30194 ۔۔۔ ” ایضا “ حارث سیدنا حضرت علی المرتضی (رض) سے روایت نقل کرتے ہیں کہ نبی کریم (صلی اللہ علیہ وآلہ وسلم) نے مکہ پر چڑھائی کرنے کا ارادہ کیا تو یہ راز محض چند صحابہ کرام رضوان اللہ تعالیٰ عنہم اجمعین تک محدود رکھا ان صحابہ کرام رضوان اللہ تعالیٰ عنہم اجمعین میں حضرت حاطب بن ابی بلتعہ (رض) بھی تھے جبکہ لوگوں میں یہ خبر عام کردی گئی کہ آپ حنین کے لیے تیاریاں کر رہے ہیں چنانچہ حاطب (رض) نے اہل مکہ کو خط لکھ بھیجا کہ نبی کریم (صلی اللہ علیہ وآلہ وسلم) تمہارے اوپر چڑھائی کرنا چاہتے ہیں لیکن رسول اللہ (صلی اللہ علیہ وآلہ وسلم) کو اللہ تعالیٰ نے بذریعہ وحی خبر کردی آپ (صلی اللہ علیہ وآلہ وسلم) نے مجھے اور ابو مرثد کو بھیجا ہمارے پاس تیز رفتار گھوڑے تھے آپ نے فرمایا : روضہ خاخ پر پہنچ جاؤ وہاں تمہیں ایک عورت ملے گی اس کے پاس خط ہوگا وہ خط اس سے لے لو ہم چل پڑے اور مقررہ جگہ جا پہنچے اور یہیں ہمیں ایک عورت ملی ، ہم نے عورت سے خط طلب کیا عورت نے کہا : میرے پاس خط نہیں ہے ہم نے عورت کا سامان زمین پر رکھ دیا اور تلاشی لی ہمیں اس کے سازو و سامان سے خط نہ ملا ابو مرثد (رض) بولے : شاید اس کے پاس خط نہ ہو لیکن ہم نے پھر کہا : نبی کریم (صلی اللہ علیہ وآلہ وسلم) نے جھوٹ نہیں بولا اور نہ ہی آپ ہم سے جھوٹ بولتے ہیں ہم نے عورت کو دھمکی دی کہ خط نکالو ورنہ ہم تمہیں ننگی کردیں گے عورت بولی کیا تم اللہ سے نہیں ڈرتے کیا تم مسلمان نہیں ہو ہم نے دوبارہ دھمکی دی خط نکالو ورنہ ہم تجھے ننگی کردیں گے ۔ اب کی بار عورت نے خط اپنے نیفہ سے نکال دیا ایک روایت میں ہے کہ عورت نے شرمگاہ سے خط نکال کردیا چنانچہ ہم خط لے کر نبی کریم (صلی اللہ علیہ وآلہ وسلم) کی خدمت میں حاضر ہوئے خط میں لکھا تھا : حاطب بن ابی بلتعہ کی طرف سے خط کا مضمون سنتے ہی سیدنا حضرت عمر بن خطاب (رض) اٹھ کھڑے ہوئے اور فرمایا : یا رسول اللہ ! حاطب نے اللہ اور اس کے رسول سے خیانت کی ہے مجھے اجازت دیجئے میں اس کی گردن اڑاتا ہوں نبی کریم (صلی اللہ علیہ وآلہ وسلم) نے فرمایا : کیا یہ بدر میں حاضر نہیں ہوا ؟ صحابہ کرام رضوان اللہ تعالیٰ عنہم اجمعین نے عرض کیا : جی ہاں یا رسول اللہ (صلی اللہ علیہ وآلہ وسلم) حاضر ہوا ہے سیدنا حضرت عمر بن خطاب (رض) نے کہا : جی ہاں لیکن اس نے بدعہدی کی ہے اور آپ نے دشمنوں کی پشت پناہی کی ہے رسول کریم (صلی اللہ علیہ وآلہ وسلم) نے فرمایا : شاید اسی لیے اللہ تعالیٰ نے اہل بدر پر نظر رحمت کی ہے اور فرمایا ہے کہ تم جو چاہے کرو یہ سن کر سیدنا حضرت عمر بن خطاب (رض) کی آنکھوں میں آنسو اتر آئے اور فرمایا : اللہ اور اس کے رسول خوب جانتے ہیں پھر رسول اللہ (صلی اللہ علیہ وآلہ وسلم) نے حضرت حاطب (رض) کو بلایا اور فرمایا تم نے ایسا کیوں کیا ہے عرض کیا : یا رسول اللہ (صلی اللہ علیہ وآلہ وسلم) قریش سے میری کوئی قرابت نہیں فقط حلیفانہ تعلقات ہیں میرے اہل و عیال آج کل مکہ میں ہیں جن کا کوئی حامی اور مددگار نہیں بخلاف مہاجرین کے کہ مکہ میں ان کی قریش میں قرابتوں کی وجہ سے ان کے اہل و عیال محفوظ ہیں اس لیے میں نے یہ چاہا کہ جب قریش سے میری کوئی قرابت نہیں تو ان کے ساتھ کوئی احسان کرون جس کے صلہ میں وہ میرے اہل و عیال کی حفاظت کریں خدا کی قسم میں پکا مومن ہوں اور میرا اللہ اور رسول پر ایمان ہے نبی کریم (صلی اللہ علیہ وآلہ وسلم) نے فرمایا : حاطب نے سچ کہا ہے لہٰذا اس کی شان میں بری بات مت کہو اس موقع پر اللہ تعالیٰ نے یہ آیت نازل فرمائی : (آیت) ” یا ایھا الذین آمنوا لا تتخذوا عدوی وعدوکم اولیاء تلقون الیھم بالمودۃ “۔ (رواہ ابویعلی وابن جریر وابن المنذر وابن عساکر)