٣٧٨٣٥۔۔۔ (مسند ابن عباس (رض) اسباط (رح)، سدی (رح) سے نقل کرتے ہیں کہ ایک بادشاہ تھا جس کا ایک بیٹا تھا جس کو خضر کہتے تھے، (علیہ السلام) اور الیاس اس کا بھائی تھا، (علیہ السلام) لوگوں نے بادشاہ کو کہا :
آپ ضعیف العمر ہوگئے ہیں اور آپ کا بیٹا خضر بادشاہی میں نہیں آتا ہے۔ آپ ایسا کریں کہ اس کی شادی کردیں۔ اس کا بیٹا ہوگا تو شاید وہ آپ کے بعد بادشاہی سنبھال لے۔ چنانچہ بادشاہ نے اپنے بیٹے خضر (علیہ السلام) کو کہا : بیٹا شادی کرلے۔ بیٹے نے کہا : میں شادی نہیں کرنا چاہتا۔ باپ نے کیا : بیٹا اس کے بغیر تو چارہ کار نہیں۔ بیٹے نے کہا : تب آپ کی مرضی، شادی کردیں۔ چنانچہ باپ نے اپنے بیٹے خضر کی ایک کنواری عورت سے شادی کردی۔ حضرت خضر (علیہ السلام) نے اس عورت کو فرمایا : مجھے عورتوں کی رغبت و حاجت نہیں ہے۔ اگر تو چاہتی ہے تو میرے ساتھ اللہ کی عبادت کرتی رہ اور شاہی رہن سہن اور کھانے کھاتی رہ اور اگر چاہے تو میں تجھے طلاق دے دیتا ہوں۔ عورت بولی : نہیں، بلکہ میں تیرے ساتھ اللہ کی عبادت کرتی رہوں گی۔ خضر نے فرمایا : ٹھیک ہے، مگر میرا راز کسی پر ظاہر نہ کرنا۔ کیونکہ اگر تو میرے راز کی حفاظت کرتی رہے گی تو اللہ تیری حفاظت کرتا رہے گا ۔ اور اگر تو، راز کو فاش کردے گی تو اللہ تجھے ہلاک کردے گا ۔
چنانچہ وہ سال بھر خضر کے ساتھ رہی اور اس نے کسی بچے کو جنم نہیں دیا۔
لہٰذا اس کو بادشاہ نے بلوایا اور کہا : تو جوان عورت ہے اور میرا بیٹا بھی جوان ہے۔
پھر بچہ کہاں ہے ؟ حالانکہ تو بچے دینے والی عورتوں میں سے ہے۔ عورت بولی : اولاد اللہ کے حکم سے ہوتی ہے۔ پھر بادشاہ نے اپنے خضر کو بلایا اور بوچھا : اے بیٹے ! بچہ کہاں ہے ؟ خضر نے بھی وہی جواب دیا : بچہ اللہ کے حکم سے ہوتا ہے۔
کسی نے بادشاہ کو کہا : ممکن ہے یہ عورت بانجھ کوکھ ہو بچہ جننے کی اہلیت نہ رکھتی ہو۔
لہٰذا آپ اپنے بیٹے کی شادی کسی ایسی عورت سے کریں جس نے پہلے کوئی بچہ جنم دیا ہو۔
چنانچہ بادشاہ نے اپنے بیٹے کو کہا تم اس بیوی کو طلاق دے دو خضر بولا : آپ میرے اور اس کے درمیان جدائی کرانا چاہتے ہو حالانکہ اب مجھے اس سے لگاؤ ہوگیا ہے۔ بادشاہ نے کہا : اس کو طلاق دئیے بغیر گذارہ نہیں۔ چنانچہ مجبوراً خضر نے اس بیوی کو طلاق دے دی۔ پھر بادشاہ نے اپنے بیٹے کی شادی یہ اسی تیبہ عورت (جس کی پہلے شادی ہوچکی ہو) سے کردی جس نے پہلے بچہ بھی جنا تھا۔
چنانچہ خضر نے اس کو بھی وہی بات کہی جو پہلی عورت کو شادی کے بعد کہی تھی۔
عورت نے بھی ویسا جواب دیا کہ میں تمہارے ساتھ عبادت کرتی رہوں۔ جب اس کو بھی سال گذر گیا تو بادشاہ نے اس کو بھی بلایا اور کہا : تو پہلے سے شادی شدہ عورت تھی اور تجھے پہلے بچہ بھی ہوچکا تھا، اب تیرا بچہ کہاں ہے ؟ عورت (راز کو مخفی نہ رکھ سکی اور ) بولی : بچہ مرد کے ملنے سے ہوتا ہے اور میرا مرد عبادت میں مشغول رہتا ہے اور اس کو عورتوں کی طرف رغبت ہوتی نہیں۔ تب بادشاہ کو اپنے بیٹے پر سخت غصہ آیا اور اس کو تلاش کرنے کا حکم دیا۔ مگر خضر بھاگ گئے ان کی تلاش میں تین افراد نکلے۔ ان میں سے دو افراد نے خضر کو تلاش کرلیا۔
خضر نے ان کو کہا : تم مجھے چھوڑ دو مگر دونوں نے چھوڑنے سے انکار کردیا۔ پھر تیسرا متلاشی بھی ان کے پاس پہنچ گیا اس نے کہا : تم خضر کو بادشاہ کے پاس لے جانے سے گریز کرو، کہیں بادشاہ اسی کو سزا نہ دے اور یہ اس کا بیٹا ہے۔
