3029: اللہ کے پیغمبر حضرت سلیمان (علیہ السلام) جب بھی اپنے جائے نماز میں کھڑے ہوتے اپنے آگے ایک نیا درخت اگا دیکھتے۔ آپ اس سے پوچھتے : تیرا نام کیا ہے ؟ وہ عرض کرتا : یہ نام ہے۔ آپ دریافت فرماتے۔ کس چیز کے لیے تم پیدا کیے گئے ہو ؟ درخت کہتا : فلاں فلاں کام کے لیے مجھے پیدا کیا گیا ہے۔
چنانچہ اگر وہ دوا کے لیے استعمال کا ہوتا تو اس کے لیے لکھ لیتے اور اگر اگانے کے لیے ہوتا تو اس کو اگا لیتے۔ یونہی ایک مرتبہ آپ (صلی اللہ علیہ وآلہ وسلم) نماز ادا فرما رہے تھے کہ سامنے ایک نیا درخت دیکھا آپ نے اس کا نام پوچھا تو اس نے خرنوب بتایا۔ آپ نے پوچھا تم کس کام کے لیے پیدا ہوئے ہو ؟ درخت نے عرض کیا : اس گھر کو ویران اور خراب کرنے کے لیے۔ تب حضرت سلیمان (علیہ السلام) نے بارگاہ الہی میں التجاء کی اے اللہ ! میری موت کو جنوں پر مخفی رکھ ! تاکہ انسانوں کو معلوم ہوجائے کہ جن غیب کا علم نہیں جانتے۔ چنانچہ آپ (صلی اللہ علیہ وآلہ وسلم) نے اس درخت میں سے لاٹھی بنائی اور اس پر ٹیک لگا لی۔ (اور آپ کی روح قبض ہوگئی) پھر دیمک نے آپ کی لاٹھی اندر سے کھوکھلی کردی اور اس میں ایک سال کا عرصہ لگ گیا پھر لاٹھی ٹوٹی اور آپ کا لاشہ زمین پر گرا۔ تب انسانوں کو معلوم ہوا کہ جن اگر غیب کا علم جانتے تو ایک سال تک کام کی مشقت میں مبتلا نہ رہتے۔
چنانچہ جنوں نے دیمک کا شکر ادا کیا۔ پس اسی شکرانہ میں جن اس کے پاس پانی پہنچاتے ہیں جہاں کہیں بھی وہ ہوں۔ (مستدرک الحاکم، ابن السنی، الطب لابی نعیم۔ بروایت ابن عباس (رض))
فائدہ : خرنوب اور خروب کانٹے دار سیب کے درخت کی مانند ایک درخت ہے جس پر سینگوں کی طرح کے بدمزہ پھل لگتے ہیں۔ اس کے پتے ہمیشہ رہتے ہیں۔ جانوروں کے چارے کے لیے بھی اس کا استعمال ہوتا ہے۔ مشرق وسطی میں یہ درخت پایا جاتا ہے۔ کتب تفاسیر میں اس قصے کی تفصیلات ملاحظہ فرمائیں۔
کلام : روایت ضعیف ہے دیکھیے الضعیفۃ 1033