30136 ۔۔۔ واقدی کی روایت ہے کہ سیدنا حضرت ابوبکر صدیق (رض) فرمایا کرتے تھے کہ حدیبہ کی فتح سے بڑھ کر اسلام میں کوئی اور فتح عظیم نہیں ۔ لیکن اس دن مسلمانوں کی آراء کوتاہ تھیں بندے تو جلد باز ہیں جبکہ اللہ تعالیٰ جلد بازی سے پاک ہے حتی کہ معاملات رب تعالیٰ کے مرضی کے مطابق ہوئے میں نے سہیل بن عمرو کو حجۃ الوداع کے موقع پر دیکھا کہ وہ ذبح گاہ میں رسول اللہ (صلی اللہ علیہ وآلہ وسلم) کے قریب کھڑا اونٹوں کو آپ کے قریب کررہا تھا جبکہ آپ (صلی اللہ علیہ وآلہ وسلم) اپنے دست اقدس سے اونٹوں کا نحر کر رہے تھے پھر حجام کو بلوا کر سر منڈوایا ، میں نے سہیل کو دیکھا کہ وہ آپ (صلی اللہ علیہ وآلہ وسلم) کے بال مبارک چن رہا تھا میں نے اسے دیکھا آپ کے موئے مبارک وہ اپنی آنکھوں پر لگا رہا تھا جبکہ مجھے حدیبیہ کے دن اس کی وہ بات بھی یاد ہے کہ وہ معاہدہ نامہ کی پیشانی پر بسم اللہ الرحمن الرحیم لکھوانے سے انکار کررہا تھا اور محمد رسول اللہ (صلی اللہ علیہ وآلہ وسلم) لکھوانے سے بھی انکار کررہا تھا ، میں اللہ تعالیٰ کی تعریف کرتا ہوں جس نے سھیل کو اسلام کی ہدایت سے مالا مال کیا ۔ (رواہ ابن عساکر) ۔