چنانچہ دونوں کی سمجھ میں بات آگئی اور انھوں نے اس کو چھوڑ دیا۔
پھر بادشاہ کے پاس آکر دونوں نے خبر دی کہ انھوں نے خضر کو پکڑلیا تھا لیکن تیسرے نے اس کو ان سے لے لیا۔ چنانچہ بادشاہ نے تیسرے کو قید کرلیا۔ پھر بادشاہ نے غور و فکر کیا تو دونوں کو بلایا اور بولا : تم دونوں نے میرے بیٹے کو اتنا خوفزدہ کردیا کہ وہ مجھ سے بھاگ کر چلا گیا۔ لہٰذا پھر بادشاہ نے ان دونوں کے قتل کا حکم جاری کردیا اور عورت کو بھی بلایا اور اس کو کہا : تو نے میرے بیٹے کو فرار ہونے پر مجبور کیا ہے، اور اس کے راز کو فاش کیا ہے۔ اگر اس کا راز رکھتی تو وہ میرے پاس موجود ہوتا۔ چنانچہ بادشاہ نے اس کو بھی قتل کروا دیا۔ اور پہلی بیوی اور تیسرے آدمی کو آزاد کردیا۔
عورت نے جا کر شہر کے دروازے پر ایک چھپر ڈال لیا اور لکڑیاں اکٹھی کرکے ان کو بیچتی اور اس سے اپنا گذر سفر کرتی تھی۔
ایک مرتبہ وہی تیسرا آدمی فقیری حالت میں اس شہر سے نکلا اور اس نے بسم اللہ کہا۔ عورت نے اس سے پوچھا : کیا تو اللہ کو جانتا ہے ؟ اس نے کہا :
میں خضر (علیہ السلام) کا ساتھ ہوں عورت بولی : اور میں خضر (علیہ السلام) کی پہلی بیوی ہوں۔
چنانچہ اس آدمی نے اس عورت سے شادی کرلی اور پھر اس کے ہاں اولاد بھی ہوئی۔
یہ عورت (خضر (علیہ السلام) کی طلاق یافتہ اور اس دوسرے آدمی کی بیوی) ، فرعون کی بیٹی کی کنگھی کرنے والی خادمہ تھی۔
اسیاط، عطاء بن السائب عن سعید بن جبیر عن ابن عباس (رض) کی سند سے روایت کرتے ہیں۔
حضرت ابن عباس (رض) فرماتے ہیں ایک مرتبہ وہ عورت فرعون کی بیٹی کو کنگھی کررہی تھی کہ اس کے ہاتھ سے کنگھی چھوٹ کر گرگئی تو اس کے منہ سے نکلا :
سبحان ربی، میرا رب پاک ذات ہے۔ فرعون کی بیٹی بولی : یعنی میرا باپ ؟
عورت بولی : نہیں میرا اور تیرے باپ کا رب۔
فرعون کی بیٹی نے اس عورت کو ڈرایا کہ میں اپنے باپ کو خبر دوں گی۔
عورت بولی ٹھیک ہے۔ چنانچہ بیٹی نے اپنے باپ فرعون کو خبر کردی۔ فرعون نے اس کو بلوایا اور بولا اپنے پہلے دین کی طرف واپس آجا۔ لیکن عورت نے انکار کردیا۔ فرعون نے تیل کا کڑاھا گرم کروایا حتی کہ جب وہ جوش مارنے لگا تو تب اس عورت سے پوچھا : کیا تو اپنے دین کی طرف آتی ہے ؟
اس نے تب بھی انکار کیا تو فرعون نے حکم دیا اور اس کی اولاد میں سے ایک بچے کو اس کڑاھے میں ڈال دیا گیا۔ پھر دوبارہ عورت سے پوچھا : کیا اپنے دین کی طرف واپس آتی ہے ؟ اس نے تب بھی انکار کیا پھر دوسرا بچہ ڈال دیا گیا۔
حتی کہ اس طرح اس عورت کی تمام اولاد کو ڈال دیا گیا پھر آخر میں پوچھا : اب لوٹتی ہے اپنے سابقہ دین کی طرف ؟ اس نے انکار کیا تو پھر اس کے لیے بھی حکم دیا گیا۔
عورت بولی : میری ایک حاجت ہے، پوچھا گیا : وہ کیا ؟ اس نے کہا : جب تو مجھے کڑاھے میں ڈال دے تو پھر یہ کڑاھا میرے گھر جو شہر کے دروازے پر ہے میں الٹوا دینا اور پھر کڑاھا نکال کر ہماری نعشوں پر اس گھر کو ڈھا دینا تاکہ وہ ہماری قبر بن جائے۔ بادشاہ نے کہا : بہتر ہے۔ تیرا اتنا تو ہم پر حق ہے۔ اور پھر بادشاہ نے اس کے حکم کو پورا کروایا۔
ابن عباس (رض) فرماتے ہیں : نبی اکرم (صلی اللہ علیہ وآلہ وسلم) نے ارشاد فرمایا :
جس رات مجھے آسمانوں کی سیر کے لیے لے جایا گیا تو میں نے ایک عمدہ خوشبو محسوس کی میں نے پوچھا اے جبرائیل ! یہ کیسی خوشبو ہے ؟ انھوں نے فرمایا : یہ خوشبو فرعون کی بیٹی کی کنگھی کرنے والی خادمہ اور اس کی اولاد کی خوشبو ہے (رواہ ابن عساکر