30256 ۔۔۔ ابو بردہ (رض) حضرت ابو موسیٰ اشعری (رض) روایت نقل کرتے ہیں کہ جب رسول اللہ غزوہ حنین سے فارغ ہوئے تو آپ نے ابو عامر (رض) کو لشکر دے کر اوطاس پر چڑھائی کے لیے بھیجا چنانچہ درید بن صمہ سے مقابلہ ہوا درید مقتول ہوا اور اس کے ساتھی شکست کھا کر بھاگ گئے ابو موسیٰ (رض) کہتے ہیں رسول اللہ (صلی اللہ علیہ وآلہ وسلم) نے مجھے بھی ابو عامر کے ساتھ بھیجا تھا بنی جشم کے ایک شخص نے تیر مارا جو ابو عامر (رض) کے گھٹنے میں پیوست ہوگیا میں ابو عامر (رض) کے پاس آیا اور ان سے پوچھا : اے چچا ! آپ کو کس نے تیر مارا ہے انھوں نے اس شخص کی طرف اشارہ کیا میں جھٹ سے اس شخص کے پاس جا پہنچا میں نے کہا : کیا تو عربی نہیں ہے کیا تجھے شرم نہیں آتی ؟ پھر میں نے اس پر حملہ کردیا ہماری تلواریں ٹکرائیں بالآخر میں نے اسے قتل کردیا پھر میں ابو عامر (رض) کے پاس واپس لوٹ آیا اور میں نے کہا : اللہ تعالیٰ نے اس شخص کو قتل کردیا ہے جس نے آپ کو تیر مارا ہے ابو عامر (رض) نے کہا : میرے گھٹنے سے تیر نکلا لو میں نے تیر کھینچ کر نکال دیا پھر کہا : رسول اللہ (صلی اللہ علیہ وآلہ وسلم) کے پاس چلو اور انھیں میری طرف سے سلام کہو بعد سلام کہو : میرے لیے استغفار کریں پھر ابو عامر (رض) نے مجھے لشکر کا امیر بنایا اور تھوڑی دیر بعد اللہ کو پیارے ہوگئے جب میں واپس لوٹا رسول اللہ (صلی اللہ علیہ وآلہ وسلم) ایک گھر میں چارپائی پر تشریف فرما تھے چارپائی کی رسیوں کے نشانات جسم اقدس پر پڑے ہوئے تھے میں نے ابو عامر (رض) کی خبر دی اور عرض کی : ابو عامر (رض) نے آپ سے استغفار کی درخواست کی ہے۔ رسول اللہ (صلی اللہ علیہ وآلہ وسلم) نے پانی مانگا اور وضو کیا پھر دونوں ہاتھ اوپر اٹھائے اور فرمایا : یا اللہ ! اپنے بندے ابو عامر کی مغفرت فرما آپ نے اتنے اوپر ہاتھ اٹھائے کہ میں نے بغلوں کی سفیدی دیکھ لی پھر فرمایا : یا اللہ ، قیامت کے دن ابو عامر کو نور عظیم عطا فرما ، میں نے عرض کی یا رسول اللہ ! میرے لیے بھی دعا کریں فرمایا : یا اللہ ! عبداللہ بن قیس (ابو موسیٰ اشعری (رض) کا نام ہے) کی مغفرت فرما اور قیامت کے دن اسے بہشت میں داخل فرما ابو بردہ کہتے ہیں ، ایک دعا ابو عامر (رض) کے لیے کی اور دوسری دعا ابو موسیٰ کے لیے ۔ (رواہ ابن عساکر)