3028: سورة سبا۔ جب اللہ تعالیٰ اپنے کسی امر (کام) کو وحی فرمانا چاہتے ہیں تو اس کا کلام کرتے ہیں پس جب پروردگار (وحی کا) کلام فرماتے ہیں تو آسمانوں پر سخت کپکپی طاری ہوجاتی ہے بوجہ اللہ تعالیٰ کے خوف کے۔ اور جب آسمان والے اس کلام کو سنتے ہیں تو بےہوش ہوجاتے ہیں اور پھر (ہوش میں آنے کے بعد) سجدے میں گرجاتے ہیں۔ پھر سب سے پہلے حضرت جبرائیل (علیہ السلام) سر اٹھاتے ہیں۔
تب اللہ تعالیٰ ان کو وحی فرماتے ہیں۔ جبرائیل اس وحی کو لے کر فرشتوں کے پاس آتے ہیں۔ جس جس آسمان پر ان کا گزر ہوتا ہے اس کے اہل جبرائیل (علیہ السلام) سے سوال کرتے ہیں۔ ہمارے رب نے کیا فرمایا ؟ اے جبرائیل ! جبرائیل (علیہ السلام) فرماتے ہیں : اللہ نے حق کہا اور وہ بلند شان والی بڑی ذات ہے۔ چنانچہ تمام فرشتے جبرائیل (علیہ السلام) کی طرح ایک دوسرے سے کلام کرتے ہیں۔ پھر جبرائیل (علیہ السلام) اس حکم کو لے کر آسمان و زمین میں جہاں کا حکم ہوتا ہے لے کر جاتے ہیں۔ (ابن جریر ، ابن ابی حاتم، ابو الشیخ فی العظمۃ ، ابن مردویہ، البیہقی فی الاسماء والصفات، الطبرانی فی الکبیر بروایت نواس بن سمعان۔
فائدہ : فرمان الہی ہے :
یعلم مایلج فی الارض وما یخرج منہا وما ینزل السماء وما یعرج فیھا وھو الرحیم الغفور، سورة سباء : 6
جو کچھ زمین میں داخل ہوتا ہے اور جو کچھ اس میں سے نکلتا ہے اور جو آسمان سے اترتا ہے اور جو اس پر چڑھتا ہے سب اس کو معلوم ہے اور وہ مہربان اور بخشنے والا ہے۔
وما ینزل من السماء۔ اور جو آسمان سے اترتا ہے یعنی کائنات میں تصرف کے حوالہ سے ہر حکم خدا کی طرف سے نازل ہوتا ہے اسی کے متعلق مذکورہ حدیث میں تشریح بیان کی گئی ہے۔