30280 ۔۔۔” مسند ابن عباس “ واقدی ، ابن ابی حبیبہ ، داؤد بن حصین عکرمہ ، ابن عباس ، ومحمد بن صالح ، عاصم بن عمر بن قتادہ ومعاذ بن محمد ، اسحاق بن عبداللہ بن ابی طلحہ واسماعیل بن ابراہیم موسیٰ بن عقبہ ان تمام اسناد سے حدیث مروی ہے اور اس کا اساس ابن ابی حبیبہ کی حدیث ہے روایت یہ ہے کہ رسول کریم (صلی اللہ علیہ وآلہ وسلم) نے حضرت خالد بن ولید (رض) کو چار سو بیس شہسواروں کے لشکر کا امیر مقر کرکے بسوئے تبوک دومۃ الجندل کے بادشاہ اکیدر بن عبد الملک کی سرکوبی کے لیے روانہ کیا اکیدر کا تعلق قبیلہ کندہ سے تھا اور نصرانی تھا خالد (رض) نے عرض کی : یا رسول اللہ ! میں اکیدر کو اپنی گرفت میں کیسے لیے سکتا ہوں حالانکہ وہ کلب کے علاقوں کے بیچوں بیچ ہے ، جبکہ میرے پاس تھوڑی سی جمعیت ہے۔ نبی کریم (صلی اللہ علیہ وآلہ وسلم) نے فرمایا : تم اکیدر کو نیل گائے شکار کرتے پاؤ گے اسے گرفتار کرلینا حضرت خالد (رض) کا نام لے کر چل پڑے ، جب اکیدر کے قلعہ کے قریب پہنچے چاندنی رات تھی اور سماں واضح دکھائی دیتا تھا اکیدر گرمی سے بچاؤ کے لیے قلعہ کی چھت پر بیٹھا تھا اور اس کے ساتھ اس کی بیوی رباب بنت انیف بن عامر کندیہ بھی تھی ، اس کے آس پاس کنیزیں گانا بجا رہی تھیں ، پھر اکیدر نے شراب طلب کی اور شکم سیر ہو کر پی اتنے میں نیل گایوں کا نموار ہوا اور کچھ گائیں قلعہ کے دروازے کو سینگوں سے کھرچنے لگیں اکیدر کی بیوی نے کہا : آج رات کی طرح میں نے کوئی رات نہیں دیکھی جس میں اتنی کثرت سے ہمارے پاس گوشت آیا ہو کیا تم نے ایسی دیکھی ہے ؟ اکیدر نے کہا : نہیں پھر کہنے لگی ان جیسی گایوں کو کون چھوڑتی ہے ؟ اکیدر نے کہا : کوئی نہیں چھوڑتا بخدا ! میں نے اتنی کثرت میں کبھی بھی گائیں نہیں دیکھیں میں نے انہی کے لیے اپنے گھوڑے تیار کر رکھے ہیں جنہیں تیار کرنے میں مجھے ایک ماہ سے زیادہ وقت لگا ہے۔ پھر اوپر چھت سے نیچے اترا اور اپنا گھوڑاتیار کرنے کا حکم دیا گھوڑے پر زیں ڈال دی گئی چنانچہ اس کے ساتھ اس کے گھر کے بھی چند افراد گھوڑوں پر سوار ہوئے اس کے ساتھ اس کا بھائی حسان اور دو غلام بھی تھے چنانچہ شکار کے اوزار لے کر قلعہ سے باہر نکلے جب قلعے سے تھوڑا آگے پہنچے جبکہ خالد (رض) کے شہسوار اکیدر اور اس کے ساتھیوں کو نمایاں دیکھ رہے تھے مسلمانوں کے گھوڑوں نے ہنہنانا بند کردیا حتی کہ کسی گھوڑے نے حرکت تک نہ کی جب اکیدر مسلمانوں کے احاطہ میں آگیا فورا اسے پکڑ لیا جبکہ اس کے بھائی حسان نے لڑنا چاہا لیکن مقتول ہوا جبکہ غلام اور دوسرے ساتھ بھاگ کر قلعہ میں داخل ہوگئے حسان نے دیباج