30309 ۔۔۔ ” مسند صدیق “ شرجیل بن مسلم ابو امامہ باہلی ، ہشام بن عاص اموی کی سند سے حدیث مروی ہے کہ ہشام بن عاص (رض) کہتے ہیں میرے ساتھ ایک اور شخص کو روم کے بادشاہ ہرقل کے پاس دعوت اسلام کے لیے بھیجا گیا چنانچہ ہم دمشق جا پہنچے اور جبکہ بن ایھم کے پاس ٹھہرے ہم جبلہ کے پاس داخل ہوئے وہ عالیشان تخت پر بیٹھا ہوا تھا ، جبلہ نے اپنا قاصد ہمارے پاس بھیجا تاکہ ہم اس سے بات کریں ہم نے کہا بخدا ! ہم قاصد سے بات نہیں کریں گے ہمیں تو بادشاہ کے پاس بھیجا گیا ہے ، اگر بادشاہ ہمیں اجازت دے تو ہم بات کریں گے ورنہ ہم قاصد سے بات نہیں کرتے قاصد نے جبکہ کو خبر کردی چنانچہ ہمیں بات کرنے کی اجازت دے دی اور جبلہ نے کہا : بات کرو چنانچہ ہشام بن عاص (رض) نے اس سے بات کی اور اسے اسلام کی دعوت دی جبلہ نے سیاہ رنگ کے کپڑے پہن رکھے تھے ہشام (رض) نے کہا : یہ کیسے کپڑے ہیں ؟ میں نے یہ کپڑے پہنے ہیں اور قسم کھائی ہے کہ یہ کپڑے اس وقت تک نہیں اتاروں گا جب تک تمہیں شام سے باہر نہ کر دوں ہم نے کہا : بخدا ! یہ جگہ جہاں تو بیٹھا ہوا ہے ہم اسے تجھ سے چھین لیں گے اور تجھ سے یہ عظیم بادشاہت چھین کر چھوڑیں گے انشاء اللہ ہمیں محمد (صلی اللہ علیہ وآلہ وسلم) نے اس کی خبر دی ہے جبلہ بولا : وہ تم نہیں ہو ، وہ لوگ تو ایسے ہوں گے جو دن کو روزہ رکھیں گے اور رات کو قیام کریں گے تمہارے روزے کا کیا حال ہے ؟ ہم نے اسے روزے کے متعلق خبر دی چنانچہ گھبرا کر اس نے منہ بسور لیا جبلہ نے کہا : چلو جاؤ پھر اس نے ہمارے ساتھ ایک قاصد بھیجا جو ہمیں بادشاہ ہرقل کے پاس لے گیا : چنانچہ جب ہم ہرقل کے شہر کے قریب پہنچے تو ہمارے راہبر نے کہا : تمہارے یہ جانور بادشاہ کے شہر میں داخل نہیں ہوں گے اگر تم چاہو ہم تمہیں برذون گھوڑوں اور خچروں پر سوار کرکے لے جاؤ ہم نے کہا : بخدا ! ہم اپنی سواریوں پر سوار ہو کر داخل ہوں گے چنانچہ دربانوں نے بادشاہ کے پاس پیغام بھیجا کہ عرب کے ایلچی نہیں مانتے وہ اپنی سواریوں پر ہی شہر میں داخل ہونا چاہتے ہیں چنانچہ ہم اپنی سواریوں پر ہی داخل ہوئے ہم نے تلواریں لٹکا رکھی تھیں اور ہم نے سواریاں بادشاہ کے محل کے عین سامنے بٹھائیں بادشاہ ہمیں دیکھ رہا تھا ، ہم نے کلمہ طیبہ ” لاالہ الا اللہ “ پڑھا اور پھر نعرہ تکبیر بلند کیا بخدا ! ہماری آواز سے محل لرز اٹھا اور یوں لگتا تھا جیسے وہ پتا ہے جسے ہوا ادھر ادھر پٹخ رہی ہے بادشاہ نے ہمیں پیغام بھیجوایا کہ تم زبردستی اپنے دین کو ہمارے اوپر نہ پیش کرو بادشاہ نے پیغام بھیجوا کر ہمیں اندر داخل ہونے کو کہا : ہم اندر داخل ہوئے بادشاہ عالیشان بچھونے پر بیٹھا ہوا تھا اور اس کے پاس اس کے امراء وزراء جمع تھے