٣٧٨٣٢۔۔۔ حضرت علقمہ بن مرثد الحضرمی سے مروی ہے فرماتے ہیں زہد اور بزرگی آٹھ تابعیوں پر ختم ہے : عامر بن عبداللہ القیسی، اویس قرنی، ھرم بن حیان عبدی، ربیع بن خثیم ثوری، ابو مسلم خولانی، اسود بن یزید، مسروق بن الاجدع، حسن بن ابوالحسن بصری۔
اویس قرنی کے گھروالوں نے ان کے متعلق پاگل ہونے کا خیال کرلیا تھا اور ان کے لیے اپنے محلے کے دروازے پر ایک گھر بنادیا تھا۔ گھر والوں کو ایک ایک دودوسال ایسے گذر جاتے تھے کہ ان کو اویس نظر نہیں آتے تھے۔ حضرت اویس (رح) اپنے گذر بسر اس طرح کرتے تھے کہ کھجور کی گٹھلیاں چنتے پھرتے تھے شام کو ان کو بیچ کر اپنی افطاری کا بند و بست کرلیتے تھے اور اگر کہیں ردی کھجور پڑی مل جاتی تو ان کو اپنی افطاری کے لیے سنبھال کر رکھ لیتے تھے۔
جب حضرت عمر بن خطاب (رض) لوگوں کے والی (حاکم) بنے تو انھوں نے (موسم حج میں ) ارشاد فرمایا : لوگو ! کھڑے ہوجاؤ، پھر فرمایا : سب بیٹھ جاؤ صرف وہ لوگ جو اہل یمن سے تعلق رکھتے ہیں وہ کھڑے رہیں۔ پھر ارشاد فرمایا : صرف وہ یمنی کھڑے رہیں جو اہل کوفہ میں سے ہیں۔ چنانچہ پھر کچھ لوگ بیٹھ گئے۔ پھر ارشاد فرمایا : ان میں سے صرف وہ لوگ کھڑے رہیں جو مراد (قبیلے) کے ہوں۔ چنانچہ پھر کچھ لوگ بیٹھ گئے۔ پھر ارشاد فرمایا : صرف وہ لوگ کھڑے رہیں جو قرن (شاخ) کے ہوں۔ چنانچہ پھر ایک آدمی کے سوا سب لوگ بیٹھ گئے۔ اور یہ آدمی حضرت اویس (رح) کے چچا تھے۔ حضرت عمر (رض) نے ان کو فرمایا : کیا تو قرنی ہے ؟ اس نے اثبات میں جواب دیا تو پھر اس سے حضرت اویس (رح) کے متعلق پوچھا تو وہ بولے : اے امیر المومنین ! آپ اس کے متعلق کیوں پوچھ رہے ہیں ؟ اللہ کی قسم ! ہمارے اندر اس سے ہلکا اور پاگل آدمی اور پریشان حال اور کوئی نہیں ہے۔ یہ سن کر حضرت عمر (رض) رو پڑے اور ارشاد فرمایا : مجھے اس پر نہیں تجھ پر رونا آرہا ہے۔ میں نے رسول اللہ (صلی اللہ علیہ وآلہ وسلم) سے سنا ہے کہ اس (اویس) کی شفاعت کی بدولت ربیعہ ومضر (عرب کے سب سے زیادہ افراد والے دوقبیلوں) کی مثل لوگ جنت میں داخل ہوں گے۔ (ابن عساکر)