کی قباء پہن رکھی تھی جو سونے کے تروں سے جڑی ہوئی تھی خالد (رض) نے قباء اتارلی اور رسول اللہ (صلی اللہ علیہ وآلہ وسلم) کی خدمت میں ارسال کردی اس قباء کو حضرت عمرو بن امیہ ضمری (رض) لے کر آئے تھے رسول اللہ (صلی اللہ علیہ وآلہ وسلم) نے خالد (رض) کو وصیت کی تھی کہ اکیدر کو زندہ گرفتار کر کے لاؤ اگر وہ جھڑپ پر اتر آئے تو اسے قتل کر دو لیکن بغیر جھڑپ کے اکیدر مسلمانوں کی گرفت میں آگیا حضرت خالد (رض) نے اس سے کہا : میں تمہیں قتل سے پناہ دیتا ہوں کیا تم سے یہ ہوسکتا ہے ہمارے لیے دومہ کا قلعہ کھول دو اور میں تمہیں محفوظ رسول کریم (صلی اللہ علیہ وآلہ وسلم) کے پاس لے جاؤں گا ۔ اکیدر نے اس کی حامی بھر لی اکیدر کو صحابہ کرام رضوان اللہ تعالیٰ عنہم اجمعین نے بیڑیوں میں جکڑ رکھا تھا خالد (رض) اسے قعلہ تک لے گئے اکیدر نے بآواز بلند اہل قلعہ کو پکارا کہ دروازہ کھولو اہل قلعہ نے دروازہ کھولنے کا ارادہ کیا لیکن اکیدر کے بھائی مصاد نے دروازہ کھولنے سے انکار کردیا اکیدر نے خالد (رض) سے کہا : جب تک اہل قلعہ مجھے بیڑیوں میں دیکھیں گے دروازہ نہیں کھولیں گے ، لہٰذا تم میری بیڑیاں کھول دو میں تمہارے لیے اللہ تعالیٰ سے عہد کرتا ہوں کہ دروازہ کھلواؤں گا خالد (رض) نے کہا : چلو میں اس پر تمہارے ساتھ حلم کرتا ہوں اکیدر نے کہا میں دروازہ کھلواتا ہوں بشرطیکہ اہل قلعہ سے تم صلح کرلو خالد (رض) نے حامی بھر لی پھر اکیدر نے کہا : بدل صلح کے لیے اگر چاہو تو مجھے حکم تسلیم کرو چاہو تم خود فیصلہ کرو خالد (رض) نے کہا : تم جو کچھ دو گے ہم اسے قبول کرلیں گے چنانچہ اکیدر نے دو ہزار اونٹ آٹھ سو غلام چار سو زرہیں اور چار سو نیزوں پر صلح کی اور خالد (رض) نے ساتھ یہ شرط رکھیں کہ اکیدر اور اس کا بھائی رسول اللہ (صلی اللہ علیہ وآلہ وسلم) کی خدمت میں حاضر کئے جائیں گے اور آپ (صلی اللہ علیہ وآلہ وسلم) خود ان دونوں کے متعلق فیصلہ کریں گے چنانچہ جب فریقین کا اتفاق ہوگیا اور کی بیڑیاں کھول دی گئیں اکیدر نے قلعے کا دروازہ کھول دیا حضرت خالد (رض) اندر داخل ہوگئے اور اکیدر کے بھائی مصاد کو گرفتار کرکے بیڑیوں میں جکڑ لیا پھر بدل صلح یعنی اونٹ غلام اور اسلحہ لیا پھر مدینہ واپس لوٹ آئے آپ (رض) کے ساتھ اکیدر اور اس کا بھائی مصاد بھی تھا رسول اللہ (صلی اللہ علیہ وآلہ وسلم) نے جزیہ پر اکیدر کے ساتھ صلح کرلی اور اکیدر اور اس کے بھائی کی جان بخشی کی اور ان کا راستہ چھوڑ دیا آپ (صلی اللہ علیہ وآلہ وسلم) نے صلح نامہ بھی لکھوایا اور اس پر اپنے ناخن سے مہر لگائی ۔ (رواہ ابن عساکر)