اس کے پاس موجود ہر چیز سرخ تھی اس نے کپڑے بھی سرخ پہن رکھے تھے ہم اس کے قریب ہوئے وہ ہمیں دیکھ کر ہنسا اور کہا : کیا اچھا ہوگا اگر تم مجھے اپنے مروج طریقے سے سلام کرو بادشاہ کے پاس ایک شخص بیٹھا ہوا تھا جو فصیح عربی میں گفتگو کررہا تھا اور بہت باتیں کرتا تھا ہم نے کہا : ہمارا طریقہ سلام وہ ہمارے درمیان مروجہ ہے وہ تیرے لیے حلال نہیں اور جو تمہارا مروجہ طریقہ سلام ہے وہ ہمارے لیے حلال نہیں پوچھا : تمہارا سلام کیا ہے ؟ ہم نے کہا : ہم کہا کرتے ہیں : السلام علیکم “ بادشاہ نے کہا : تم اپنے بادشاہ کو کیسے سلام کرتے ہو ؟ ہم نے کہا : ہم اپنے بادشاہ کو بھی یہ سلام کرتے ہیں کہا : بادشاہ کیسے جواب دیتا ہے ؟ ہم نے کہا : وہ جواب میں یہی کلمات دہراتا ہے بادشاہ نے کہا : تمہارا عظیم کلام کیا ہے ؟ ہم نے کہا : ” لا الہ الا اللہ اور اللہ اکبر “ جب ہم نے یہ کلمہ پڑھا ہرقل بولا : بخدا ! ایسا معلوم ہوتا ہے جیسے یہ کمرہ کپکپا رہا ہے حتی کہ بادشاہ نے چھت کی طرف سر اٹھایا پھر کہا : یہ کلمہ تم جونہی پڑھتے ہو کمرہ کپکپانے لگتا ہے کیا اس کلمے سے تمہارے کمرے بھی کپکپاتے تھے ؟ ہم نے کہا : ہم نے اپنے کمروں میں ایسا ہوتے نہیں دیکھا ہمیں اس کا مشاہدہ صرف تمہارے پاس ہو رہا ہے بادشاہ نے کہا : میں چاہتا ہوں تم یہ کلمہ پڑھتے رہو اور کمرہ جھولتا رہے اور اس سے میں اپنی نصف بادشاہت سے نکل جاؤں ہم نے کہا : وہ کیوں ؟ چونکہ یہ ایسا ہونے سے عین ممکن ہے کہ یہ معاملہ سزاوار نبوت نہ ہو اور تم لوگوں کی جادو گری ہو ۔ پھر ہرقل نے ہم سے مختلف سوالات کیے ہم نے ترکی بہ ترکی ہر ہر سوال کا جواب دیا ۔ پھر ہرقل نے کہا : تمہاری نماز اور روزہ کیا ہے ؟ ہم نے اس کا جواب بھی دیا ، پھر ہرقل نے کہا : اٹھ جاؤ ہم اٹھ کر چل دیئے پھر ہمیں عالیشان مکان میں ٹھہرایا گیا ، ہم اس مکان میں تین دن تک رہے پھر ہمیں اپنے بلایا اور اپنی بات دہرائی ہم نے جواب دہرا دیا ، پھر ہرقل نے مربع شکل کی ایک صندوق نما چیز منگوائی اس میں سونے کے چھوٹے چھوٹے گھروندے رکھے ہوئے تھے اور ان میں دروازے بھی تھے بادشاہ نے ایک دروازہ کھولا اور پھر اس سے ریشم کا ایک دیوان نکالا جو رنگت میں سیاہی مائل تھا اس میں تصویر بنی ہوئی تھی تصویر ایک ایسے شخص کی بنی ہوئی تھی کہ اس کی آنکھیں بڑی بڑی سرینیں موٹی لمبی گردن اس کی داڑھی نہیں تھی اس کے گیسو خدائی تخلیق کا شاہکار تھے بادشاہ نے کہا : کیا تم اسے پہچانتے ہو ؟ ہم نے کہا : نہیں بولا : یہ حضرت آدم (علیہ السلام) ہیں۔ پھر بادشاہ نے ایک اور دروازہ کھولا اور اس سے ریشم کا پرت نکالا یہ بھی سیاہی مائل ریشم کا پرت نکالا اس میں ایک خوبصورت سفید رنگت کی تصویر تھی بخدا ! یہ رسول اللہ (صلی اللہ علیہ وآلہ وسلم) کی تصویر تھی ہم یہ تصویر دیکھ کر رو دئیے بادشاہ پہلے کھڑا ہوا پھر بیٹھ گیا اور کہا : بخدا ! کیا یہ وہی شخص ہے ؟ ہم نے کہا : جی ہاں یہ ہمارے نبی آخر الزمان ہیں گویا ہم آپ کی طرف دیکھ رہے تھے تھوڑی دیر بادشاہ خاموش رہا اور تصویر کی طرف دیکھتا رہا پھر بولا یہ آخری گھرروندہ ہے البتہ میں نے جلدی کردی تاکہ میں تمہارا امتحان لے سکوں پھر ایک اور گھروندے کا دروازہ کھولا : اس سے ریشم کا پرت نکالا اس میں بھی کسی شخص کی تصویر بنی ہوئی تھی یوں لگتا تھا کہ وہ شخص گندم گوں ہے اس کے بال سیدھے نسبتا گھنگھریالے تھے ، آنکھیں اندر دھنسی ہوئی تیز نظر والا چہرے پر ترشی کے آثار نمایاں ، دانت باہم جڑے ہوئے ہونٹ سکڑے ہوئے جیسے یہ شخص غصہ میں ہو بادشاہ نے کہا : کیا تم اس شخص کو پہچانتے ہو ؟ ہم نے کہا : نہیں کہا : یہ حضرت موسیٰ (علیہ السلام) ہیں اس تصویر کے پہلو میں ایک دوسری تصویر بھی تھی جو پہلی تصویر کے مشابہ تھی البتہ اس کے سر پر تیل لگا ہوا تھا پیشانی کشادہ آنکھوں کے درمیان کا حصہ نمایاں تھا کہا کیا تم اسے پہچانتے ہو ؟ ہم نے کہا : نہیں کہا یہ ہارون بن عمران (علیہ السلام) ہیں۔ بادشاہ نے پھر ایک اور دروازہ کھولا اور اس سے سفید ریشم کا پرت نکالا اس میں ایک تصویر بنی ہوئی تھی جس شخص کی تصویر بنی ہوئی تھی وہ گندم گوں تھا بال سیدھے میانہ قد یوں دکھائی دیتا تھا جیسے وہ شخص غصہ میں ہو ، بادشاہ نے کہا : کیا تم اسے جانتے ہو ؟ ہم نے کہا : نہیں بولا : یہ حضرت لوط (علیہ السلام) ہیں ، بادشاہ نے پھر ایک اور دروازہ کھولا اور اس گھروندے سے سفید ریشم کا پرت نکالا اس میں بھی ایک شخص کی تصویر تھی اس کی رنگت سرخی مائل سفیدی تھی ستوان ناک چھوئے رخسار اور چہرہ خوبصورت کہا : کیا تم اسے پہچانتے ہو ؟ ہم نے کہا : نہیں کہا یہ حضرت اسحاق (علیہ السلام) ہیں پھر ایک اور دروازہ کھولا اور اس سے سفید ریشم کا پرت نکالا اس میں ایک تصویر تھی جو اسحاق (علیہ السلام) کی تصویر کے مشابہ تھی البتہ اس کے نیچے ہونٹ پر تل تھا کہا کیا تم اسے جانتے ہو ؟ ہم نے کہا : نہیں کہا یہ حضرت یعقوب (علیہ السلام) ہیں پھر ایک اور دروازہ کھولا اور اس سے سیاہی مائل ریشم کا پرت نکالا اس میں بھی ایک شخص کی تصویر بنی ہوئی تھی جو خوبصورت چہرے والا اور سفید رنگت والا تھا ستواں ناک خوبصورت قدوقامت اس کے چہرے سے نور کے تارے بٹ رہے تھے اس کے چہرے سے خشوع ٹپک رہا تھا کہا کیا تم اسے پہچانتے ہو ہم نے کہا نہیں کہا یہ حضرت اسماعیل (علیہ السلام) ہیں جو تمہارے نبی کے جدامجد ہیں پھر ایک اور دروازہ کھولا اور اس سے سفید ریشم کا پرت نکالا اس میں بھی ایک تصویر بنی ہوئی تھی جو آدم (علیہ السلام) کی تصویر کے مشابہ تھی البتہ اس کا چہرہ سورج کی طرح چمک رہا تھا ، کہا : کیا تم اسے پہچانتے ہو ؟ ہم نے کہا نہیں کہا یہ حضرت یوسف (علیہ السلام) ہیں ، پھر بادشاہ نے ایک اور دروازہ کھولا اور اس سے سفید ریشم کا پرت نکالا اس میں بھی ایک شخص کی تصویر بنی ہوئی تھی جو دیکھنے سے لگتا تھا کہ اس کی رنگت سرخ پنڈلیاں چھوٹی آنکھیں قدرے چندھیائی ہوئی پیٹ نسبتا بڑا میانہ قد اور تلوار لٹکائی ہوئی تھی کیا تم اسے پہچانتے ہو ؟ ہم نے کہا نہیں کہا یہ حضرت داؤد (علیہ السلام) ہیں پھر اس نے ایک اور دروازہ کھولا اور اس سے سفید ریشم کا ایک پرت نکالا اس پر بھی کسی شخص کی تصویر بنی ہوئی تھی جو بڑی سرینوں والی لمبی ٹانگیں اور گھوڑے پر سوار تھا کہا کیا تم اسے پہچانتے ہو ؟ ہم نے کہا نہیں کہا یہ حضرت سلیمان بن داؤد (علیہ السلام) ہیں پھر ایک اور دروازہ کھولا اور اس سے سیاہی مائل ریشم کا پرت نکالا اس پر بھی کسی شخص کی تصویر بنی ہوئی تھی یہ کوئی نوجوان سفید فام شخص تھا داڑھی سیاہ جسم پر بال غیر معمولی تھے آنکھیں خوبصورت چہرہ بھی خوبصورت بادشاہ نے کہا : کیا تم اسے پہچانتے ہو ؟ ہم نے کہا نہیں کہا یہ حضرت عیسیٰ (علیہ السلام) ہیں۔ ہم نے تصویر میں دیکھ لینے کے بعد کہا یہ تصویریں تمہارے پاس کہاں سے آئی ہیں تاکہ ہمیں معلوم ہوجائے کہا کہ واقعی انبیاء کرام (علیہ السلام) کی شکلیں ایسی ہی تھیں چونکہ ہمارے نبی کریم (صلی اللہ علیہ وآلہ وسلم) کی تصویر انہی کی ہمشکل تھی ؟ بادشاہ نے کہا : حضرت آدم (علیہ السلام) نے اپنے رب تعالیٰ سے سوال کیا تھا کہ انھیں انبیاء کرام (علیہ السلام) جو ان کی اولاد میں ہوں گے دکھادے اللہ تعالیٰ نے ان پر یہ تصویریں اتاری تھیں یہ تصویریں آدم (علیہ السلام) کے خزانے میں تھیں اور یہ مغرب شمس میں محفوظ تھیں وہاں سے ذوالقرنین نکال لایا اور اس نے دانیال (علیہ السلام) کو دیں ، پھر کہا : بخدا ! میں اس بات پر خوش ہوں کہ اپنی بادشاہت سے دستبردار ہوجاؤں اور تمہارے امیر کا ادنی غلام بن جاؤں پھر اسی کی غلامی میں مجھے موت آجائے پھر بادشاہ نے ہمیں قیمتی قیمتی تحائف دے کر رخصت کیا پھر ہم سیدنا حضرت ابوبکر صدیق (رض) کی خدمت میں حاضر ہوئے اور سارا ماجرا انھیں سنایا سیدنا حضرت ابوبکر صدیق (رض) سن کر رو دیئے اور کہا : ہرقل بچارہ مسکین ہے اگر اللہ تعالیٰ اس سے بھلائی چاہتا وہ ایسا کر گزرتا پھر فرمایا : ہمیں رسول اللہ (صلی اللہ علیہ وآلہ وسلم) نے خبر دی ہے کہ نصرانی اور یہودی محمد (صلی اللہ علیہ وآلہ وسلم) کی شکل مبارک کو اچھی طرح سے پہچانتے ہیں۔ (رواہ البیہقی فی الدلائل قال ابن کثیر ھذا حدیث جید الاسناد ورجالہ ثقات)