30100 ۔۔۔ ابن اسحاق ، یزید بن رومان اور عبیداللہ بن کعب بن مالک انصاری کی روایت ہے کہ غزوہ خندق کے دن عمرو بن عبدو اپنے لشکر سے نکل کر باہر آیا تاکہ میدان جنگ کا اندازہ کرے جب وہ اور اس کے شہسوار ایک جگہ رکے حضرت علی (رض) نے عمرو سے کہا : اے عمرو ! تم نے اللہ تعالیٰ سے قریش کے لیے عہد کر رکھا تھا کہ اگر تمہیں کوئی شخص دو چیزوں کی دعوت دے تو ان میں سے ایک کو اختیار کرے گا ۔ عمرو (رض) نے کہا جی ہاں ، سیدنا حضرت علی المرتضی (رض) نے کہا میں تمہیں اسلام کی دعوت دیتا ہوں عمرو نے کہا : مجھے اسلام کی حاجت نہیں سیدنا حضرت علی المرتضی (رض) نے فرمایا : پھر میں تمہیں مبارزت (جنگ) کے لیے دعوت دیتا ہوں ، کہا : اے بھتیجے کیوں بخدا مجھے پسند نہیں کہ میں تمہیں قتل کروں ، سیدنا حضرت علی المرتضی (رض) نے فرمایا : بخدا مجھے پسند ہے کہ میں تمہیں قتل کروں ۔ اس پر عمرو کو غیرت آئی اور سیدنا حضرت علی المرتضی (رض) کی طرف چل پڑا چنانچہ دونوں گتم گھتا ہوگئے بلآخر سیدنا حضرت علی المرتضی (رض) نے اس کا کام تمام کردیا ۔ (رواہ ابن جریر)