30269 ۔۔۔ ” مسند صدیق (رض) “ ابن عائذ ولید بن مسلم عبداللہ بن لہیہ ابو اسود کی سند سے عروہ کی روایت ہے کہ جب مسلمان سیدنا حضرت ابوبکر صدیق (رض) کے دست حق پرست پر بیعت کرنے سے فارغ ہوئے تو آپ (رض) نے اسامہ (رض) سے فرمایا : اپنی اس مہم کے لیے چلو جس کا رسول اللہ (صلی اللہ علیہ وآلہ وسلم) تمہیں حکم دیا تھا مہاجرین اور انصار میں سے کچھ حضرات نے آپ (رض) سے بات کی کہ فی الحال حالات کو مد نظر رکھتے ہوئے اسامہ (رض) اور ان کے لشکر کو روک لیں چونکہ ہمیں ڈر ہے کہ عرب ہمارے اوپر پل نہ پڑیں چونکہ جب عرب کے طول وعرض میں رسول اللہ (صلی اللہ علیہ وآلہ وسلم) کی وفات کی خبر پھیلے گی لوگ اسلام سے برگشتہ ہوجائیں گے سیدنا حضرت ابوبکر صدیق (رض) کی شخصیت زبردست معاملہ فہم تھی فرمایا ! میں اس لشکر کو روک لوں جسے رسول اللہ (صلی اللہ علیہ وآلہ وسلم) نے خود بھیجا ہے تب تو میں بڑی جرات کر بیٹھوں گا قسم اس ذات کی جس کے قبضہ قدرت میں میری جان ہے اگر سبھی عرب مجھ پر ٹوٹ پڑیں یہ مجھے اس سے زیادہ محبوب ہے کہ میں اسامہ کے لشکر کو روک لوں جسے رسول اللہ (صلی اللہ علیہ وآلہ وسلم) نے خود بھیجا ہے اے اسامہ تم اپنے لشکر کو لے کر چلو اور وہاں پہنچ جاؤ جہاں جہاد کرنے کا رسول اللہ (صلی اللہ علیہ وآلہ وسلم) نے تمہیں حکم دیا ہے ، یعنی فلسطین اور موتہ کی طرف البتہ اگر تم بہتر سمجھو تو عمر کو اپنے دو میں ان سے مشورہ لوں گا اور میری مدد کریں گے حضرت اسامہ بن زید (رض) نے سیدنا حضرت عمر بن خطاب (رض) کو چھوڑ دیا ۔ نبی کریم (صلی اللہ علیہ وآلہ وسلم) کی رخصت کی خبر سن کر عام عرب دین سے پھرگئے اسی طرح عامہ اہل مشرق غطفان ، بنو اسد اور عامہ اشجع بھی دین اسلام سے برگشتہ ہوگئے البتہ بنی طے اسلام پر ڈٹے رہے ان حالات کے پیش نظر عام صحابہ کرام رضوان اللہ تعالیٰ عنہم اجمعین نے ابوبکر (رض) سے کہا کہ آپ اسامہ اور ان کے لشکر کو روک لیں اور فی الحال انھیں غطفان اور دیگر مرتدین عرب کی سرکوبی کے لیے بھیجیں ابوبکر (رض) نے صاف انکار کردیا اور فرمایا : رسول اللہ (صلی اللہ علیہ وآلہ وسلم) کو تم لوگوں سے جدا ہوئے چند دن ہوئے ہیں آپ (صلی اللہ علیہ وآلہ وسلم) تم سے مشورہ لیتے تھے اس پر تمہارے اوپر کوئی حجت نازل نہیں ہوئی تم مشورہ دیتے رہے میں نے بھی تم سے مشورہ لیا ہے تمہیں جو ہدایت والی راہ ملے اس کا امتثال کرو اللہ تعالیٰ تمہیں اس گمراہی پر جمع نہیں کرے گا قسم اس ذات کی جس کے قبضہ قدرت میں میری جان ہے میں جہاد سے افضل کوئی کام نہیں سمجھتا حتی کہ جو شخص رسول اللہ (صلی اللہ علیہ وآلہ وسلم) کو بکری کی رسی دیتا تھا اور اب وہ اس سے انکار کرے گا میں اس سے بھی جہاد کروں گا چنانچہ سبھی مسلمانوں نے سیدنا حضرت ابوبکر صدیق (رض) کی رائے پر سر جھکا لیا ۔ (رواہ ابن عساکر)