٣٧٨٢٤۔۔۔ اسیر بن جابر سے مروی ہے کہ کوفہ میں ایک محدث تھا جو ہمیں حدیث بیان کرتا تھا۔ جب وہ حدیث سے فارغ ہوجاتا تو لوگ منتشر ہوجاتے، جب کہ ایک گروہ پیچھے بیٹھا رہ جاتا تھا۔ ان میں ایک آدم تھا جو ان کو ایسی باتیں سناتا تھا جو میں نے کسی کو بیان کرتے نہیں سنی تھیں۔ مجھے اس آدمی کی باتیں اچھی لگیں۔ پھر وہ شخص مفقود ہوگیا۔ میں نے اپنے ساتھیوں سے پوچھا : تم اس شخص کو جانتے ہو جو ہمارے ساتھ بیٹھتا (تھا اور ایسی ایسی باتیں کرتا) تھا۔ ایک آدمی نے کہا : ہاں میں اس کو جانتا ہوں۔ وہ اویس قرنی ہیں۔ میں نے کہا : تم اس کا گھر جانتے ہو ؟
اس نے اثبات میں جواب دیا تو میں اس کے ساتھ چل پڑا اور جا کر اس کا دروازہ کھٹکھٹایا۔ اویس نکل کر میرے پاس آئے۔ میں نے کہا : اے بھائی ! تم ہمارے پاس آنے جانے سے رک کیوں گئے ؟ اویس بولے : بےلباس ہونے کی وجہ۔ کیونکہ میرے ساتھ اس کے ساتھ مذاق اور تمسخر کرتے تھے اور اس کو ستاتے تھے۔ چنانچہ میں نے اس کو کہا : یہ میری چادر لے لو اور باندھ لو۔ اویس نے ایسا کرنے سے منع کیا اور بولے : یہ چادر مجھ پر دیکھ کر وہ مجھے مزید تکلیف دیں گے۔ اسیر کہتے ہیں : میں اصرار کرتا رہا حتی کہ اویس نے وہ چادر باندھ لی اور پھر میرے ساتھیوں کے پاس آئے تو انھوں نے کہا : کیا خیال ہے، تمہارا اس نے کس کو دھوکا دے کر چادر حاصل کی ؟ اویس یہ سن کر واپس ہوئے اور چادر اتاردی اور مجھے بولے : دیکھ لیا تم نے۔ اسیر کہتے ہیں : میں اپنے دوستوں کی مجلس میں حاضر ہوا اور ان سے مخاطب ہوا : تم اس آدمی سے آخر چاہتے کیا ہو ؟ تم نے اس کو بہت ستا لیا ہے۔ اس کا حال تو یہ ہے کہ ایک وقت اس کے پاس تن ڈھانکنے کو ہوتا ہے تو دوسرے وقت وہ بھی نہیں ہوتا۔
پھر میں نے ان کو خوب کھری کھری سنائیں اور سخت زبان استعمال کی۔
پھر اللہ کا کرنا ایسا ہوا کہ اہل کوفہ کا وفد حضرت عمر (رض) کی خدمت میں گیا۔
وفد میں ان میں سے ایک آدمی وہ بھی تھا جو اویس (رح) کو ستاتے تھے۔ حضرت عمر (رض) نے اہل وفد سے فرمایا : کیا تمہارے پاس قرنیوں میں سے کوئی شخص بھی ہے ؟
(یعنی اویس قرنی) ؟ یہ بات سن کر وہ شخص کھٹک گیا۔ پھر حضرت عمر (رض) نے فرمایا : رسول اللہ (صلی اللہ علیہ وآلہ وسلم) نے فرمایا تھا : تمہارے پاس یمن سے ایک شخص آئے گا جس کو اویس کہا جاتا ہوگا۔ یمن میں صرف اپنی ماں کو چھوڑے گا۔ اس کو برص کی سفیدی ہوگی۔ وہ اللہ سے دعاکرے گا تو اس کی سفیدی زائل ہوجائے گی سوائے (ایک درہم کی جگہ کے) ۔ پس جو شخص بھی اس سے ملاقات کا شرف حاصل کرے وہ اس سے اپنے لیے مغفرت کی دعا کرالے۔ پھر حضرت عمر (رض) نے فرمایا : چنانچہ وہ بزرگ ہمارے پاس تشریف لائے تھے۔ میں نے ان سے پوچھا : آپ کہاں سے تعلق رکھتے ہیں ؟ انھوں نے
