30135 ۔۔۔ حضرت انس بن مالک (رض) روایت کی ہے کہ جب نبی کریم (صلی اللہ علیہ وآلہ وسلم) نے خیبر فتح کیا تو حضرت حجاج بن علاط (رض) نے عرض کیا : یا رسول اللہ ! مکہ میں میرا مال ہے اور میرا اہل و عیال بھی وہیں ہیں میں ان کے پاس جانا چاہتا ہوں اور مجھے کھلی چھٹی دی جائے تاکہ آپ کے متعلق کچھ کہہ کر میں مال لے آؤں ، رسول کریم (صلی اللہ علیہ وآلہ وسلم) نے انھیں اجازت دے دی کہ جو جی چاہے کہو چنانچہ حجاج (رض) اپنی بیوی کے پاس آئے اور کہا : تمہارے پاس جو کچھ ہے جمع کرو میں محمد اور اس کے ساتھیوں کی غنیمتیں خریدنا چاہتا ہوں چونکہ انھیں شکست ہوچکی ہے اور ان کے اموال چھین لیے گئے ہیں یہی افواہ مکہ میں عام کردی مسلمان سن کر کبیدہ خاطر ہوئے جبکہ مشرکین فرحان و شاداں ہوئے حضرت عباس (رض) کو جب خبر ہوئی تو پریشانی کے عالم میں ٹانگوں میں کھڑے ہونے کی سکت باقی نہ رہی پھر اپنے غلام کو حجاج (رض) کی طرف بھیجا اور کہلوا بھیجا کہ تیرا ناس ہو تو نے کیسی خبر لائی ہے اور تو کیا کہتا پھر رہا ہے ؟ حالانکہ اللہ تعالیٰ نے خیر و بھلائی کا وعدہ کر رکھا ہے حجاج (رض) نے جوابا کہا : ابو الفضل (رض) کو سلام کہو اور ان سے کہو کہ مجھ سے کہیں خلوت میں ملیں میرے پاس ایسی خبر ہے جس سے وہ خوش ہوجائیں گے چنانچہ غلام واپس لوٹ آیا اور آتے ہی کہا : اے ابو الفضل خوش ہوجائیں حضرت عباس (رض) خوشی سے اچھل پڑے حتی کہ غلام کی پیشانی چوم لی پھر غلام نے حجاج (رض) کو پیغام دیا حضرت عباس (رض) نے غلام کو انعام میں آزادی سے سرفراز کیا ، پھر طے شدہ امر کے مطابق حجاج (رض) حضرت عباس (رض) کے پاس آئے اور انھیں خبر دی کہ نبی کریم (صلی اللہ علیہ وآلہ وسلم) نے خیبر فتح کرلیا ہے اور اہل خیبر کے اموال غنیمت کی مد میں رکھے ہیں۔ اور مسلمانوں میں ان کے حصے تقسیم کردیئے ہیں نبی کریم (صلی اللہ علیہ وآلہ وسلم) نے صفیہ بنت حیی کو اپنے لیے منتخب کیا ہے پھر صفیہ کو اختیار دیا کہ انھیں آزاد کردیا پھر چاہے تو آپ کی زوجیت میں رہے یا اپنے خاندان سے جا ملے ۔ چنانچہ صفیہ (رض) نے یہ اختیار اپنایا کہ انھیں آزاد کیا جائے اور اپنی زوجیت میں لے لیا جائے البتہ میں نے یہ افواہی تدبیر محض اپنا مال حاصل کرنے کے لیے کی ہے میں نے نبی کریم (صلی اللہ علیہ وآلہ وسلم) سے اجازت لی تو آپ نے مجھے اجازت دے دی لہٰذا آپ تین دن تک یہ خبر مخفی رکھیں پھر جیسے چاہیں افشا کریں چنانچہ حجاج (رض) کی بیوی نے مال ومتاع جمع کیا جس میں زیورات بھی تھے بیوی نے حجاج (رض) کے سپرد کیا پھر حجاج (رض) نے کوچ کرنے کی تیاری کی ۔ تین دن کے بعد حضرت عباس (رض) حجاج (رض) کی بیوی کے پاس گئے اور اس سے کہا : تمہارے خاوند نے کیا کیا بیوی نے کہا وہ تو فلاں دن یہاں سے روانہ ہوگیا ہے اے ابو الفضل اللہ تعالیٰ آپ کو پریشان نہ کرے یقیناً یہ خبر سن کر ہم بھی پریشان ہوئے ہیں عباس (رض) نے کہا : جی ہاں اللہ تعالیٰ نے مجھے بےیارومددگار نہیں چھوڑا جبکہ حالات وہی ہیں جو ہم چاہتے تھے چنانچہ اللہ تعالیٰ نے خیبر کا علاقہ اپنے رسول کو فتح میں دیا ہے رسول اللہ (صلی اللہ علیہ وآلہ وسلم) نے صفیہ کو اپنے لیے منتخب کیا ہے اگر تمہیں اپنے خاوند کی ضرورت ہے تو اس کے پاس چلی جاؤ ، حجاج (رض) کی بیوی نے کہا بخدا ! میں آپ کو سچا سمجھتی ہوں عباس (رض) نے کہا : بخدا میں سچ کہتا ہوں حقیقت وہی ہے جو میں نے تمہیں بتادی ہے پھر حضرت عباس (رض) قریش کی ایک مجلس کے پاس گئے جبکہ قریش کہہ رہے تھے اے ابوالفضل تمہیں خیر و بھلائی ملے عباس (رض) نے جوابا کہا : اللہ کا شکر ہے مجھے صرف اور صرف خیر و بھلائی ہی ملی ہے مجھے حجاج بن علاط نے خبر دی ہے کہ اللہ تعالیٰ نے خیبر کا علاقہ اپنے رسول کے لیے فتح کردیا ہے اور اس کے حصہ بھی مسلمانوں میں تقسیم کردیئے ہیں اور نبی کریم (صلی اللہ علیہ وآلہ وسلم) نے صفیہ کو اپنے لیے منتخب کیا ہے حجاج نے مجھ سے مطالبہ کیا تھا کہ میں تین دن تک حقیقت حال مخفی رکھوں وہ تو اس طرح کی افواہ پھیلا کر اپنا مال یہاں سے لے جانا چاہتا تھا چنانچہ اللہ تعالیٰ نے مسلمانوں کی پریشانی کو مشرکین پر پلٹ دیا اور مسلمان یہ خبر سن کر فرحان وشادان ہوگئے مسلمان جمگٹھا بنا کر حضرت عباس (رض) کے پاس آئے حضرت عباس (رض) نے مسلمانوں کو حقیقت حال سے آگاہ کیا سن کر مسلمان خوش ہوگئے جبکہ اللہ تعالیٰ نے مشرکین کو رسوا کیا ۔ (رواہ احمد بن حنبل وابو یعلی والطبرانی وابو نعیم وابن عساکر وروی النسائی بعضہ) غزوہ حدیبیہ :