30242 ۔۔۔ حضرت ابوقتادہ (رض) کی روایت ہے کہ نبی کریم (صلی اللہ علیہ وآلہ وسلم) نے ” سوئے موتہ جیش الامراء “ کو بھیجا ، اور تاکید کی کہ تمہارا امیر زید بن حارثہ ہوگا اگر وہ شہید ہوجائے تو تمہارا امیر جعفر بن ابی طالب ہوگا ، اگر وہ بھی شہید ہوجائے تو عبداللہ بن رواحہ تمہارا امیر ہوگا جعفر (رض) نے بڑھ کر عرض کی : یا رسول اللہ ! میرے ماں باپ آپ پر فدا ہوں میں کیسے مان جاؤں کہ آپ مجھ پر زید بن حارثہ کو امیر مقرر کر رہے ہیں آپ نے فرمایا : تم چلو تمہیں کیا معلوم کس میں اللہ تعالیٰ نے بھلائی رکھی ہے چنانچہ لشکر اسلام روانہ ہوگیا پھر جیسا اللہ نے چاہا وہی انھیں پیش آیا کچھ دنوں بعد رسول اللہ (صلی اللہ علیہ وآلہ وسلم) منبر پر تشریف لے گئے اور فرمایا : لوگوں کو مسجد میں جمع ہوجانے کے لیے اعلان کرو جب لوگ جمع ہوگئے آپ نے فرمایا : یہ چیز کا دروازہ ہے تین بار فرمایا کیا میں تمہیں اس لشکر کے متعلق خبر نہ دوں ۔ چنانچہ ہمارا لشکر منزل بہ منزل روانہ ہوا پھر دشمن سے اس کا مقابلہ ہوا زید شہید ہوگیا لہٰذا تم لوگ اس کے لیے استغفار کرو چنانچہ لوگوں نے حضرت زید (رض) کے لیے استغفار کی فرمایا : پھر جعفر بن ابی طالب نے جھنڈا تھام لیا اس نے بردست حملہ کیا لیکن وہ بھی شہید ہوگیا اس کے لیے استغفار کرو لوگوں نے جعفر (رض) کے لیے استغفار کیا پھر جھنڈا عبداللہ بن رواحہ (رض) نے سنبھال لیا وہ بھی استقلال سے لڑتا رہا لیکن وہ بھی شہید ہوگیا میں اس کی شہادت کی گواہی دیتا ہوں اس کے لیے استغفار کرو ، ، چنانچہ لوگوں نے حضرت عبداللہ بن رواحہ (رض) کے لیے استغفار کیا فرمایا : پھر خالد بن ولید نے جھنڈا سنبھال لیا حالانکہ وہ مقررہ کردہ امرء میں سے نہیں ، وہ اپنے تئیں امیر بنا ہے پھر آپ (صلی اللہ علیہ وآلہ وسلم) نے اپنے دونوں ہاتھ اوپر اٹھائے اور فرمایا : یا اللہ یہ (خالد بن ولید) تیری تلواروں میں سے ایک تلوار ہے تو اس کی مدد کر ، اسی لیے حضرت خالد (رض) کو سیف اللہ کے نام سے یاد کیا جاتا ہے۔ پھر فرمایا : چلو جاؤ اور اپنے بھائیوں کی مدد کرو تم میں سے کوئی شخص بھی پیچھے نہ رہے چنانچہ سخت گرمی میں لوگ پیادہ وسوار ہر حال میں چل پڑے اسی دوران راستے میں ایک رات رسول اللہ (صلی اللہ علیہ وآلہ وسلم) کو سواری پر بیٹھے بیٹھے اونگھ آئی آپ کجاوے میں ایک طرف جھک گئے ، میں نے آکر اپنے ہاتھ سے آپ کو سہارا دیا ، آپ نے میرے ہاتھ کی لمس محسوس کی اور سیدھے ہو کر بیٹھ گئے فرمایا : یہ کون ہے ؟ میں نے عرض کی : میں نے آکر اپنے ہاتھ سے آپ کو سہارا دیا ، آپ نے میرے ہاتھ کی لمس محسوس کی اور سیدھے ہو کر بیٹھ گئے فرمایا : یہ کون ہے ؟ میں نے عرض کی : میں ابو قتادہ ہوں آپ چلتے رہے پھر تھوڑی دیر بعد آپ کو اونگھ آگئی اور کجاوے میں ایک طرف جھک گئے میں نے آکر اپنے ہاتھ سے آپ کو سہارا دیا میرے ہاتھ کی لمس محسوس کی آپ سیدھے ہو کر بیٹھ گئے اور فرمایا کون ہے ؟ میں نے عرض کی : ابو قتادہ ہوں چنانچہ آپ نے دوسری یا تیسری مرتبہ کے بعد فرمایا : میں نے آج رات تمہیں مشقت میں ڈال دیا ہے کہ میں نے عرض کی : میرے ماں باپ آپ پر فدا ہوں ایسا ہرگز نہیں البتہ میں سمجھتا ہوں کہ اونگھ نے مشقت میں ڈال دیا ہے اگر آپ تھوڑی دیر کے لیے رک جائیں تاکہ سواری سے نیچے اتر کر نیند پوری کرلیں ؟ فرمایا مجھے خوف ہے کہ لوگ بےیارومددگار نہ ہوجائیں عرض کی : میرے ماں باپ آپ پر فدا ہوں ایسا ہرگز نہیں ہوگا فرمایا : ہمارے لیے کوئی جگہ تلاش کرو جہاں میں تھوڑی دیر کے لیے نیند کرلوں میں راستے سے ہٹ گیا اور جھاڑیوں کے درمیان مستور جگہ تلاش کرلی میں نے آکر عرض کی یا رسول اللہ (صلی اللہ علیہ وآلہ وسلم) پاس ہی جھاڑیوں میں ایک جگہ ہے اللہ نے رحم فرمایا، میں نے جگہ ڈھونڈلی ، چنانچہ رسول اللہ (صلی اللہ علیہ وآلہ وسلم) اور آپ کے ہمراہی راستے سے الگ ہوگئے اور اس جگہ جا کر آرام کیا پھر ہم ایسے سوئے کہ سورج کی تمازت نے ہماری آنکھ کھولی ہم پشیمانی کے عالم میں اٹھے اور نماز کے دوڑ دھوپ کرنے لگے آپ نے فرمایا : آرام سے آرام سے ذرا سورج کو بلند ہونے دو پھر آپ نے فرمایا : جس نے صبح کی دو رکعتیں پڑھنی ہیں وہ جماعت سے پہلے پڑھ لے چنانچہ جس نے پڑھنی تھیں ان نے پڑھ لیں پھر آپ نے حکم دیا اذان دی گئی اور آپ نے پھر لوگوں کو نماز پڑھائی جب آپ نے سلام پھیرا فرمایا : ہم اللہ تعالیٰ کی تعریف کرتے ہیں کہ ہم دنیا کے کسی کام میں مشغول ہو کر نماز سے غافل نہیں ہوئے البتہ ہماری روحیں اللہ تعالیٰ کے قبضہ قدرت میں ہیں جب چاہتا ہے روحوں کو اپنے قبضہ سے واکر دیتا ہے غور سے سن لو جس شخص کی بھی یہ نماز فوت ہوجائے وہ اسی طرح کی نماز ادا کرے ۔ برتن پانی سے ابل پڑا : پھر صحابہ کرام رضوان اللہ تعالیٰ عنہم اجمعین نے رسول اللہ (صلی اللہ علیہ وآلہ وسلم) سے شدت پیاس کی شکایت کی فرمایا : اے ابوقتادہ : کوئی پیاس نہیں میرے پاس کوزہ لاؤ میں کوزہ لے آیا آپ نے کوزہ گود میں رکھ لیا پھر آپ نے کوزے پر منہ کیا واللہ اعلم آپ نے کوزے میں پھونکا یا نہیں پھر فرمایا : اے ابو قتادہ مجھے چھوٹا پیالہ لا دو چنانچہ میں کجاوے سے چھوٹا سا پیالہ لے آیا آپ نے پیالہ کوزے میں انڈیلا پھر فرمایا : لوگوں کو پانی پلاؤ پھر آپ نے بآواز بلند فرمایا : جس کے پاس برتن ہیں وہ آئے پانی پی لے میں ایک آدمی کے پاس کیا اسے پانی پلایا پھر میں پیالے میں بچا ہوا پانی رسول اللہ (صلی اللہ علیہ وآلہ وسلم) کے پاس لے آیا پھر میں نے حلقہ میں موجود سبھی لوگوں کو پلایا پھر میں بچا ہوا پانی لے آیا میں طمع کرتے ہوئے پیالہ میں دیکھنے لگا کہ اس میں پانی بچا ہے آپ نے پیالے میں اور پانی ڈالا اور فرمایا : پیو میں نے عرض کیا : میرے ماں باپ آپ پر فدا ہوں مجھے شدید پیاس لگی ہوئی ہے آپ نے فرمایا : پیو مجھے رہنے دو چونکہ میں آج قوم کا ساقی ہوں (اور ساقی آخر میں پیتا ہے) پھر آپ نے پیالے میں پانی ڈالا اور خود پیا پھر اور ڈال کر پیا پھر سوار ہوگئے اور ہم بھی سوار ہو کر چل دیئے ۔ آپ نے فرمایا : تم نے اس وقت لوگوں کو کس حال میں پایا جب انھوں نے اپنے نبی کو گم پایا اور پھر نماز کا وقت بھی ہوگیا تھا ؟ میں نے عرض کیا اللہ اور اس کا رسول بہتر جانتے ہیں فرمایا : کیا لوگوں میں ابوبکر اور عمر نہیں اگر لوگ ان دونوں کی اطاعت کرتے رہیں گے تو ہدایت پر قائم رہیں گے اگر ان کی نافرمانی کی تو وہ بھی گمراہ ہوجائیں گے آپ نے یہ بات تین بار فرمائی حتی کہ آپ چل دیئے اور ہم چل دیئے جب ہم نحر الظہرہ کے مقام پر پہنچے تو دیکھتے ہیں کہ لوگ درختوں کے سائے تلے ہیں ہم ان کے پاس آئے مہاجرین کے کچھ لوگوں میں سیدنا حضرت عمر بن خطاب (رض) ہیں ہم نے ان سے پوچھا : جب تم لوگوں نے اپنے نبی کو گم پایا اور نماز کا وقت بھی ہوگیا تم نے کیا کیا ؟ لوگوں نے کہا : بخدا ہم تمہیں خبر دیتے ہیں سیدنا حضرت عمر بن خطاب (رض) آگے بڑھے اور سیدنا حضرت ابوبکر صدیق (رض) سے کہا : اللہ تعالیٰ نے قرآن میں فرمایا ہے : ” انک میت وانھم میتون “ آپ نے بھی مرنا ہے اور لوگوں نے بھی مرنا ہے۔ مجھے نہیں معلوم ہوسکتا ہے اللہ تبارک وتعالیٰ نے اپنے نبی کو اپنے پاس بلایا ہو لہٰذا آپ نماز پڑھائیں میں جا کر ادھر ادھر دیکھتا ہوں اگر میں نے کچھ دیکھا ورنہ میں آپ کے ساتھ مل جاؤں گا چنانچہ نماز کھڑی کردی گئی اور بات یوں ختم ہوگئی۔ (رواہ ابن ابی شیبۃ ، والرویانی ورحالہ ثقات وروری بعضہ البیہقی فی الدلائل)