30095 ۔۔۔ حضرت عبداللہ بن عمرو (رض) روایت کی ہے کہ جس دن نبی کریم (صلی اللہ علیہ وآلہ وسلم) غزوہ احزاب سے فارغ ہو کر واپس لوٹے تو صحابہ کرام رضوان اللہ تعالیٰ عنہم اجمعین میں اعلان کیا کہ کوئی شخص بھی نماز نہ پڑھے مگر بنو قریظہ کی بستی میں تاہم بنو قریظہ کے ہاں پہنچنے میں صحابہ کرام رضوان اللہ تعالیٰ عنہم اجمعین کو تاخیر ہوئی اور نماز عصر فوت ہوجانے کا اندیشہ ہوا اس لیے کچھ صحابہ کرام رضوان اللہ تعالیٰ عنہم اجمعین نے رستے ہی میں نماز پڑھ لی جبکہ دوسرے صحابہ کرام رضوان اللہ تعالیٰ عنہم اجمعین نے کہا ہم وہیں پڑھیں گے جہاں کا رسول اللہ (صلی اللہ علیہ وآلہ وسلم) نے ہمیں حکم دیا ہے گو نماز کا وقت نکل جائے چنانچہ نبی کریم (صلی اللہ علیہ وآلہ وسلم) نے فریقین میں سے کسی پر نکیر نہیں کی ۔ (رواہ ابن جریر)