30119 ۔۔۔ سیدنا حضرت علی المرتضی (رض) روایت کی ہے کہ جب نبی کریم (صلی اللہ علیہ وآلہ وسلم) نے خیبر پر چڑھائی کی تو خیبر کے قریب پہنچ کر آپ نے سیدنا حضرت عمر بن خطاب (رض) کی کمان میں حملہ کے لیے لوگوں کو بھیجا چنانچہ لوگوں نے جم کر حملہ کیا لیکن سیدنا حضرت عمر بن خطاب (رض) اور آپ کے ہمراہیوں کو شکست ہوئی یوں سیدنا حضرت عمر بن خطاب (رض) لوگوں کو کوستے ہوئے اور لوگوں انھیں کوستے ہوئے واپس آئے ۔ نبی کریم (صلی اللہ علیہ وآلہ وسلم) کو یہ حالت ناگوار گزری آپ نے فرمایا : میں ایک ایسے شخص کو امیر مقرر کر کے بھیجوں گا جو اللہ اور اس کے رسول سے محبت کرتا ہے اور اللہ اور اس کا رسول اس سے محبت کرتے ہیں ، وہ اہل خیبر سے لڑائی کرے گا اور اللہ تعالیٰ اس کے ہاتھ پر فتح نصیب فرمائے گا اور بھاگے گا بھی ، لوگوں کو اس شرف کے حاصل کرنے کی طمع ہوئی حتی کہ سر اوپر اٹھا کر دیکھنے لگے ۔ تھوڑی دیر کے بعد نبی کریم (صلی اللہ علیہ وآلہ وسلم) نے فرمایا : علی کہاں ہے ؟ صحابہ کرام رضوان اللہ تعالیٰ عنہم اجمعین نے عرض کیا : انھیں آشوب چشم ہے فرمایا : اسے میرے پاس بلاؤ جب میں آپ کی خدمت میں حاضر ہوا آپ نے میری آنکھیں کھولیں اور آنکھوں میں لعاب ڈال دیا ۔ پھر مجھے جھنڈا دیا میں تیزی سے چل پڑا مجھے ڈر تھا کہ آپ کوئی نئی بات نہ کردی میں اہل خیبر کے پاس آن پہنچا اور ان پر حملہ کردیا مرحب رجز پڑھتا ہوا سامنے آیا میں بھی رجز پڑھتا ہوا اس کے مدمقابل ہوا حتی کہ ہماری مڈبھیڑ ہوئی اللہ تعالیٰ نے میری ہاتھ سے اسے قتل کیا اس کے ساتھی شکست خوردہ ہو کر قلعہ بند ہوگئے اور قلعے کا دروازہ بند کردیا میں دروازے پر آیا اور برابر دروازہ کھولنے میں کوشاں رہا باالآخر اللہ تعالیٰ نے یہ قلعہ فتح کردیا ۔ (رواہ ابن ابی شیبۃ، والبزار وسندہ حسن) ۔ فائدہ : ۔۔۔ نبی کریم (صلی اللہ علیہ وآلہ وسلم) خیبر کے مختلف قلعوں کے فتح کرنے کے لیے اعیان مہاجرین کو جھنڈا دیتے تھے یوں ہر روز جس قلعے کا ارادہ کرتے اللہ تعالیٰ اسے فتح کردیتا چنانچہ قضائے ازل ہی سے یہ مقدر تھا کہ یہ قلعہ سیدنا حضرت علی المرتضی (رض) کے دس راست پر فتح ہوگا ۔ یہی بات یوں پوری ہوئی روایت سے سیدنا حضرت عمر بن خطاب (رض) کی شان کم نہیں ہوتی چنانچہ پہلی روایت اس کا ازالہ ہے اہل خیبر انجام کار سیدنا حضرت عمر بن خطاب (رض) کے ہی دور میں آپ (رض) کے حکم سے یہاں سے نکالے گئے یہ فضیلت تو لامحالہ سیدنا حضرت عمر بن خطاب (رض) کو حاصل ہے رہی یہ بات کہ نبی کریم (صلی اللہ علیہ وآلہ وسلم) نے سیدنا حضرت علی المرتضی (رض) کے متعلق فرمایا کہ وہ اللہ تعالیٰ اور اس کے رسول سے محبت کرتا ہے اور اللہ اور اس کا رسول اس سے محبت کرتے ہیں “ اس سے یہ مطلب نہ لیا جائے کہ معاذ اللہ بقیہ صحابہ کرام رضوان اللہ تعالیٰ عنہم اجمعین اللہ اور اللہ کے رسول سے محبت نہیں کرتے تھے یا اللہ اور اللہ کے رسول کو بقیہ صحابہ کرام رضوان اللہ تعالیٰ عنہم اجمعین سے محبت نہیں تھی آپ نے سیدنا حضرت علی المرتضی (رض) کو یہ کلمات ازروئے قدردانی اور حوصلہ افزائی فرمائے ۔ اس روایت سے روافض غلط غلط نظریات گھڑ لیتے ہیں اس لیے ان نکات پر تنبیہ کرنی پڑی۔