٣٦٨٦٤۔۔۔ حضرت بشیر بن خصاصیہ (رض) کہتے ہیں : میں رسول اللہ (صلی اللہ علیہ وآلہ وسلم) کی خدمت میں حاضر ہوا آپ نے مجھے اسلام کی دعوت دی پھر فرمایا : تمہارا نام کیا ہے ؟ میں نے کہا : نذیر فرمایا : بلکہ تمہارا نام بشیر ہے مجھے صفہ میں ٹھہرایا چنانچہ جب آپ کے پاس کوئی ہدیہ آتا ہمیں بھی اس میں شریک کرتے اور اگر صدقہ آتا سارا ہمارے حوالے کردیتے ایک دفعہ رات کو آپ گھر سے باہر نکلے میں بھی آپ کے پیچھے پیچھے چل دیا آپ بقیع میں آئے اور فرمایا : السلام علیکم ! اے مومنین کی قوم : ہم بھی آپ کے ساتھ لاحق ہونے والے ہیں ہم اللہ ہی کے لیے ہیں اور اسی کی طرف لوٹ کر جائیں گے ، تم نے بہت بھلائی پالی ہے اور برائی و شر سے پہلے پہلے کوچ کرتے رہے ہو پھر میری طرف متوجہ ہو کر فرمایا : یہ کون ہے ؟ میں نے عرض کیا : میں بشیر ہوں فرمایا : کیا تم راضی نہیں ہو کہ اللہ تعالیٰ نے تمہارے کان تمہارا دل تمہاری آنکھوں کو اسلام کے لیے قبول فرمایا ہے تمام ربیعہ الفرس میں سے جو کہتے ہیں : اگر ہم نہ ہوتے زمین اہل زمین کو لے کر الٹ جاتی میں نے کہا : جی ہاں یا رسول اللہ ! آپ نے پوچھا : تم کیوں آئے ہو میں نے عرض کیا : یا رسول اللہ ! مجھے خوف ہوا آپ کو کوئی گزند نہ پہنچے یا حشرات الارض میں سے کوئی چیز آپ کو تکلیف نہ پہنچائے۔ (رواہ ابن عساکر)