30083 ۔۔۔ ” مسند جابر بن عبداللہ “۔ حضرت جابر (رض) کی روایت ہے کہ نبی کریم (صلی اللہ علیہ وآلہ وسلم) اور صحابہ کرام رضوان اللہ تعالیٰ عنہم اجمعین تین دن تک خندق کھودتے رہے اور کھانا چکھا تک نہیں ، صحابہ کرام رضوان اللہ تعالیٰ عنہم اجمعین نے عرض کیا : یا رسول اللہ (صلی اللہ علیہ وآلہ وسلم) خندق میں ایک چٹان آگئی ہے نبی کریم (صلی اللہ علیہ وآلہ وسلم) نے فرمایا : اس پر پانی ڈالو پھر آپ (صلی اللہ علیہ وآلہ وسلم) تشریف لائے اور کدال یا ہتھوڑا لیا پھر بسم اللہ پڑھ کر تین چوٹیں لگائیں چٹان ریزہ ریزہ ہوگئی حضرت جابر (رض) کہتے ہیں : میں نے رسول اللہ (صلی اللہ علیہ وآلہ وسلم) کو قریب ہو کر دیکھا کہ آپ نے پیٹ مبارک پر (بھوک کی شدت کی وجہ سے) پتھر باندھ رکھا ہے۔ (رواہ ابن ابی شیبۃ)