٣٧٨٢٧۔۔۔ یحییٰ بن سعید (رح)، سعید بن المسیب (رح) سے اور وہ حضرت عمر بن خطاب (رض) سے روایت کرتے ہیں، حضرت عمر (رض) نے ارشاد فرمایا : مجھے ایک دن رسول اللہ (صلی اللہ علیہ وآلہ وسلم) نے ارشاد فرمایا (رح)
اے عمر ! میں نے عرض کیا : لبیک وسعدیک یارسول اللہ ! اے اللہ کے رسو ! میں حاضر ہوں اور ساری سعادت آپ ہی کے لیے ہے۔ مجھے اس وقت گمان ہوا کہ شاید آپ مجھے کسی کام کے لیے روانہ فرمائیں گے۔ پھر حضور (صلی اللہ علیہ وآلہ وسلم) نے ارشاد فرمایا :
اے عمر ! میری امت میں آخری زمانے میں ایک شخص ہوگا، جس کو اویس قرنی کہا جاتا ہوگا۔ اس کو اپنے جسم میں کوئی بیماری لاحق ہوگی، وہ اللہ سے دعاکرے گا تو اللہ اس کی بیماری کو ختم کردے گا سوائے ایک تھوڑی سی چمک کے جو اس کے پہلو میں ہوگی۔ جب وہ اس چمک کو دیکھا کرے گا تو اللہ عزوجل کو یاد کیا کرے گا۔
پس جب تیری اس سے ملاقات ہو تو اس کو میری طرف سے سلام کہنا اور اس کو حکم کرنا کہ وہ تیرے لیے دعا کرے۔ کیونکہ وہ اپنے رب کے ہاں کریم (عزت والا) ہے۔
اپنی والدہ کے ساتھ نیکی برتنے والا ہے۔ اگر وہ اللہ پر قسم کھالے تو اللہ اس کی قسم کو پوری فرمادے گا۔ وہ ربیعہ اور مضر (عرب کے دوبڑے قبیلوں جتنے لوگوں کی شفاعت کرے گا۔
حضرت عمر (رض) فرماتے ہیں : چنانچہ میں نے رسول اللہ (صلی اللہ علیہ وآلہ وسلم) کی زندگی میں اس کی تلاش رکھی مگر میں ان کو نہ پاسکا۔ پھر حضرت ابوبکر (رض) کے زمانہ خلافت میں ان کی تلاش میں رہا مگر ان کو نہ پاسکا۔ پھر اپنی امارت (امیری کے) زمانہ میں قافلوں سے پوچھتا رہا کہ کیا تمہارے میں قبیلہ مراد کا کوئی شخص ہے ؟ کیا تمہارے میں قرن کو کوئی شخص ہے ؟ کیا تمہارے اندر اویس قرنی ہے ؟ پھر ایک مرتبہ ایک بوڑھے نے کہا کہ وہ تو میرا بھتیجا ہے۔ کیا آپ ایسے آدمی کے بارے میں پریشان ہورہے ہیں جو گھٹیا اوقات کا آدمی ہے۔ اے امیر المومنین ! آپ جیسے آدمی کو تو ایسے آدمی کے بارے میں نہیں پوچھنا چاہیے۔ امیر المومنین فرماتے ہیں :
میں نے کہا : تو اس کے بارے میں ہلاک ہونے والوں میں سے ہے۔ مگر اس نے پھر وہی اپنی پہلی بات دہرائی۔
حضرت عمر امیر المومنین (رض) فرماتے ہیں : پس میں اسی ادھیڑ بن میں تھا کہ ایک مرتبہ میرے سامنے ایک سواری برے حال میں آئی جس پر ایک پریشان حال آدمی بیٹھا تھا۔ میرے دل میں از خود آیا کہ یہ اویس ہوں گے۔ میں نے کہا : اے اللہ کے بندے ! کیا آپ اویس قرنی نہیں ہیں ؟ اس نے ہاں کہی، تو میں کہا : رسول اللہ (صلی اللہ علیہ وآلہ وسلم) نے تمہیں سلام کہا ہے۔
اویس نے کہا : اللہ کے رسول پر بھی سلام ہو اور آپ پر بھی سلام ہو اے امیر المومنین !۔
پھر میں نے کہا : حضور آپ کو حکم دے گئے ہیں کہ میرے لیے دعا کردینا۔
پھر حضرت عمر (رض) نے فرمایا : کہ پس ہر سال میں ان سے ملاقات کرتا ہوں اور ان کو اپنے حال کی خبر دیتا ہوں اور وہ مجھے اپنے حال کی خبر سناتے ہیں۔ (ابوالقاسم عبدالعزیز بن جعفر الخرقی فی فوائدہ، ابن عساکر للخطیب وقال : ھذا حدیث غریب جداً ) ۔
کلام :۔۔۔ مذکورہ روایت انتہائی ضعیف اور کمزور ہے، (جو ناقابل استدلال ہے) ۔