٣٧٧٣٧۔۔۔ ابن ابی ملیکہ کی روایت ہے کہ حضرت علی بن ابی طالب (رض) نے ابوجہل کی بیٹی کو پیغام نکاح بھیجا حتیٰ کہ نکاح کا وعدہ کرلیا گیا حضرت فاطمہ (رض) کو خبر ہوئی انھوں نے اپنے والد نبی کریم (صلی اللہ علیہ وآلہ وسلم) کو بتایا اور عرض کیا : لوگوں کا خیال ہے کہ آپ اپنی بیٹیوں کے لیے غصہ نہیں کرتے اور یہ ہے ابوالحسن اس سے ابوجہل کی بیٹے کو پیغام نکاح بھیجا ہے اور نکاح کا وعدہ بھی کرلیا گیا ہے۔ نبی کریم (صلی اللہ علیہ وآلہ وسلم) کھڑے ہوئے حمد ثنا کے بعد ابوالعاص کا ذکر کیا اور اس کے دامادی رشتہ کی تعریف کی پھر فرمایا : فاطمہ (رض) تو میرا گوشہ جگر ہے مجھے خوف ہے تم اگر آزمائش میں نہ ڈال دو ۔ اللہ کی قسم اللہ کے رسول کی بیٹی اور اللہ کے دشمن کی بیٹی کسی شخص کے نکاح میں جمع نہیں ہوسکتیں ۔ چنانچہ بعد میں اس نکاح سے سکوت کرلیا اور ترک کردیا گیا۔ (رواہ عبدالرزاق)