٣٧٨٢٨۔۔۔ حسن سے مروی ہے کہ حضور اکرم (صلی اللہ علیہ وآلہ وسلم) نے ارشاد فرمایا : میری امت کے ایک آدمی کی شفاعت کی وجہ سے ربیعہ اور مضر سے زیادہ لوگ جنت میں داخل ہوں گے۔ کیا میں تم کو ان کا نام نہ بتاؤں ؟ صحابہ (رض) نے عرض کیا : ضرور تب آپ نے ارشاد فرمایا : وہ اویس قرنی ہوں گے۔ پھر (حضرت عمر (رض) کو مخاطب ہو کر) ارشاد فرمایا : اے عمر اگر تیری ان سے ملاقات ہوجائے تو ان کو میرا سلام کہنا اور ان کو کہنا کہ وہ تیرے لیے دعا کریں۔ اور یاد رکھو ان کو سفیدی (برص) کی بیماری ہوئی ہوگی۔
پھر وہ اللہ سے دعا کریں گے تو اللہ پاک اس بیماری کو ان سے اٹھالیں گے سوائے کچھ معمولی حصہ کے۔
چنانچہ جب خلافت عمر (رض) کا دور ہوا تو حضرت عمر (رض) نے جب آپ دوران حج میں تھے، (آنے والوں سے) ارشاد فرمایا : تم سب لوگ بیٹھ جاؤ سوائے قبیلہ قرن کے آدمیوں کے۔
چنانچہ ایک آدمی کے سواسب بیٹھ گئے۔ حضرت عمر (رض) نے اس کو بلایا اور پوچھا :
کیا تم میں اویس نام کا کوئی شخص ہے ؟ آدمی نے حضرت عمر (رض) ہی سے پوچھا : آپ اس سے کیا چاہتے ہیں، وہ تو ویران جگہوں میں رہنے والا آدمی ہے اور لوگوں سے بھی میل جول نہیں رکھتا۔ حضرت عمر (رض) نے ارشاد فرمایا :
اس کو میرا سلام کہنا اور اس کو مجھ سے ملاقات کے لیے کہہ دینا۔
چنانچہ اس آدمی نے حضرت عمر (رض) کا پیغام حضرت اویس قرنی (رح) تک پہنچا دیا۔ حضرت اویس (رح) تعمیل ارشاد میں حاضر ہوئے۔ حضرت عمر (رض) نے پوچھا : کیا آپ اویس ہیں ؟ انھوں نے عرض کیا : جی ہاں امیر المومنین ! حضرت عمر (رض) بولے : رسول اللہ (صلی اللہ علیہ وآلہ وسلم) نے صحیح فرمایا تھا۔ پھر پوچھا : کیا آپ کو برص کی بیماری تھی، پھر آپ نے اللہ سے دعا کی تو وہ بیماری زائل ہوگئی، آپ نے پھر دعا کی تو اللہ نے اس بیماری کا کچھ حصہ آپ کو واپس لوٹادیا ؟ حضرت اویس (رح) نے پوچھا : ہاں ایسا ہی ہے، آپ کو کس نے یہ خبر دی ؟ اللہ کی قسم ! اس کا تو اللہ کے سوا کسی کو علم نہ تھا۔ حضرت عمر (رض) نے فرمایا : مجھے رسول اللہ (صلی اللہ علیہ وآلہ وسلم) نے اس کی خبر دی تھی اور مجھے حکم دیا تھا کہ میں آپ سے اپنے لیے دعا کی درخواست کروں نیز حضور (صلی اللہ علیہ وآلہ وسلم) نے ارشاد فرمایا تھا : میرے ایک امتی کی شفاعت کی وجہ سے
ربیعہ اور مضر قبیلوں سے زیادہ لوگ جنت میں داخل ہوں گے، پھر حضور (صلی اللہ علیہ وآلہ وسلم) نے آپ کا نام لیا تھا۔
چنانچہ حضرت اویس (رح) نے حضرت عمر (رض) کے لیے دعا کی اور پھر حضرت عمر (رض) سے درخواست کی کہ اے امیر المومنین ! میری بھی آپ سے ایک حاجت ہے، وہ یہ کہ آپ اس راز کو چھپا کر رکھئے گا اور اب مجھے واپس لوٹنے کی اجازت بھی رحمت فرما دیجئے۔
چنانچہ حضرت عمر (رض) نے ان کی درخواست پر عمل فرمایا اور ان کے راز کو مخفی رکھتے رہے حتی کہ جب وہ (حضرت اویس قرنی (رح)) نہاوند کی جنگ میں شہید ہوگئے (تب آپ نے دوسرے لوگوں کو اطلاع فرمائی) (ابن عساکر)