٣٧٨٦٥۔۔۔ نوفل بن سلیمان ھنائی، عبداللہ بن عمر سے، وہ نافع سے اور نافع حضرت عبداللہ بن عمر (رض) سے روایت کرتے ہیں کہ میں نے رسول اللہ (صلی اللہ علیہ وآلہ وسلم) کو ارشاد فرماتے ہوئے سنا :
حق بات یہ ہے کہ لقمان نبی نہ تھے۔ لیکن (اللہ کے) ثابت قدم بندے تھے، بہت زیادہ غور و فکر کرنے والے اور اچھے
خیالات کے مالک تھے۔ انھوں نے اللہ سے محبت رکھی اللہ نے ان کو محبوب بنالیا اور ان کو حکمت سے نوازا۔
ایک مرتبہ لقمان (رح) دن کو سوئے ہوئے تھے کہ ان کو ایک آواز آئی : اے لقمان ! کیا تم چاہتے ہو کہ اللہ پاک تم کو زمین میں خلافت (بادشاہت) عطا فرمائے اور تم لوگوں کے درمیان حق کے ساتھ فیصلے کرو ؟ لقمان یہ آواز سن کر بیدار ہوگئے اور انھوں نے اس آواز کا جواب دیا : اگر میرا رب مجھے اختیار دے گا (حکم دے گا) تو میں قبول کرلوں گا کیونکہ مجھے علم ہے کہ اگر پروردگار مجھے یہ منصب عطا کرے گا تو میری مدد بھی کرے گا اور مجھے اس کا علم عطا کرے گا اور مجھے (خطاء میں پڑنے سے) محفوظ رکھے گا، لیکن اگر میرا رب مجھے اختیار دے تو میں عافیت کو قبول کروں گا اور (خلافت کی) مصیبت کو قبول نہ کروں گا۔ ملائکہ نے نرم آواز میں پوچھا : کیوں اے لقمان ! حضرت لقمان (رح) نے ارشاد فرمایا : کیونکہ حاکم سخت حالات میں گھرا رہتا ہے اور ظلم ہر طرف سے اس پر چھا جاتا ہے (ظلم کرنے کے خطرات درپیش ہوتے ہیں، پھر وہ ان سے جنت کا راستہ خطا ہوجاتا ہے۔ اور دنیا کی ذلت دنیا کی شرافت سے زیادہ بہتر ہے۔ اور جو شخص دنیا کو آخرت پر ترجیح دے کر قبول کرتا ہے تو دنیا اس کو فتنے و آزمائش میں مبتلا کردیتی ہے اور وہ آخرت کی بادشاہت حاصل نہیں کرسکتا۔
ملائکہ کو ان کے عمدہ جواب سے تعجب ہوا۔ پھر وہ سوئے تو اللہ نے ان کو حکمت سے بھردیا پھر اٹھے تو حکمت والا کلام کرنے لگے
پھر اسی طرح حضرت داؤد (علیہ السلام) کو بھی وہی نداء دی گئی اور انھوں نے خلافت کو قبول فرمایا لیا اور کسی طرح کی کوئی شرط نہیں لگائی جس کی وجہ سے ان سے کئی مرتبہ خطاء سرزد ہوئی اگرچہ ہر مرتبہ اللہ پاک ان سے درگذر فرماتے رہے اور ان کی مغفرت کرتے رہے۔
حضرت لقمان (رح) حضرت داؤد (علیہ السلام) کو حکمت کی باتیں کہتے تھے اور ان کو حکمت سکھاتے تھے۔ حضرت داؤد (علیہ السلام) نے حضرت لقمان (رح) کو فرمایا : اے لقمان ! تم خوش نصیب ہو کہ تم کو حکمت و دانائی عطا کردی گئی اور مصیبت کو تم سے دور کردیا گیا جب کہ داؤد کو خلافت دی گئی اور مصیبت و آزمائش میں اس کو مبتلا کردیا گیا۔ (الدیلمی، ابن عساکر