30243 ۔۔۔ عبداللہ بن جعفر بن ابی طالب کی روایت ہے کہ رسول اللہ (صلی اللہ علیہ وآلہ وسلم) نے ایک لشکر بھیجا اور اس پر حضرت زید بن حارثہ (رض) کو امیر مقرر کیا اور تاکید فرمائی کہ اگر یہ شہید ہوجائے تو تمہارا امیر جعفر بن ابی طالب ہوگا اگر وہ بھی شہید ہوجائے تو عبداللہ بن رواحہ تمہارا امیر ہوگا چنانچہ لشکر منزل بہ منزل آگے بڑھتا گیا اور جھنڈا حضرت زید بن حارثہ (رض) نے لے لیا دشمن سے جنگ ہوئی دلیری سے لڑتے رہے لیکن شہید ہوگئے ان کے بعد حضرت جعفر بن طالب (رض) نے جھنڈا سنبھالا وہ بھی دلیری سے لڑے مگر وہ بھی شہید ہوگئے ان کے بعد حضرت عبداللہ بن رواحہ (رض) نے جھنڈا اٹھا لیا وہ بھی ثابت قدمی سے لڑے مگر وہ بھی شہید ہوگئے ان کے بعد حضرت خالد بن ولید (رض) نے جھنڈا اٹھا لیا اللہ تعالیٰ نے ان کے ہاتھ پر فتح نصیب فرمائی نبی کریم (صلی اللہ علیہ وآلہ وسلم) کو لشکر کی خبر پہنچی آپ گھر سے باہر تشریف لائے آپ نے اللہ تعالیٰ کی حمد وثناء کی پھر فرمایا : بعد ! تمہارے بھائی نے دشمن سے ڈٹ کر مقابلہ کیا ہے جھنڈا زید بن حارثہ نے اٹھایا اور لڑتا رہا بالآخر وہ شہید ہوگیا پھر جعفر نے جھنڈا سنبھالا وہ بھی دلیری سے لڑتا رہا لیکن وہ بھی شہید ہوگیا اس کے بعد عبداللہ بن رواحہ نے جھنڈا اٹھایا اور وہ بھی بہادری سے لڑتے ہوئے شہید ہوگیا پھر جھنڈا اللہ تعالیٰ کی تلواروں میں سے ایک تلوار خالد بن ولید نے سنبھال لیا اور اللہ تعالیٰ نے اس کے ہاتھ پر فتح نصیب فرمائی آپ (صلی اللہ علیہ وآلہ وسلم) نے جعفر کے گھر والوں کو تین دن تک سوگ کرنے کی مہلت دی پھر آپ تین دن کے بعد آئے اور فرمایا آج کے بعد جعفر پر مت رو پھر آپ نے فرمایا میرے پاس میرے بھائی کے بیٹوں کو لے آؤ چنانچہ ہمیں آپ کے پاس لایا گیا ہم یوں لگتے تھے جیسے چھوٹے چھوٹے چوزے ہوں پھر آپ نے حجام کو بلایا اور آپ نے ہمارے سر منڈوائے پھر آپ نے فرمایا : رہی بات محمد کی سو یہ ہمارے چچا ابو طالب کے زیادہ مشابہ ہے رہی بات عون کی یہ صورت اور سیرت میں میرے مشابہ ہے پھر آپ نے میرا ہاتھ پکڑ کر فرمایا : یا اللہ اسے جعفر کا اس کے گھر میں اچھا جانشین بنا دے اور عبداللہ کے ہاتھ کے سودے میں برکت عطا فرما آپ نے تین بار یہ دعا فرمائی ہماری ماں آپ کے پاس آئی اور ہماری یتیمی کا تذکرہ کرنے لگی نبی کریم (صلی اللہ علیہ وآلہ وسلم) نے فرمایا : کیا تمہیں ان بچوں کے فقر وفاقہ کا خوف ہے حالانکہ دنیا و آخرت میں میں خود ان کا ولی ہوں ۔ (رواہ احمد بن حنبل والطبرانی وابن عساکر)