فرمایا : یمن سے۔ میں نے پوچھا : تمہارا نام کیا ہے ؟
انھوں نے اویس نام بتایا۔ میں نے پوچھا : یمن میں کس کو چھوڑ کر آئے ہو ؟ فرمایا لگے : ماں کو۔ میں نے پوچھا : کیا تمہیں (برص کی ) سفیدی تھی پھر تمہاری دعا سے اللہ نے وہ زائل کردی ؟
انھوں نے فرمایا : بالکل۔ تب میں نے ان کی خدمت میں درخواست کی کہ میرے لیے اللہ سے مغفرت کی دعاکر دیجئے۔ وہ بولے : اے امیر المومنین ! کیا میرے جیسا (کم اوقات) شخص آپ جیسے (امیر المؤمنین) کے لیے دعا کرے گا ! چنانچہ پھر انھوں نے میرے لیے دعائے مغفرت فرمادی۔ پھر میں نے ان سے عرض کیا : آپ میرے بھائی ہیں۔ مجھ سے جدا نہ ہوئیے گا۔ لیکن پھر وہ مجھ سے گم ہوگئے۔ پھر مجھے خبر ملی کہ وہ تمہارے پاس کوفہ میں آگئے ہیں۔ یہ ساری باتیں سن کر وہ شخص جو حضرت اویس (رح) کو حقیر سمجھ کر ان کا مذاق اڑاتا تھا، وہ بولا : ایسا کوئی آدمی ہمارے اندر نہیں اور نہ ہم ایسے کسی آدمی کو جانتے ہیں۔ پھر حضرت عمر (رض) فرمانے لگے :
ہاں وہ ایسا ہی (گمنام ) آدمی ہے، گویا حضرت عمر (رض) اویس (رح) کی شان کو کم کرنے لگے، جس سے اس آدمی (میں حوصلہ پیدا ہوا اور پھر وہ) بولا : امیر المومنین ! ہمارے ہاں ایک آدمی ہے تو، جس کو اویس اویس کہتے ہیں۔ ہم اس کے ساتھ ہنسی مذاق بھی کرلیتے ہیں۔ تب حضرت عمر (رض) نے فرمایا : جاؤ اس کو ملو، ممکن تو نہیں ہے کہ اب وہ تمہیں ملے۔
چنانچہ وہ شخص کوفہ واپس ہوا اور اپنے اہل و عیال کے پاس جانے سے پہلے حضرت اویس (رح) کے پاس حاضر ہوا (اور اس کی ادب نوازی کو دیکھ کر) حضرت اویس (رح) بولے : ایسی تو تمہاری عادت پہلے نہیں تھی۔ تمہیں کیا ہوگیا ہے ؟ وہ آدمی بولا : میں نے حضرت عمر (رض) کو یوں یوں تمہارے متعلق فرماتے ہوئے سنا ہے۔ لہٰذا اے اویس ! میرے لیے مغفرت کی دعا کر دیجئے۔ حضرت اویس (رح) فرمانے لگے : میں ایسا نہیں کرسکتا جب تک کہ تم مجھ سے وعدہ نہ کرو کہ آئندہ میرے ساتھ مذاق تمسخر نہ کروگے اور نہ حضرت عمر (رض) کی کوئی بات کسی سے بیان کروگے۔ چنانچہ پھر حضرت اویس (رح) نے اس کے لیے اللہ کے حضور دعائے مغفرت کی۔
اسیر کہتے ہیں : پھر اویس کا معاملہ کوفہ میں شہرت پکڑ گیا تو میں ان کی خدمت میں حاضر ہوا اور ان کو عرض کیا : اے میرے بھائی : ہم نادانی میں آپ کا خیال نہیں کرپائے۔
حضرت اویس (رح) بولے : مجھے جو لوگوں سے تکلیف پہنچتی ہے تو بات یہ ہے کہ ہر انسان کو اس کے اپنے عمل کی سزا ملتی ہے۔ پھر حضرت اویس (رح) وہاں سے بھی چلے گئے اور غائب ہوگئے۔ (ابن سعد، حلیۃ الاولیاء، البیھقی فی الدلائل، ابن عساکر)