٣٦٨٩٤۔۔۔ ابو یزید مدنی ابن عباس (رض) سے روایت نقل کرتے ہیں کہ حضرت ابو ذر غفاری (رض) نے فرمایا : میرا ایک بھائی تھا جس کا نام انیس تھا اور وہ پائے کا شاعر تھا حدیث میں اس کے اسلام لانے کا واقعہ ذکر کیا اور اس میں یہ بھی ہے۔ جب رسول اللہ (صلی اللہ علیہ وآلہ وسلم) میرے پاس سے گزرے اور ابوبکر آپ کے پیچھے پیچھے چلے آرہے تھے میں نے کہا : السلام علیک یا رسول اللہ ! فرمایا : وعلیک و رحمۃ اللہ (تین بار کہا) آپ (صلی اللہ علیہ وآلہ وسلم) نے مجھ سے پوچھا : تم کون ہو ؟ کہاں سے آئے ہو ؟ اور کیوں آئے ہو ؟ میں نے آپ کو سارا واقعہ سنانا شروع کردیا۔ اس کے بعد آپ نے پوچھا : تم کہاں سے کھاتے پیتے ہو ؟ میں نے عرض کیا : آب زمزم پی لیتا ہوں۔ رسول اللہ (صلی اللہ علیہ وآلہ وسلم) نے فرمایا : بلاشبہ آب زم زم کھانے کی چیز بھی ہے اور پینے کی بھی اور یہ بابرکت پانی ہے۔ آپ نے تین بار یہ بات ارشاد فرمائی۔ میں رسول اللہ (صلی اللہ علیہ وآلہ وسلم) کے ساتھ مقیم رہا میں نے اسلام کی تعلیم حاصل کیا ور کچھ قرآن بھی پڑھ لیا پھر میں نے عرض کیا : یا رسول اللہ میں چاہتا ہوں میں اپنے دین اور اسلام کا برسر عام اعلان کروں رسول اللہ (صلی اللہ علیہ وآلہ وسلم) نے فرمایا : مجھے خوف ہے تمہیں کہیں قتل نہ کردیا جائے۔ میں نے عرض کیا : یا رسول اللہ ! اس کے سوا کوئی چارہ کار نہیں گو مجھے قتل ہی کیوں نہ کردیا جائے، چنانچہ آپ (صلی اللہ علیہ وآلہ وسلم) خاموش ہوگئے۔ میں مسجد حرام میں آگیا جب کہ قریش مختلف حلقے بنائے ہوئے گفتگو میں مشغول تھے۔ میں نے کہا : اشھد ان لا الہ اللہ وان محمدا رسول اللہ قریش نے حلقے برخاست کر دئیے اور غصہ میں میری طرف کھڑے ہوگئے مجھے مارنے لگے حتیٰ کہ جب مجھے چھوڑا میں ایسا تھا جیسا کہ سرخ رنگ کا بت ہوتا ہے جس پر منت کے جانوروں کو ذبح کرکے خون کے ساتھ لتھیڑ دیا گیا ہو۔ وہ سمجھے انھوں نے مجھے قتل کردیا ہے تھوڑی دیر بعد مجھے افاقہ ہوا اور میں رسول اللہ (صلی اللہ علیہ وآلہ وسلم) کی خدمت میں حاضر ہوا آپ نے میری کیفیت دیکھ کر فرمایا : کیوں میں نے تمہیں منع نہیں کیا تھا : میں نے عرض کیا : یا رسول اللہ میرے دل میں ایک حاجت تھی جس میں نے پورا کردیا کچھ عرصہ میں رسول اللہ (صلی اللہ علیہ وآلہ وسلم) کے پاس ہی مقیم رہا پھر آپ نے فرمایا : اپنی قوم کے پاس واپس چلے جاؤ اور جب تمہیں میرے غلبہ کی خبر ہو میرے پاس آجانا۔ (رواہ ابو نعیم)