٣٧٨٥٣۔۔۔ (مسند عمر (رض)) قال البیھقی فی السنن : ثنا ابوسعد احمد بن محمد المالینی ثنا ابوبکر الاسماعیلی ثنا عبداللہ بن وھب یعنی الدینوری ثنا عبداللہ بن محمد بن ہارون الفریابی قال سمعت الشافعی محمد بن ادریس بمکۃ یعقول :
امام شافعی (رح) نے ایک مرتبہ مکہ میں لوگوں کو مخاطب ہو کر فرمایا :
اے لوگو ! جو چاہو تم مجھ سے سوال کرو، میں کتاب اللہ عزوجل اور سنت رسول اللہ (صلی اللہ علیہ وآلہ وسلم) سے تم کو جواب دوں گا۔
محمد بن ہارون جو اس روایت کے راوی ہیں کہتے ہیں : میں نے ان کو عرض کیا :
اللہ آپ کو درست رکھے آپ اس محرم کے بارے میں کیا کہتے ہیں جو زنبور (بھڑ، تتیے) کو قتل کردے ؟
حضرت امام (رح) نے فرمایا : ہاں، بسم اللہ الرحمن الرحیم : اللہ تعالیٰ کا فرمان ہے :
وما آتاکم الرسول فخذوہ وما نھاکم عنہ فاتنھوا۔
اور جو چیز تم کو پیغمبر دیں وہ لے لو اور جس سے منع کریں (اس سے) باز رہو۔
پھر فرمایا : حدثنا سفیان بن عیینہ بن عبدالملک بن عمیر عن ربعی عن حذیفۃ یعنی حذیفہ (رض) سے مروی ہے کہ رسول اللہ (صلی اللہ علیہ وآلہ وسلم) نے ارشاد فرمایا :
میرے بعد والے یعنی ابوبکر وعمر کی اقتداء کرنا۔
پھر فرمایا : حدثنا سفیان بن عیینۃ عن مسعرقیس بن مسلم عن طارق بن شھاب عن عمر بن خطاب یعنی حضرت عمر بن خطاب (رض) سے مروی ہے کہ آپ (رض) نے محرم کو زنبور (بھڑ، تتیے) کے قتل کا حکم دیا۔ (السنن البیھقی)
فائدہ :۔۔۔ امام کبیر ابوعبداللہ محمد بن ادریس شافعی، قریشی، ہاشمی مطلبی مکی اہل سنت کے چار بڑے اماموں میں سے ایک ہیں۔ (١٥٠ ھ میں پیدا ہوئے اور ٢٠٤ ھ میں وفات پائی۔ بہترین کتاب جس میں ان کے حالات درج ہیں وہ امام بیہقی (رح) کی عربی تصنیف ” مناقب الشافعی “ دو جلدوں میں ہے۔