3111: کیا میں تجھے ایسے کلمات نہ سکھاؤں جن کے ساتھ اللہ تجھے نفع دے اور جس کو تو آگے سکھائے اس کو بھی نفع دے۔ جمعہ کی رات کو چار رکعات پڑھ۔ پہلی رکعت میں سورة فاتحہ اور سورة یس تلاوت کر۔ دوسری رکعت میں فاتحہ اور سورة دخان تلاوت کر۔ تیسری رکعت میں فاتحہ اور سورة الم تنزیل سجدہ تلاوت کر اور چوتھی رکعت میں سورة تبارک الذی تلاوت کرت۔ پس جب تو آخری رکعت کے قعدہ میں مشہد سے فارغ ہوجائے تو اللہ کی حمد وثناء کر، تمام پیغمبروں پر درود پڑھ۔ اور مومنین کے لیے استغفار کر۔
پھر یہ دعا پڑھو : اللهم ارحمني بترک المعاصي أبدا ما أبقيتني وارحمني من أن أتكلف مالا يعنيني وارزقني حسن النظر فيما يرضيك عني اللهم بديع السموات والأرض ذا الجلال والإکرام والعزة التي لا ترام أسألك يا اللہ يا رحمن بجلالک ونور وجهك أن تلزم قلبي حفظ کتابک کما علمتني وارزقني أن أتلوه علی النحو الذي يرضيك عني وأسألك أن تنور بالکتاب بصري وتطلق به لساني وتفرج به عن قلبي وتشرح به صدري وتستعمل به بدني وتقويني علی ذلک وتعينني عليه فإنه لا يعينني علی الخير غيرک ولا يوفق له إلا أنت۔
اے اللہ مجھ پر رحم فرما کہ میں گناہوں کو چھوڑ دوں جب تک تو مجھے زندہ رکھے۔ اور مجھ پر رحم فرما کہ میں غیر مفید کاموں میں نہ لگوں اور مجھے ان کاموں میں مشغول رکھ جو تجھ کو مجھ سے راضی کریں۔ اے اللہ ! آسمانوں اور زمین کو پیدا کرنے والے، بزرگی اور عظمت کے مالک اور ایسی عزت کے مالک جو کبھی سرنگوں نہ ہوگی میں تجھ سے سوال کرتا ہوں اے اللہ ! اے رحمن ! تیرے جلال کے طفیل، تیرے چہرے کے نور کے صدقہ یہ کہ تو میرے دل کو اپنی کتاب کے حفظ کرنے میں لازم کر دے۔ جیسے کہ تو نے مجھے وہ کتاب سکھائی ہے اور مجھے توفیق بخش کہ میں اس کی اسی طرح تلاوت کرتا رہوں جس طرح تو مجھ سے راضی ہوجائے۔ اور میں تجھ سے سوال کرتا ہوں کہ اپنی کتاب کے ساتھ میری آنکھوں کو منور کردے میری زبان کو کھول دے، میرے دل کو کھول دے اور میرا سینہ کشادہ کردے، اسی کتاب میں میرے بدن کو مصروف رکھ اور اس کتاب پر مجھ کو قوت دے اور میری مدد فرما دے کیونکہ کسی خیر کے کام پر تیرے سوا کوئی میری مدد نہیں کرسکتا اور تیرے سوا کوئی خیر کی توفیق نہیں بخش سکتا۔
یہ عمل تو تین جمعہ یا پانچ جمعہ یا سات جمعہ تک کر، ان شاء اللہ تو کتاب اللہ کو حفظ کرلے گا اور جو مومن یہ عمل کرے گا انشاء اللہ وہ حفظ کرنے سے پیچھے نہ رہے گا اور اس کا حفظ خطا نہ ہوگا۔ ترمذی ، الکبیر، مستدرک بروایت ابن عباس (رض)۔
کلام : ابن جوزی (رح) نے اس روایت کو موضوعات (خود ساختہ) احادیث میں شمار کیا ہے۔ مولف کتاب الجامع الصغیر علامہ سیوطی (رح) فرماتے ہیں لیکن ان کی یہ بات صائب نہیں ہے۔ نیز اس روایت پر ضعف کا کلام کرتے ہوئے الکشف الالہی 1108 اور ضعیف الجامع 2172 میں یہ روایت ذکر کی گئی ہے۔ واللہ اعلم بالصواب۔