30279 ۔۔۔ ” مسند ابی سائب خباب “ حضرت خریم بن اوس (رض) کی روایت ہے کہ میں نے نبی کریم (صلی اللہ علیہ وآلہ وسلم) کو فرماتے سنا کہ حیرہ کی سرزمین مجھے دکھائی گئی میں نے شیماء بنت نفیلہ ازدیہ کو سفید خچر پر سوار دیکھا ہے اس نے سیاہ چادر اوڑھ رکھی ہے میں نے عرض کی : یا رسول اللہ ! اگر ہم سرزمین حیرہ میں داخل ہوئے اور میں نے شیماء کو اسی حالت میں پالیا تو وہ میری ہوجائے گی آپ نے فرمایا : اچھا وہ تمہاری ہوئی چنانچہ آپ کی رحلت کے بعد عرب اسلام سے پھرگئے لیکن بنی طے کا کوئی شخص بھی مرتد نہ ہوا ہم قیس سے اسلام پر لڑتے رہے ان میں عینیہ بن حصن بھی تھا اسی طرح ہم بنی اسد سے بھی لڑتے رہے ان میں طلحہ بن خویلد فقعسی بھی تھا : پھر خالد (رض) مسلیمہ کذاب کی سرکوبی کے لیے روانہ ہوئے میں بھی ان کے ساتھ تھا جب ہم مسلیمہ کذاب اور اس کے اتباع سے فارغ ہوئے تو ہم نے بقر کے مضافات کی خبر لی کا ظمیہ میں ہر مزجم غفیر کے ساتھ ہمارا مقابل ہوا خالد (رض) نے اسے قتل کردیا اور تمام احوال سیدنا حضرت ابوبکر صدیق (رض) کو لکھ بھیجے سیدنا حضرت ابوبکر صدیق (رض) نے ہرمز کا سازوسامان خالد (رض) کو انعام میں دیا پھر ہم طف کے راستے پر چلے اور حیرہ میں داخل ہوئے اور حیرہ میں سب سے پہلے ہماری جس سے ملاقات ہوئی وہ شیماء بنت نفیلۃ ازدیہ تھی وہ سفید خچر پر سوار تھی اور اس نے سیاہ چادر اوڑھ رکھی تھی جیسا کہ رسول اللہ (صلی اللہ علیہ وآلہ وسلم) نے بیان فرمایا تھا میں فورا شیماء کے ساتھ لپٹ گیا اور میں نے کہا : رسول اللہ (صلی اللہ علیہ وآلہ وسلم) نے یہ عورت مجھے ہبہ کی ہے خالد (رض) نے مجھ سے گواہ طلب کیے میں نے گواہ پیش کیے خالد (رض) نے شیماء میرے حوالے کردی ۔ (رواہ الطبرانی عن حریم بن اوس)