت قیس ! لوگ چاہتے ہیں کل کہیں کہ : کہاں ہے قبیلہ قیس جو بےمثال شہسوار ہیں کہاں شہسواروں کے پیشوا آگے بڑھو تم آگے بڑھنا اور جنگ میں جا ملنا یوں جنگ کا پانسہ تمہارے ہاتھ میں ہوگا پھر آپ (صلی اللہ علیہ وآلہ وسلم) نے مجھے تاکید کی کہ اپنے اسلحہ سے کوئی چھیڑ چھاڑ نہیں کرنا حتی کہ تم میرے پاس واپس آجاؤ ۔ حضرت حذیفہ (رض) کہتے ہیں میں قریش کی طرف چل دیا اور لشکر کے درمیان جا پہنچا اور ان کے ساتھ مل کر آگ تاپنے لگا میں نے رسول اللہ (صلی اللہ علیہ وآلہ وسلم) کے بتانے کے مطابق بات کرنے لگا کہ قریش کہاں ہیں ؟ کنانہ کہاں ہیں ؟ قیس کہاں ہیں ؟ حتی کہ سحری کے وقت ابو سفیان کھڑا ہوا اور لات عزی سے مناجات کیں پھر کہا : ہر شخص اپنے پاس بیٹھے ہوئے شخص کی تحقیق کرے کہ کون ہے حضرت حذیفہ (رض) کہتے ہیں : میرے پاس ایک شخص بیٹھا آگ تاپ رہا تھا میں نے پھرتی سے اسے پکڑ لیا تاکہ مجھ سے پہلے وہ مجھے نہ پکڑے میں نے کہا : تو کون ہے اس نے کہاں میں فلاں ہوں میں نے کہا : اچھا اچھا ٹھیک ہے حضرت ابو سفیان نے صبح کے آثار دیکھے کہا : آواز دو کہاں ہیں قریش ؟ کہاں ہیں لوگوں کے راہنما ؟ کہاں ہیں لوگوں کے پیشوا ؟ آگے بڑھو چنانچہ لوگوں نے کہا : یہ بات تو رات کو سنی گئی ہے ابو سفیان نے پھر کہاں کہاں ہیں کنانہ تیر انداز آگے بڑھو لوگوں نے کہا : یہ بات تو رات کو سنی گئی ہے پھر کہا : کہاں ہیں قیس کہاں ہیں شہسوار کہاں ہیں گھوڑے دوڑانے والے آگے بڑھو لوگوں نے کہا : یہ بات تو رات کو سنی گئی ہے ، یہ صورتحال دیکھ کر مشرکین ڈر گئے اور ہمت ہار گئے اللہ تعالیٰ نے تندوتیز آندھی چلائی چنانچہ مشرکین کا کوئی خیمہ نہ رہا جسے ہوا نے الٹ نہ دیا ہو اور ان کا ہر برتن الٹ گیا ہر طرف کوچ کرنے کی صدائیں بلند ہوئیں ۔ حضرت حذیفہ (رض) کہتے ہیں : میں نے ابو سفیان کو دیکھا اس نے اپنے اونٹ پر چھلانگ لگائی اونٹ بندھا ہوا تھا حضرت حذیفہ (رض) کہتے ہیں : بخدا ! اگر رسول اللہ (صلی اللہ علیہ وآلہ وسلم) نے مجھے کچھ نہ کرنے کی تاکید نہ کی ہوتی ہیں ابو سفیان پر تیروں کی بارش کردیتا چونکہ وہ میرے بہت قریب کھڑا تھا چنانچہ قریش رسوا ہو کر چل دئیے میں رسول اللہ (صلی اللہ علیہ وآلہ وسلم) کی خدمت میں واپس لوٹ آیا اور ساری کارگزاری آپ کے گوش گزار کی آپ کار گزاری سن کر ہنس پڑے حتی کہ آپ (صلی اللہ علیہ وآلہ وسلم) کے دانت مبارک دکھائی دینے لگے ۔ (رواہ ابو داؤد وابن عساکر)