٣٦٨٩٥۔۔۔ حضرت ابو ذر غفاری (رض) فرماتے ہیں : جس چیز نے سب سے پہلے مجھے اسلام کی طرف بلایا وہ یہ ہے کہ ہم تنگدست لوگ تھے ہمیں قحط سالی نے دبوچ لیا میں نے اپنے ساتھ اپنی والدہ اور بھائی انیس کو سوار کیا اور اپنے سسرال کے ہاں سر زمین نجد میں چلا گیا۔ ابو ذر (رض) نے اپنے بھائی اور شاعر درید بن صمہ کی باہمی منافرتی رسہ کشی اور خساء کے متعلق ان دونوں کی رقابت کا ذکر کیا : اور کہا : میں رسول اللہ (صلی اللہ علیہ وآلہ وسلم) کی خدمت میں حاضر ہوا اور آپ کو سلام کیا : آپ نے یکلخت مجھ سے یہ سوالات کر ڈالے : تو کون ہے کس قبیلہ سے تعلق ہے کہاں سے آئے ہو اور کیوں آئے ہو ؟ میں نے آپ کو سارا واقعہ سنانا شروع کردیا آپ نے فرمایا : ابھی تک کہاں سے کھاتے پیتے رہے ہو میں نے عرض کیا : آب زم زم پیتا رہا ہوں فرمایا : بلاشبہ آب زم زم کھانا بھی ہے جو انسان کی پیٹ کو بھر دیتا ہے میں نے عرض کیا : مجھے اجازت دیں تاکہ کچھ کھالوں فرمایا جی ہاں اتنے میں ابوبکر (رض) اپنے گھر میں داخل ہوئے اور طائف کی کشمش لائے آپ ہمارے لیے تھوڑی تھوڑی بھر کشمش ڈالتے رہے اور ہم کھاتے رہے حتیٰ کہ ہم شکم سیر ہوگئے رسول اللہ (صلی اللہ علیہ وآلہ وسلم) نے مجھے فرمایا : اے ابو ذر ! میں نے عرض کیا : جی ہاں فرمایا : میرے لیے میری سر زمین اٹھالی گئی ہے اور وہ کوئی پانی والی زمین ہے میں سمجھتا ہوں کہ وہ سرزمین تہامہ ہی ہوسکتی ہے لہٰذا تم اپنی قوم کے پاس واپس چلے جاؤ اور انھیں بھی اسلام کی دعوت دو ۔ (رواہ ابو نعیم)