30193 ۔۔۔ سیدنا حضرت علی المرتضی (رض) روایت کی ہے کہ نبی کریم (صلی اللہ علیہ وآلہ وسلم) نے مجھے زبیر (رض) اور مقداد (رض) کو بلایا اور فرمایا : جاؤ اور مقام ” روضہ خاخ “ میں تمہیں پالان میں بیٹھی ایک عورت ملے گی اس کے پاس ایک خط ہوگا وہ خط اس سے لیتے آؤ چنانچہ ہم اپنے گھوڑوں کو دوڑاتے روضہ خاخ تک پہنچے ہمیں یہیں پالان میں بیٹھی ایک عورت ملی میں نے کہا : خط نکالو بولی : میرے پاس کوئی خط نہیں ہم نے کہا : خط نکالو ورنہ ہم تمہارے کپڑے اتار دیں گے چنانچہ دھمکی سنتے ہی عورت نے اپنے بالوں سے خط نکال دیا ہم نے خط لیا اور رسول اللہ (صلی اللہ علیہ وآلہ وسلم) کی خدمت میں حاضر ہوگئے ، خط کھولا گیا اس میں یہ مضمون مندرجہ تھا حاطب بن ابی بلتعہ کی جانب سے اہل مکہ کے مشرکین کی طرف خط میں بعض اہم امور کو افشار کیا گیا تھا نبی کریم (صلی اللہ علیہ وآلہ وسلم) نے حضرت حاطب (رض) کو بلاکر فرمایا : اے حاطب یہ کیا ہے ؟ عرض کیا : یا رسول اللہ (صلی اللہ علیہ وآلہ وسلم) جلدی نہ کیجئے میں قریش میں اٹکا ہوا ہوں فی الواقع قریش سے میرا کوئی تعلق نہیں آپ کے ساتھ جو مہاجرین ہیں ان کے اہل مکہ کے ساتھ کوئی نہ کوئی تعلقات ہیں جو ان کے اہل و عیال کی حفاظت کو سامان ہیں تاہم مکہ میں میرا کوئی تعلق دار نہیں جب میرا اہل مکہ سے کوئی خونی رشتہ نہیں میں نے چاہا ان پر کوئی احسان کر دوں تاکہ وہ میرے اہل و عیال کی حفاظت کریں میں نے ایسا کفر کی وجہ سے کیا ہے اور نہ ہی مرتد ہونے کی وجہ سے اور نہ ہی اسلام لانے کے بعد میں کفر سے راضی ہوا ہوں نبی کریم (صلی اللہ علیہ وآلہ وسلم) نے فرمایا : اس نے سچ کہا ہے اتنے میں سیدنا حضرت عمر بن خطاب (رض) بول پڑے (اور رگ فاروقی نے جوش مارا) فرمایا : یا رسول اللہ (صلی اللہ علیہ وآلہ وسلم) مجھے چھوڑئیے میں اس کی گردن اڑاتا ہوں یہ منافق ہے آپ (صلی اللہ علیہ وآلہ وسلم) نے فرمایا : تحقیق حاطب غزوہ بدر میں شریک رہا ہے اے عمر تمہیں کیا معلوم شاید اللہ تعالیٰ نے نظر رحمت سے اہل بدر کو یہ فرما دیا ہے کہ جو چاہے کرو بلاشبہ میں نے تمہاری مغفرت کردی ہے حضرت حاطب (رض) کے متعلق یہ آیت نازل ہوئے : (آیت)” یا ایھا الذین امنوا لا تتخذوا عدوی وعدوکم اولیاء “۔ (الایۃ) (رواہ الحمیدی واحمد بن حنبل والعدنی وعبد بن حمید والبخاری ومسلم وابو داؤد والترمذی وابو عوانۃ وابو یعلی وابن جریر وابن المنذر وابن ابی حاتم وابن حبان وابن مردویہ وابو نعیم والبیہقی معافی الدلائل)