3112: اے ابو الحسن (حضرت علی (رض) کی کنیت) میں تجھے ایسے کلمات نہ سکھاؤں جن کے ساتھ اللہ تجھے نفع دے اور یہ کلمات تو جس کو سکھائے اس کو بھی نفع دے اور جو تو سیکھے تیرے سینے میں ازبر کردے۔
پس جب جمعہ کی رات ہو اگر ہوسکے تو رات کے آخری تیسرے پہر میں کھڑا ہوجا کیونکہ یہ وقت فرشتوں کی حضوری کا ہے اور اس وقت دعا قبول ہوتی ہے اور میرے بھائی یعقوب (علیہ السلام) نے اپنے بیٹوں کو کہا تھا سوف استغفرلکم ربی انہ ہو الغفور الرحیم میں عنقریب تمہارے لیے اپنے رب سے استغفار کروں گا۔ لہٰذا انھوں نے جمعہ کی رات (اس گھڑی) میں دعا کی۔ لیکن اگر اس وقت نہ ہوسکے تو درمیان رات میں کھڑا ہوجا اگر یہ بھی نہ ہوسکے تو شروع رات میں کھڑا ہوجا۔ اور چار رکعات نماز پڑھ۔ پہلی رکعت میں سورة فاتحہ اور یس پڑھ۔ دوسری میں فاتحہ اور سورة دخان پڑھ تیسری میں فاتحہ اور الم تنزیل السجدۃ پڑھ اور چوتھی رکعت میں فاتحہ اور تبارک الذی پڑھ۔ پس جب تو تشہد سے فارغ ہوجائے تو اللہ کی حمد کر اور اچھی طرح اس کی ثناء بیان کر اور مجھ پر اچھی طرح درود بھیج اور تمام انبیاء پر درود بھیج اور اللہ سے تمام مومن مردوں اور عورتوں اور اپنے بھائیوں کے لیے استغفار کر جو تجھ سے پہلے جا چکے ہیں۔ پھر آخر میں یہ دعا پڑھ :
اللهم ارحمني بترک المعاصي ابدا ما أبقيتني وارحمني أن أتكلف ما لا يعنيني وارزقني حسن النظر فيما يرضيك عني اللهم بديع السموات والأرض ذا الجلال والإکرام والعزة التي لا ترام أسألك يا اللہ يا رحمن بجلالک ونور وجهك أن تنور بکتابک بصري وأن تطلق به لساني وأن تفرج به عن قلبي وأن تشرح به صدري وأن تعمل به بدني فإنه لا يعينني علی الحق غيرک ولا يؤتيه إلا أنت ولا حول ولا قوة إلا بالله العلي العظيم۔
اے ابو الحسن۔ اللہ کے حکم سے تم یہ عمل تین یا پانچ یا سات جمعوں تک کرو۔ قسم ہے مجھے حق کے ساتھ مبعوث کرنے والے کی ! یہ عمل کسی مومن کو حفظ سے خطا نہیں کرے گا۔ (ترمذی حسن غریب، الکبیر ابن السنی فی عمل الیوم واللیلۃ، مستدرک و تعقب بروایت ابن عباس (رض)۔
کلام : ابن جوزی (رح) نے اس رایت کو موضوع من گھڑت احادیث میں شمار کیا ہے۔ لیکن ان کا یہ کہنا محل نظر ہے۔ علامہ ذہبی (رح) فرماتے ہیں : یہ حدیث منکر اور شاذ ہے۔ اور مجھے اس کے موضوع ہونے کا اندیشہ ہے۔ مولف کتاب فرماتے ہیں واللہ مجھے اس روایت کی عمدہ سند نے متحیر کردیا ہے۔
اس کو امام ترمذی نے ابن عباس عن علی کے طریق سے روایت کیا ہے۔ حضرت علی (رض) نے عرض کیا : یا رسول اللہ ! آپ پر میرے ماں باپ قربان ہوں یہ قرآن میرے سینے سے نکلا جاتا ہے اور میں اس پر قادر نیں ہوپاتا۔ رسول اللہ (صلی اللہ علیہ وآلہ وسلم) نے فرمایا : میں تجھے ایسے کلمات نہ سکھاؤں جو تجھے بھی اور جس کو سکھائے اسے بھی اللہ ان کے ساتھ نفع بخشے اور جو تو سیکھے اسے تیرے سینے میں مضبوط کردے تو حضرت علی (رض) نے عرض کیا : بالکل یا رسول اللہ !