30308: یحییٰ بن عبدالرحمن بن حاطب عن ابیہ عن جدہ حاطب بن ابی بلتعہ کی سند سے حدیث مروی ہے حضرت حاطب بن ابی بلتعہ کہتے ہیں کہ نبی کریم (صلی اللہ علیہ وآلہ وسلم) نے مجھے اسکندریہ کے بادشاہ مقوقس کے پاس بھیجا میں رسول اللہ (صلی اللہ علیہ وآلہ وسلم) کا خط لے کر مقوقس کے پاس گیا مقوقس نے مجھے ایک مکان میں ٹھہرایا میں کئی دنوں تک اس کے پاس رہا پھر مقوقس نے مجھے اپنے پاس بلایا اس نے اپنے امراء اور وزاء بھی اپنے پاس بٹھا رکھے تھے اس نے کہا : میں تم سے کچھ گفتگو کرنا چاہتا ہوں میں چاہتا ہوں کہ تم اسے سمجھو میں نے کہا جو کچھ کہنا ہے کہو مقوقس نے کہا : مجھے اپنے صاحب کے متعلق بتاؤ کیا وہ نبی نہیں ہے ؟ میں نے کہا : جی ہاں وہ نبی ہیں اور اللہ کے رسول ہیں مقوقس نے کہا : جب قوم نے تمہارے رسول کو جلاوطن کیا تو پھر کیا وجہ ہے تمہارا نبی ان کے لیے بددعا کیوں نہیں کرتا ؟ میں نے کہا : کیا عیسی بن مریم (علیہ السلام) نبی نہیں تھے ؟ بولا : میں گواہی دیتا ہوں کہ وہ اللہ کے رسول تھے میں نے کہا پھر کیا وجہ ہے جب ان کی قوم انھیں پکڑ کر سولی پر چڑھانا چاہتی تھی تاہم اللہ تعالیٰ نے انھیں آسمان پر اٹھا لیا انھوں نے اپنی قوم کے لیے بددعا کیوں نہ کی ؟ مقوقس نے کہا : بہت اچھا شاباش بلاشبہ تو حکیم ہے اور حکیم کے پاس سے آیا ہے۔ یہ کچھ تحائف ہیں جو میں تمہارے ہاتھ محمد (صلی اللہ علیہ وآلہ وسلم) کو بھیجنا چاہتا ہوں حاطب (رض) کہتے ہیں : مقوقس نے نبی کریم (صلی اللہ علیہ وآلہ وسلم) کے لیے تین باندیاں ہدیہ میں بھیجیں ان باندیوں میں سے ایک نبی کریم (صلی اللہ علیہ وآلہ وسلم) کے بیٹے ابراہیم (رض) کی ماں بھی ہے نبی کریم (صلی اللہ علیہ وآلہ وسلم) نے ایک باندی ابو جہم بن حذیفہ عدوی کو ہبہ کردی اور پھر تیسری حضرت حسان بن ثابت (رض) کو ہبہ کردی مقوقس نے عمدہ عمدہ کپڑے اور کچھ خوبصورت نوادرات بھی تحفہ میں بھیجے ۔ (رواہ ابونعیم)