٣٧٨٢٣۔۔۔ اسیر بن جابر سے مروی ہے کہ حضرت عمر بن خطاب (رض) کے پاس جب اہل یمن کی امداد آئی تو آپ (رض) نے ان (اہل یمن) سے پوچھا : کیا تمہارے ساتھ اویس بن عامر بھی ہیں ؟ پھر (ان کے بتانے پر) آپ اویس (رح) کے پاس تشریف لائے اور ان سے پوچھا : کیا آپ اویس ہیں ؟ حضرت اویس (رح) بولے : جی ہاں۔ حضرت عمر (رض) نے پوچھا : کیا آپ کو برص کی بیماری تھی پھر وہ صحیح ہوگئی مگر پھر بھی ایک درہم کی جگہ باقی رہ گئی ہے ؟ حضرت اویس (رح) نے عرض کیا : جی ہاں۔ حضرت عمر (رض) نے پوچھا : کیا آپ کی والدہ (حیات) ہیں ؟ عرض کیا : جی ہاں۔ تب حضرت عمر (رض) نے ارشاد فرمایا : میں نے رسول اکرم (صلی اللہ علیہ وآلہ وسلم) سے سنا ہے، آپ (صلی اللہ علیہ وآلہ وسلم) نے فرمایا تھا : تمہارے پاس اہل یمن کی امداد کے ساتھ اویس بن عامر آئیں گے جن کا تعلق قبیلہ مراد کی قرن شاخ سے ہوگا۔ ان کو پہلے برص کی بیماری ہوئی ہوگی جو ایک درہم کے سوا صحیح ہوچکی ہوگی ان کی والدہ ہوگی جن کے ساتھ وہ (بہت) نیکی کرنے والے ہوں گے۔ اگر وہ اللہ پر قسم کھالیں تو اللہ ان کی قسم کو پوری فرمادیں گے۔
(اور حضور (صلی اللہ علیہ وآلہ وسلم) نے فرمایا تھا) اگر تو ان سے اپنے لیے استغفار کرواسکے تو ضرور کرا لینا۔
پھر حضرت عمر (رض) نے ان سے استغفار کی درخواست کی تو حضرت اویس (رح) نے ان کے لیے استغفار کیا۔
پھر حضرت عمر (رض) نے ان سے پوچھا : اب آپ کا کہاں جانے کا قصد ہے ؟
انھوں نے عرض کیا : کوفہ جانے کا قصد ہے۔ حضرت عمر (رض) نے پوچھا : کیا میں آپ کے لیے کوفہ کے گورنر کو خط نہ لکھ دوں ؟ وہ آپ کے ساتھ اچھا سلوک کرے گا ؟ حضرت اویس (رح) اللہ علیہ نے فرمایا : نہیں، میں عام گمنام لوگوں میں رہنا پسند کرتا ہوں۔
پھر آئندہ سال کوفہ کے اشراف لوگوں میں سے ایک شخص حج پر آیا تو حضرت عمر (رض) سے اس کی ملاقات ہوئی۔ حضرت عمر (رض) نے اس سے اویس (رح) کے متعلق پوچھا کہ جب تم آئے تو وہ کس حال میں تھے ؟ کوفی نے جواب دیا : میں نے جب ان کو چھوڑا تو ان کے گھر کا حال برا تھا اور وہ بےسروسامانی کی حالت میں تھے۔ حضرت عمر (رض) نے (وہی حدیث سنائی اور ) فرمایا : میں نے رسول اللہ (صلی اللہ علیہ وآلہ وسلم) سے سنا تھا : تمہارے پاس اہل یمن کی امداد کے ساتھ اویس بن عامر (رح) آئیں گے جو قبیلہ مراد کی قرن شان سے ہوں گے۔ ان کو برص لاحق ہوگا پھر وہ اس سے شفایاب ہوجائیں گے سوائے ایک درہم کی جگہ کے۔ ان کی والدہ ہوگی جس کے ساتھ وہ بہت نیکی برتنے والے ہوں گے۔ اگر وہ اللہ پر قسم کھالیں تو اللہ ان کی قسم کو پورا فرمادیں گے۔ اگر تم سے ہوسکے کہ ان سے استغفار کرواؤ تو ضرور کرالینا۔
چنانچہ وہ کوفی شخص واپسی میں حضرت اویس (رح) کے پاس حاضر ہوا اور عرض کیا۔ میرے لیے استغفار
کر دیجئے۔ حضرت اویس (رح) نے فرمایا : تم مبارک سفر سے نئے نئے لوٹے ہو تم میرے استغفار کرو۔ کوفی نے عرض کیا : آپ میرے لیے استغفار کر دیجئے۔ تب حضرت اویس (رح) نے اس شخص سے پوچھا : کیا تو حضرت عمر (رض) سے ملا تھا ؟ اس نے اثبات میں جواب دیا۔ تب حضرت اویس (رح) نے اس کے لیے اللہ سے مغفرت کی دعا۔
اب لوگوں کو ان کے مرتبے کا علم ہوگیا جس کی و جہ سے وہ وہاں سے کہیں اور کوچ کرگئے۔ (ابن سعد، مسلم، ابوعوانۃ، الرویانی، مسند ابی یعلی، حلیۃ الاولیاء، الدلائل البیھقی)